ءوز بيزنەسىن اشۋ ءۇشىن 12 مىڭنان استام جاسقا 400 اەك مولشەرىندە گرانتتار بەرىلدى.
قازاقستاندا جاستار سانى 5،7 ملن ادامعا دەيىن ءوستى. بۇل تۋرالى ق ر پرەمەر-مينيسترىنىڭ ورىنباسارى التاي كولگىنوۆ الەۋمەتتىك جەلىدەگى پاراقشاسىندا جازدى، دەپ حابارلايدى Almaty-akshamy.kz.
«وزدەرىڭىز بىلەتىندەي، مەكتەپ، كوللەدج/ۋنيۆەرسيتەت ادامنىڭ تانىم-كوكجيەگىنىڭ، ءبىلىمىنىڭ ىرگەتاسىن قالاپ، بەلگىلى ءبىر ماماندىق يەسى بولۋىنا سەپتىگىن تيگىزەدى. بۇل جاستاردىڭ بولاشاقتا قىزمەت ەتىپ، كارەراسىن قۇرۋىنا مۇمكىندىك جاسايدى. دەگەنمەن تاجىريبەسىز ءبارى بىردەي جۇمىسقا تۇرا المايتىنىن دا بىلەمىز. وسى ءۇشىن «NEET جاستار» ۇعىمى (وقىمايتىن، جۇمىس ىستەمەيتىن جانە بىلىكتىلىگى جوق جاستار) زاڭنامالىق تۇردە بەكىتىلگەن. جاستاردىڭ باسىم بولىگىن مەملەكەتتىك قولداۋ شارالارىمەن قامتۋ ءۇشىن مەملەكەت باسشىسىنىڭ تاپسىرماسى بويىنشا ولاردىڭ جاسى 35 جاسقا دەيىن ۇلعايتىلدى»، - دەپ جازدى ۇكىمەت باسشىسىنىڭ ورىنباسارى.
ونىڭ ايتۋىنشا، جاستار سانى 5،7 ملن ادامعا دەيىن وسكەن. وسى ماقساتتا مىناداي شارالار قابىلدانىپ جاتقانىن جەتكىزدى:
ءبىرىنشى. 2022 جىلدىڭ ناۋرىز ايىنان باستاپ «جاستار پراكتيكاسى» (6 ايدان 12 ايعا دەيىن، 25-تەن 30 اەك-كە دەيىن) جانە «العاشقى جۇمىس ورنى» (12-دەن 18 ايعا دەيىن، 20-دان 30 اەك-كە دەيىن) جوبالارى بويىنشا ۇزاقتىعى مەن جالاقىسى ۇلعايتىلدى. بۇل شارالار 177 مىڭنان استام جاستى جۇمىسقا (ونىڭ ىشىندە 107 مىڭنان استامى تۇراقتى جۇمىس ورىندارىنا) ورنالاستىرۋعا مۇمكىندىك بەردى.
«باستاۋ بيزنەس» جوباسى اياسىندا 70 مىڭعا جۋىق جاس ونلاين-وقىتۋدان ءوتتى؛ «جاسىل ەل» جوباسى بويىنشا 2025 جىلعا دەيىن جىل سايىن ەلدى مەكەندەردى اباتتاندىرۋ ماقساتىندا اقىلى ماۋسىمدىق جۇمىسقا 30 مىڭ جاس جۇمىلدىرىلاتىن بولادى.
ەكىنشى. مەملەكەت باسشىسىنىڭ تاپسىرماسى بويىنشا 21 جاستان 35 جاسقا دەيىنگى جاستار ءۇشىن جىلدىق 2،5% جەڭىلدىكپەن شاعىن نەسيە بەرۋ تەتىگى ەنگىزىلۋدە. نەسيەنىڭ ەڭ جوعارى سوماسى – 5 ملن تەڭگەگە دەيىن. 2023 جىلى 6 مىڭعا جۋىق شاعىن نەسيە بەرۋ جوسپارلانىپ وتىر.
ءوز بيزنەسىن اشۋ ءۇشىن 12 مىڭنان استام جاسقا 400 اەك (1 ملن 200 مىڭ تەڭگەدەن استام) مولشەرىندە گرانتتار بەرىلدى.
ءۇشىنشى. جاڭا الەۋمەتتىك كودەكس اياسىندا 3،3 ملن-نان استام ادامدى، ونىڭ ىشىندە 2،3 ملن جاستى جۇمىسقا ورنالاستىرۋ جوسپارلانىپ وتىر. ناقتىراق ايتقاندا، ۇلتتىق جوبالار مەن بيزنەستىڭ جەكە باستامالارى اياسىندا قۇرىلاتىن جاڭا جۇمىس ورىندارى، مەملەكەت سۋبسيديالايتىن جۇمىس ورىندارى، ءوز ءىسىن اشۋعا ارنالعان قۇرالدار؛ جۇمىس كۇشىنىڭ تابيعي رەتتەلۋىنە بايلانىستى بوس ورىندار جانە ت.ب.
ەسكە سالساق، وتكەن جىلدىڭ سوڭىندا مەملەكەت باسشىسى ق ر «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك جاستار ساياساتى جانە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويدى. زاڭعا سايكەس، «جاستار» ۇعىمىنىڭ جاس شەگىن 29-دان 35 جاسقا دەيىن ۇلعايتۋ جونىندە تۇزەتۋ ەنگىزىلدى.
سونىمەن قاتار بۇگىن ءماجىلىستىڭ جالپى وتىرىسىندا التاي كولگىنوۆ جاستاردى جۇمىسقا ورنالاستىرۋ ماسەلەسى تۋرالى ايتتى.