پاريج وليمپياداسىندا چەمپيون اتانعان ەلدوس سمەتوۆ جۋرناليست دينارا ءساتجانعا بەرگەن سۇحباتىندا العان سىيلىقتارىن كىمگە ۇلەستىرگەنىن ايتتى، دەپ حابارلايدى aqshamnews.kz.
مىسالى، اقتوبەلىك تانىمال كاسىپكەر ءانۋار ماحانوۆ ەلدوسقا 100 جىلقى تارتۋ ەتكەن.
«100 جىلقىنى تۋعان ەكىنشى اعام بار، سوعان بەرەتىن بولدىم»، – دەيدى وليمپيادا چەمپيونى.
ال جامبىل وبلىسىنىڭ اكىمدىگى مەن جەرگىلىكتى دەمەۋشىلەر بىرىگىپ Lexus LX 600 كولىگىن مىنگىزگەن.
«ول كولىك ءقازىر ۇيدە. مەن ونى اكەمە سىيلادىم»، – دەيدى سپورتشى.
سونداي-اق سوڭعى جىلدارى سمەتوۆتى قولداپ جۇرگەن Forbes تىزىمىندەگى بيزنەسمەن جۇمابەك جانىقۇلوۆ Mersedes كولىگىن بەرگەن.
«بۇل كولىكتى ءوزىم جۇرگىزەمىن. ءنومىرى مەنىڭ ونەر كورسەتكەن سالماعىما لايىقتالعان (060)، – دەيدى چەمپيون.
پاريج وليمپياداسىنىڭ جەڭىمپازى جامبىل وبلىسىنىڭ تۇرار رىسقۇلوۆ اۋدانىندا تۋعان. جەرلەستەرى دە وعان Haval 6 كولىگىن مىنگىزگەن.
«بۇل كولىكتى مەنى بەس جاسىمنان باستاپ تاربيەلەگەن، سپورتقا ماحابباتىمدى وياتقان احمەت جۇماعاليعا سىيلادىم. ول كىسىنىڭ جاسى ءقازىر -74-تە»، – دەيدى ەلدوس سمەتوۆ.
سونداي-اق جامبىل وبلىسىنىڭ اكىمدىگى دەمەۋشىلەرمەن بىرلەسىپ، بەس بولمەلى پاتەر سىيلاعان. ول وزىندە قالدى. ال دەمەۋشىلەر بەرگەن ەكى بولمەلى پاتەرىن جەكە باپكەرى عالىمجان جىلگەلدييەۆكە تارتۋ ەتكەن.
جامبىل وبلىسىنىڭ دزيۋدو فەدەراسياسىنىڭ پرەزيدەنتى ارىستاننىڭ تەرىسىن بەرگەن، ونى سپورتشى دوسىنا سىيلاپتى.