بۋرابايدا ءوتىپ جاتقان ۇلتتىق قۇرىلتايدا مەملەكەت باسشىسى قاسىم-جومارت توقايەۆ ەلىمىزدەگى ءدىني احۋالعا قاتىستى ءوز پىكىرىن ءبىلدىرىپ، بۇل ماسەلەگە كوڭىل بولىنەتىنىن ايتتى.
«ءماجىلىس دەپۋتاتى ەرمۇرات باپي ەلىمىزدەگى ءدىني احۋالعا الاڭداۋشىلىق ءبىلدىرىپ ءجۇر. قۇرىلتاي مۇشەلەرى دانيا قىدىربايەۆا جانە ولجاس سۇلەيمەن جات ءدىني اعىمداردىڭ جاستار اراسىندا، اسىرەسە سپورت سالاسىندا ىقپالى كۇشەيىپ بارا جاتقانىن ايتتى»، – دەپ اتاپ ءوتتى پرەزيدەنت.
قاسىم-جومارت توقايەۆ ەلىمىزدە تەرىس ءدىني اعىمدارعا، قازاقتىڭ بولمىسىنا جات يدەولوگيالارعا توسقاۋىل قويۋ قاجەتتىگىنە ەش كۇمان جوق ەكەنىن ايتتى.
«تەرىس اعىمدارعا، قازاقتىڭ بولمىسىنا جات يدەولوگيالارعا توسقاۋىل قويۋ قاجەت ەكەنىنە ەش كۇمان جوق»، – دەدى مەملەكەت باسشىسى.
پرەزيدەنت قازاقستاندا ءدىن بوستاندىعىنا كەپىلدىك بەرىلگەنىن، الايدا جۇگەنسىزدىككە جانە تارتىپسىزدىككە جول بەرىلمەيتىنىن قاداپ ايتتى.
«ءدىننىڭ اسا ماڭىزدى ميسسياسى – ۇلتتى ۇيىستىرۋ. ءدىني ۇيىمداردىڭ قىزمەتىن رەتتەيتىن قۇجاتتار وسى تالاپقا ساي بولۋعا ءتيىس»، – دەپ تولىقتىردى ول.
قاسىم-جومارت توقايەۆ بۇل ماسەلەنى جان-جاقتى قاراۋ كەرەكتىگىن اتاپ ءوتىپ، زاڭنامانى جاڭا جاعدايعا بەيىمدەۋدىڭ ماڭىزدىلىعىنا توقتالدى.