4 قازان – قازاقستان قارۋلى كۇشتەرىنىڭ زىمىران اسكەرلەرى مەن ارتيللەريا كۇنى.
قورعانىس ءمينيسترىنىڭ ديرەكتيۆاسىمەن 2000 جىلدىڭ ءدال وسى كۇنى زىمىران اسكەرلەرى مەن ارتيللەريا قولباسشىلىعىنىڭ باسقارماسى قۇرىلعان بولاتىن، دەپ حابارلايدى Almaty-akshamy.kz.
زىمىران اسكەرلەرى مەن ارتيللەريا قۇرلىق اسكەرلەرىنىڭ قۇرامىنا كىرەدى. قارۋلى كۇشتەردىڭ دامۋ كەزەڭىندە اسكەرلەر قولباسشىلىعىنىڭ باسقارماسى، قۇرالىمدار مەن بولىمدەردىڭ قۇرىلىمى ۇنەمى جەتىلدىرىلىپ كەلەدى.
ارتيللەريا مەن زىمىران بولىمشەلەرى بارلىق جالپى اسكەري، ونىڭ ىشىندە حالىقارالىق دەڭگەيدەگى وقۋ-جاتتىعۋلارعا ۇزدىكسىز قاتىسادى. اسكەري قىزمەتشىلەر ارميالىق حالىقارالىق ويىندارى اياسىندا وتكەن «ارتيللەريادان وق اتۋ شەبەرلەرى» كونكۋرسىندا تابىستى ونەر كورسەتىپ، ەلىمىزدىڭ ارتيللەريستەرى جاتتىعۋدىڭ جوعارى دەڭگەيىن كورسەتە وتىرىپ، جەڭىس تۇعىرىنان كورىنىپ كەلەدى.
اتالعان اسكەرلەر تۇرلەرىنىڭ كادر وفيسەرلەرىن قۇرلىق اسكەرلەرىنىڭ اسكەري ينستيتۋتى مەن تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتى، سونىمەن قاتار سانكت-پەتەربۋرگتاعى ميحايلوۆسك اسكەري ارتيللەريالىق اكادەمياسى دايارلايدى. ودان بولەك، الماتى جانە قاراعاندى پوليتەحنيكالىق ۋنيۆەرسيتەتتەرىنىڭ اسكەري كافەدرالارىن بىتىرگەن تۇلەكتەر جىل سايىن اسكەري-وقىتىلعان رەزەرۆ قاتارىن تولىقتىرۋدا.
زىمىران اسكەرلەرى مەن ارتيللەريانىڭ اسكەري بولىمدەرى مەن بولىمشەلەرى كەز-كەلگەن ۇرىس جاعدايىندا جاۋدى اتىسپەن جەڭۋدىڭ ءتيىمدى قۇرالى بولىپ تابىلاتىن زىمىراندىق جانە ارتيللەريالىق جۇيەلەردىڭ بارلىق قاجەتتى تۇرلەرىمەن جابدىقتالعان.
قارۋ-جاراق پەن اسكەري تەحنيكانىڭ قولدا بار ۇلگىلەرىن جاڭعىرتۋ جانە جاڭا ۇلگىلەرىن ساتىپ الۋ جوسپارلى تۇردە جۇزەگە اسىرىلۋدا. اتاپ ايتقاندا، اسكەرلەردى ارتيللەريالىق وپتيكالىق جانە راديولوكاسيالىق بارلاۋ قۇرالدارىمەن قايتا جاراقتاندىرۋعا، ارتيللەريانىڭ اتىسىن توپوگەودەزيالىق، مەتەورولوگيالىق جانە بالليستيكالىق قامتاماسىز ەتۋگە ەرەكشە نازار اۋدارىلادى. جاڭا وپتيكالىق-ەلەكتروندىق بارلاۋ جۇيەلەرىن، مەتەورولوگيالىق، بالليستيكالىق جانە توپوگەودەزيالىق كەشەندەردى ەنگىزۋ جالعاسۋدا. ارتيللەريادان وق اتۋدى باسقارۋدىڭ اۆتوماتتاندىرىلعان جۇيەسىن قالىپتاستىرۋ جۇمىسى بەلسەندى جۇرگىزىلۋدە.