وقۋشىلار ەندى 173 كۇن وقيدى.
بۇل تۋرالى وقۋ-اعارتۋ ءبىرىنشى ۆيسە-مينيسترى شولپان كارينوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جاڭا وقۋ جىلىندا ەلىمىزدە 7 مىڭنان اسا مەكتەپ جۇمىس ىستەيتىن بولادى. ولارعا جالپى سانى 3،6 ملن بالا كەلەدى جانە وقۋشىلارعا 384 مىڭنان استام پەداگوگ ساباق بەرەدى. ءداستۇر بويىنشا، 1 قىركۇيەكتە رەسپۋبليكانىڭ بارلىق مەكتەبىندە ءبىلىم كۇنىنە ارنالعان سالتاناتتى ءىس-شارالار، سونداي-اق «تەرەڭ ءبىلىم، ەڭبەكقورلىق جانە وتانشىلدىق قاسيەت» تاقىرىبىندا سىنىپ ساعاتى وتەدى»، - دەدى ول ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، سالتاناتتى شارانى وتكىزۋ فورماتىن، قاتىسۋشىلار قۇرامىن ءبىلىم بەرۋ ۇيىمدارى وزدەرى ايقىندايدى.
«وقۋ جىلى 1 قىركۇيەكتە باستالىپ، 31 مامىرعا دەيىن، ياعني 36 اپتاعا سوزىلادى. جازدىڭ العاشقى كۇنىنەن باستاپ وقۋشىلار ءداستۇرلى تۇردە جازعى دەمالىسقا شىعادى. تيىسىنشە، جازدىڭ 3 ايىندا بالالار تولىعىمەن دەمالادى. جالپى، ءبىر وقۋ جىلىندا بالالار 4 رەت دەمالادى. بۇل جەردە ەشقانداي وزگەرىس جوق. جازعى دەمالىس كۇندەرىن قوسقاندا بالالار جالپى 192 كۇن دەمالادى، ال 173 كۇن وقيدى. وقۋ جىلىنىڭ 36 اپتا بولۋىنا بايلانىستى، ءۇش اۋىسىمدى مەكتەپتەردى قوسپاعاندا، 7 مىڭنان استام مەكتەپ جاڭا وقۋ جىلىندا بەس كۇندىك وقىتۋ رەجيمىنە كوشەدى. بۇل مەكتەپتەردە 3،4 ملن بالا جانە 300 مىڭنان استام پەداگوگ بار»، - دەدى شولپان كارينوۆا.