ەرەكشە كورمە
قازاقستان رەسپۋبليكاسىنىڭ تۇڭعىش پرەزيدەنتى - ەلباسى كىتاپحاناسىندا «ۇماي بەسىك جىرى» كورمەسى اشىلدى، دەپ حابارلايدى Almaty-akshamy.kz.
ءبىر قولىمەن بەسىكتى، ءبىر قولىمەن الەمدى تەربەتكەن انا. انانىڭ قۋانىشى - بالا باقىتى. مۇنىڭ ءبارى قازاقستاندىق قىلقالام شەبەرىنىڭ تۋىندىلارىندا كورىنىس تاپقان.
انا تاقىرىبى شابىتىنىڭ قاينار كوزىنە اينالعان سۋرەتشى دينارا قادىروۆانىڭ جەكە كورمەسى ەلباسى كىتاپحاناسىندا قانات جايدى.
ول ايەل مەن بالا قورعانى ۇماي اناعا ارنالعان. كورمە «ۇماي بەسىك جىرى» دەپ اتالادى. بۇل ەڭبەكتەر قازاق حالقىنىڭ ءداستۇرلى مادەنيەتىنەن سىر شەرتەدى.
سونداي-اق، بۇل جاس بەينەلەۋ ونەرى شەبەرىنىڭ العاشقى جەكە كورمەسى.
«مەن انا بولعان ساتتەن اۆتورلىق تۋىندىلارىمدى جاساي باستادىم. بۇعان دەيىن ارنايى ءبىلىم الىپ، كەيىن ديزاين سالاسىندا جۇمىس ىستەدىم. ءبىراق مەنى ءبىرىنشى كەزەكتە كەسكىندەمەمەن اۋەستەنۋگە شابىتتاندىرعان انالىق سەزىم بولدى. سەبەبى مەن قۋاتتاندىم، ءومىرىم ماحابباتقا تولدى، ريزاشىلىق پايدا بولدى، ومىرگە باسقا كوزبەن قاراي باستادىم»، - دەدى سۋرەتشى دينارا قادىروۆا.
ق ر تۇڭعىش پرەزيدەنتى – ەلباسى كىتاپحاناسى ديرەكتورىنىڭ ورىنباسارى كۇلاش اقتايەۆا كورمەگە قاتىستى پىكىر ءبىلدىردى.
«بۇگىنگى «ۇماي بەسىك جىرى» اتتى كورمە - جاس بولعانىمەن، وتە دارىندى سۋرەتشى دينارا قادىروۆانىڭ كوپ جىلعى ىزدەنىسىنىڭ ناتيجەسى. دينارا قادىروۆا ەلىمىزدىڭ دارىندى بالالارىنىڭ قاتارىندا تۇڭعىش پرەديدەنت – ەلباسى نۇرسۇلتان نازاربايەۆپەن كەزدەسكەن. وسى ۋاقىتقا دەيىن كوپتەگەن بايقاۋلاردىڭ لاۋرەاتى اتانىپ، ءبىرقاتار سىيلىقتاردى يەلەنىپ ۇلگەردى. دەگەنمەن ءومىرىن بالا تاربيەسىنە ارناپ انا بولۋدى ماقسات تۇتتى. مىنە، بۇگىن ءۇش بالانىڭ اناسى العاشقى كورمەسىن اشتى»، - دەدى ول.