دۇنيەجۇزىلىك تۋريستىك ۇيىمنىڭ مالىمەتىنشە، جىل سايىن ەكوتۋريستەر كوبەيىپ كەلەدى.
قازاقستاندا دا جاز ماۋسىمىندا تابيعات اياسىندا تىنىعۋشىلار ارتقان، دەپ حابارلايدى Almaty-akshamy.kz.
قازاقستان ۇلتتىق ارنا تىلشىلەرى وڭىرلەردەگى تۇرعىندار پىكىرىن بىلگەن ەكەن. كوپشىلىگىن دەمالىس ورىندارىندا ادامداردىڭ قوقىستارىن تازالاماي كەتەتىنى قىنجىلتادى ەكەن.
«تالىم-تاربيەمىز كىشكەنە از بولعاننان با، قوقىستاردى كوپ كورەسىڭ. كەي كەزدە بولادى، بالا-شاعامەن بارىپ، سوڭىنان جيناپ جۇرەسىڭ. قازاقستانىمىز - ءۇيىمىز عوي بۇل. ءوزىمىزدىڭ وتانىمىزدى سىرتتان كەپ بىرەۋ تازالاپ بەرمەيدى.
ءبارىن ايتپايمىن ولاي، ءبىراق بولىپ تۇرادى، ونداي جاعدايلار. قوقىس شاشىپ كەتەدى، بىردەڭە توگىپ كەتەدى. سونداي تۇرعىندارعا كىشكەنە باقىلاۋ جاساسا، ايىپپۇل سالسا، مادەنيەت قالىپتاسادى دەپ ويلايمىن.
مىسالى، دەمالىس ورىندارىنا بارعاندا ادامداردىڭ كەيبىرى ىشىمدىك ىشەدى، بوتەلكەلەر سىنادى، شىنى قىزىپ ءورت، ءارتۇرلى جاعدايلار تۋىندايدى. ەندى بارلىعى ەمەس، 100 پايىز دەپ ايتپايمىن، ءبىر 30 پايىز شىعار. ءاربىر ادام ءوزىنىڭ دەمالعان جەرىن جيناپ، رەتتەپ كەتۋ كەرەك»، - دەيدى پىكىر بىلدىرگەندەر.