قالا باسشىسى ەربولات دوسايەۆ جىلۋ بەرۋ ماۋسىمىنا دايىندىق ماسەلەلەرى بويىنشا كوشپەلى كەڭەس وتكىزدى
جۇمىس ساپارى بارىسىندا قالا باسشىسى ەربولات دوسايەۆ قازاندىقتاردا، جەو-2-دە بولدى جانە الماتى اكىمدىگى باسقارمالارى مەن كوممۋنالدىق كاسىپورىندار باسشىلارىنىڭ قاتىسۋىمەن مەگاپوليستى جىلۋ بەرۋ ماۋسىمىنا دايىندىق ماسەلەلەرى بويىنشا كوشپەلى كەڭەس وتكىزدى، دەپ حابارلايدى اlmaty-akshamy.kz.
العاشقى وبەكت بوستاندىق اۋدانىندا ورنالاسقان وڭتۇستىك اۋداندىق قازاندىق بولدى. ەربولات دوسايەۆ 200 مىڭ تۇتىنۋشىنى قامتي وتىرىپ، قالانىڭ وڭتۇستىك اۋدانىندا قازاندىق قۋاتىن ارتتىرۋعا جانە ەنەرگيا تاپشىلىعىن جابۋعا مۇمكىندىك بەرەتىن ءىرى جىلۋ ماگيسترالىن قايتا قۇرۋ بارىسىمەن تانىستى.
بۇگىنگى كۇنى 4 قازاندىقتىڭ 2 قازاندىعىن اۋىستىرۋ جانە 1 قازاندىقتى قايتا قۇرۋ بويىنشا جۇمىستار ورىندالدى. قالا اكىمى جەلىلىك سورعىلار مەن №2 قازاندىق بويىنشا اياقتالماعان جۇمىستارى جونىندە ەسكەرتۋ بەردى، ەنەرگەتيكا جانە سۋمەن جابدىقتاۋ باسقارماسى جىلۋ بەرۋ ماۋسىمى باستالعانعا دەيىن جۇمىستاردى اياقتاۋى قاجەت. ەربولات دوسايەۆ اۋدانداعى جاڭا تۇرعىن ءۇي قۇرىلىسىنا بايلانىستى قۋاتتىلىقتىڭ ارتۋىمەن وڭتۇستىك اۋداندىق قازاندىقتى كەڭەيتۋدى قاراستىرۋدى تاپسىردى.
الماتى اكىمىنە «پرەمەرا» قازاندىعىن كەڭەيتۋ جۇمىستارىنىڭ بارىسى تۋرالى باياندالدى. جوبا 5 قازاندىق پەن قوسالقى جابدىقتى ورناتۋمەن جاڭا عيماراتتىڭ قۇرىلىسىن قاراستىرادى. قالا باسشىسى جىلۋ جەلىلەرىن گيدروسىناۋ جانە جوندەۋ جۇمىستارى بويىنشا بارلىق جۇمىستاردى اعىمداعى جىلدىڭ 25 قىركۇيەگىنە دەيىن جۇرگىزۋدى تاپسىردى. جالپى، ەكى قازاندىقتاعى قۇرىلىس جۇمىستارىن كەلەسى جىلدىڭ شىلدە ايىندا اياقتاۋ جوسپارلانىپ وتىر. ناتيجەسىندە، قالادا جىلۋ ەنەرگياسىنىڭ كولەمى ەداۋىر ارتادى، ەسكى قۇبىرلاردى اۋىستىرۋ ونداعان جىلدار بويى اپات ءقاۋپىن بولدىرمايدى.
جۇمىس ساپارى بارىسىندا ينجەنەرلىك جەلىلەردىڭ توزىعى جەتكەنى ايتىلدى، ونىڭ ىشىندە ەلەكترمەن جابدىقتاۋ 65%-عا، جىلۋمەن جابدىقتاۋ 60%-عا، سۋمەن جابدىقتاۋ 55،8%-عا جانە گازبەن جابدىقتاۋ 36%-عا توزىپ تۇر. دەگەنمەن، ينجەنەرلىك جەلىلەردىڭ توزۋىن ازايتۋ بويىنشا بارلىق قاجەتتى ءىس-شارالار جۇرگىزىلۋدە. وسى باعىتتا جىل سايىن 20 شاقىرىم جىلۋمەن جابدىقتاۋ، 80 شاقىرىم ەلەكترمەن جابدىقتاۋ، 15 شاقىرىم سۋمەن جابدىقتاۋ، 20 شاقىرىم گازبەن جابدىقتاۋ جەلىلەرى رەكونسترۋكسيالانادى جانە جوندەلەدى.
قالا باسشىسى ەربولات دوسايەۆ باس تىرەگەن قالانىڭ تىنىس-تىرشىلىگىن قامتاماسىز ەتەتىن ماڭىزدى نىسانداردىڭ ءبىرى جەو-2 بولدى. جىلىتۋ ماۋسىمى قارساڭىندا كاسىپورىندا ەنەرگەتيكالىق گەنەراسيالاۋ جابدىعىنا جوندەۋ جۇرگىزىلۋدە.
نىسانداردى ارالاعاننان كەيىن الماتى اكىمى كوشپەلى كەڭەس وتكىزىپ، ونىڭ بارىسىندا تۇرعىن ۇيلەردىڭ، دەنساۋلىق ساقتاۋ جانە ءبىلىم بەرۋ نىساندارىنىڭ جىلىتۋ ماۋسىمىنا دايىندىعى، سونداي-اق تۇتىنۋشىلاردىڭ كوممۋنالدىق كاسىپورىندار الدىنداعى دەبيتورلىق قارىزىن باعالاۋ تۋرالى ەسەپتەردى تىڭدادى. قازىرگى ۋاقىتتا الماتىدا كوممۋنالدىق قىزمەتتەر ءۇشىن قارىز سوماسى 3،2 ملرد تەڭگەنى قۇرايدى. نەگىزگى بورىشكەرلەر جەكە تۇلعالار بولىپ تابىلادى.
جالپى، الداعى جىلىتۋ ماۋسىمىنا دايىندىق بەلگىلەنگەن كەستەگە سايكەس جۇرگىزىلۋدە. الماتى اكىمى ەربولات دوسايەۆ بۇل جۇمىسقا تۇراقتى باقىلاۋدى قامتاماسىز ەتۋ جانە ءبىرىنشى كەزەكتە 31 تامىزعا دەيىنگى مەرزىمدە الەۋمەتتىك نىسانداردى قىسقا دايىنداۋدى اياقتاۋ قاجەتتىگىن اتاپ ءوتتى.