الماتىدا باستاپقى مەديسينالىق-سانيتارلىق كومەك كورسەتەتىن ەمحانالار اراسىندا بايقاۋ جاريالاندى. «بمسك كوشباسشىسى» بايقاۋىن مەديسينالىق ساقتاندىرۋ قورىنىڭ وڭتۇستىك استانالىق فيليالى ۇيىمداستىرىپ وتىر.
حابارلاماعا سۇيەنسەك، بۇگىن باستالعان بايقاۋ جەلتوقساننىڭ 15-ىندە ءوز مارەسىنە جەتەدى. وعان قورمەن جۇمىس ىستەيتىن 76 الماتىلىق ەمحانا تۇگەلگە دەرلىك قاتىسۋى ءتيىس.
«بمسك كوشباسشىسى» - قوردىڭ جاڭا باستامالارىنىڭ ءبىرى. ول پاسيەنت قامىن جەيتىن، حالىق دەنساۋلىعىن ساقتاۋعا بارىن سالاتىن ۇزدىك ەمحانالاردى انىقتاپ، مەديسينالىق كومەك ساپاسىن جاقسارتا تۇسۋگە ىقپال ەتەدى دەپ سەنەمىن. سەبەبى قاي-قايسىمىز دا باس اۋىرىپ، بالتىر سىزداي قالسا ەمحاناعا قارالامىز»، - دەدى الماتى فيليالىنىڭ ديرەكتورى ءىلياس مۇحامەدجان.
ۇزدىك ەمحانا ءمامس جۇيەسىندە ساقتاندىرىلعان ازاماتتاردىڭ ۇلەس سالماعى، ارىز-شاعىم سانى، اقپاراتتاندىرۋ جۇمىستارىنىڭ جۇرگىزىلۋ دەڭگەيى مەن ديسپانسەرلىك ەسەپتە تۇرعان ناۋقاستاردىڭ شۇعىل تۇردە اۋرۋحاناعا ءتۇسۋ فاكتىلەرى سىندى تالاپتار نەگىزىندە انىقتالماق.
بايقاۋ جەڭىمپازدارى باعالى سىيلىقتارمەن ماراپاتتالادى.