قازاقستاندىقتار جىلىنا ورتاشا ەسەپپەن 4 كەلىدەي بالىق جەيدى.
دۇنيەجۇزىلىك دەنساۋلىق ساقتاۋ ۇيىمىنىڭ تالابى بويىنشا ءبىر ادام تۇتىناتىن بالىق مولشەرى 16 كەلى بولۋعا ءتيىس، دەپ حابارلايدى aqshamnews.kz.
24.kz ارناسىنىڭ اقپاراتىنا ساي، ەلىمىزدەگى بالىق شارۋاشىلىعىنىڭ الەۋەتىنە قاراماستان، كورشى قىرعىزستان مەن وزبەكستانداعى بالىق تۇتىنۋ كورسەتكىشى بىزدەن جوعارى.
وسى ولقىلىقتىڭ ورنىن تولتىرۋ ءۇشىن 2021 جىلى «بالىق شارۋاشىلىعىن دامىتۋ» باعدارلاماسى قابىلدانعان ەدى. الايدا قوردالانعان ماسەلەسى كوپ سالانى ىلگەرىلەتۋ ءۇشىن ءالى دە ءبىرقاتار زاڭنامالىق تۇيتكىلدى شەشۋ قاجەت. ءقازىر ماجىلىستە «اكۆاوسىرۋ» تۋرالى ارنايى زاڭ جوباسى قارالىپ جاتىر.
قازاقستان جىلىنا 25 مىڭ توننا بالىق ەكسپورتتايدى. ال ەلىمىزگە سىرتتان اكەلىنەتىنى بۇدان ەكى ەسە كوپ – 50 مىڭ توننا. وسىعان قاراماستان، ءار ادامنىڭ جىلدىق تۇتىنۋ كورسەتكىشى الەمدىك ستاندارتتان 4 ەسە از.
سەرگەي پونوماريەۆ، ق ر پارلامەنتى ءماجىلىسىنىڭ دەپۋتاتى:
- ءىرى ينۆەستورلارعا كاسپيي تەڭىزىندەگى اۋقىمدى ۋچاسكەلەردى ەشبىر بايقاۋسىز بەرۋدى ۇسىنىپ وتىرمىز. مۇنداعى تالاپ – ينۆەستيسيا كولەمى 500 ملن تەڭگەدەن اسۋ كەرەك. ال دايىن شارۋاشىلىقتى كەڭەيتۋگە، جوندەۋگە بۇدان كەم مولشەردە قارجى قۇيۋعا بولادى. سونىمەن قاتار سۋ قويمالارىن جالعا بەرۋ مەرزىمىن ۇزارتۋدى ۇسىنىپ وتىرمىز. بۇعان دەيىن 5 جىلدان 25 جىلعا دەيىن بەرىلسە، ەندى 10-نان 49 جىلعا دەيىن ۇزارتۋدى ۇسىنامىز.
«ال كولدەردى جالعا الۋىن الىپ، 5 جىل بويى بالىق شارۋاشىلىعىن وربىتپەگەن سۋبەكتىلەردى اكۆاوسىرۋ جوباسىنا جولاتپايمىز»، - دەيدى دەپۋتات. ايتا كەتەرلىگى، «بالىق شارۋاشىلىعىن دامىتۋ» باعدارلاماسى ىسكە قوسىلعالى ءۇش جىلدا مۇنداي شارۋاشىلىق سانى 180-نەن 500-گە دەيىن كوبەيدى. دەمەك، بيزنەس تاراپىنان قىزىعۋشىلىق بار. دەگەنمەن، زاڭنامالىق تۇرعىدان رەتتەلۋگە ءتيىس ماسەلە دە جەتىپ ارتىلادى. مىسالى، پايىزدىق مولشەرلەمەسى تومەن نەسيە جوقتىڭ قاسى. جاڭا جوبادا بالىق شاباقتارى مەن جەمىنە ارنايى جەڭىلدىك پەن سۋ باعاسىن ارزانداتۋعا باعىتتالعان سۋبسيديا قاراستىرىلىپ وتىر. «شارۋانى دوڭگەلەتۋگە كەدەرگى كەلتىرەر تاعى ءبىر ماسەلە بار – ول سۋ كودەكسىنە ەنگىزىلگەلى جاتقان وزگەرىستەر»، - دەيدى بالىق شارۋاشىلىعىنىڭ باسشىسى مارلەن ءتۇرسىنالى.
مارلەن ءتۇرسىنالى، بالىق شارۋاشىلىعىنىڭ باسشىسى:
قازىرگى ۇسىنىپ وتىرعان كودەكستە ءبىرقاتار بالىق شارۋاشىلىعىن دامىتۋعا كەدەرگى كەلتىرەتىن جاعدايلار كودەكستە كورسەتىلدى. ءبىز ونى اشىق ايتىپ جاتىرمىز. ەگەر سۋ كودەكسى ءبىزدىڭ بالىق شارۋاشىلىعى ايتقان دۇنيەنى ەسكەرىلمەي قابىلدانىپ كەتكەن جاعدايدا بولسا، وندا قازىرگى مىنا بالىق شارۋاشىلىعى دامىمايدى دەگەن ويدامىز.
قۇزىرلى ۆەدومستۆو بۇل ماسەلەدەن حاباردار. ماجىلىستەگى جۇمىس توبى شارۋاشىلىقتاردىڭ مۇددەسى مىندەتتى تۇردە ەسكەرىلەتىنىن ايتادى. اسىرەسە، قۇرعاقشىلىق كەزىندە ولاردىڭ جۇمىسىن جۇيەلى جولعا قويۋ قاجەت-اق.
الماس اسىلبەكوۆ، ق ر اشم بالىق شارۋاشىلىعى كوميتەتى ءتوراعاسىنىڭ ورىنباسارى:
بالىق ءوسىرۋ سۋبەكتىلەرى ءۇشىن سۋ قورعاۋ بەلدەۋلەرىن پايدالانۋ ماسەلەسى تۋىنداپ وتىر. بۇل جەردە بالىق ءوسىرۋ توعاندارىن، باسسەيندەرىن سالۋ، ودان كەيىن بالىق ءوسىرۋ وبەكتىلەرىن قۇرۋ بويىنشا ماسەلەلەر... سول ماسەلەلەردى جەتىلدىرۋ بويىنشا سۋ كودەكسىنە ءبىرقاتار وزگەرىستەر ۇسىنىلىپ وتىر.
بالىق شارۋاشىلىعىن كەشەندى دامىتۋدا عىلىمنىڭ ماڭىزى زور. «اكۆاوسىرۋ» تۋرالى جاڭا زاڭ جوباسى عىلىمي نەگىز قۇرۋدى مىندەتتەيدى. سونداي-اق ارنايى اقپاراتتىق جۇيە ءتۇزۋ كوزدەلگەن. جوبانىڭ ماجىلىستەگى ءبىرىنشى وقىلىمى قاراشانىڭ 20-سىنا، بۇگىنگى كۇنگە بەلگىلەنگەن.