بىلتىر الماتىعا 1 800 000 تۋريست كەلگەن
وسىدان ءبىرسىپىرا ۋاقىت بۇرىن مەملەكەت باسشىسى شەتەلدىك ينۆەستورلاردى تارتۋ ارقىلى تۋريستىك ينفراقۇرىلىمدى دامىتۋعا قاجەتتى جاعداي جاساۋ ماڭىزدىلىعىن اتاپ ايتقان. بۇل شارۋا ەلىمىزدىڭ بۇكىل تىرشىلىگىنە قان جۇگىرتىپ، ەكونوميكاسىن ورگە باستىرۋ ءۇشىن قاجەتتىلىكتەن تۋىنداپ وتىر. باستاما بىلتىر شاھار باسشىسى مەن بيزنەس قاۋىمداستىقتىڭ كەزدەسۋىنەن باستالعان بولاتىن. الماتى قالاسىنىڭ اكىمى ەربولات دوسايەۆ پەن «اتامەكەن» ۇكپ باسقارما ءتوراعاسى رايىمبەك باتالوۆتىڭ كەزدەسۋىندە تۋريزم جونىندەگى كەڭەس قۇرۋ قۋاتتالعان-تىن.
شاھارداعى «اتامەكەن» ۇقپ باسپا ءسوز قىزمەتى حابارلاعانداي، تاياۋدا وتكەن اتالمىش كەڭەستىڭ ءبىرىنشى وتىرىسىندا، تۋريستىك سالالاردىڭ، الماتى قالاسى مەن وبلىسى جانە جەتىسۋ وبلىستارى مەملەكەتتىك ورگان وكىلدەرىنىڭ باسقوسۋىندا جان-جاقتى تالقىلانىپ، مامىلەگە كەلگەن. الماتى قالالىق ۇكپ ءتوراعاسى اۋەز تايىمبەتوۆتىڭ ايتۋىنشا، وڭىرلەردىڭ تۋريستىك سالالارىندا تۋىنداعان ءبىرقاتار ماسەلەلەر ۇكىمەتتىك دەڭگەيدە عانا شەشىمىن تابادى. مىنە، وسى ماسەلەلەر ەندى شەشىمىن تاۋىپ كەلە جاتقانداي.
«ءبىزدىڭ باستامانى مەملەكەتتىك ورگاندار، ۇلتتىق پارك جەتەكشىلەرى مەن ءۇش ءوڭىر قاۋىمداستىعى قولداپ وتىرعانى قۋانتادى»، – دەيدى ءا.تايىمبەتوۆ.
قالالىق ۇكپ ءتوراعاسى الماتى اگلومەراسياسىن وبلىستىڭ بەس ءوڭىرى – ەڭبەكشىقازاق، جامبىل، ىلە، قاراساي مەن تالعار اۋداندارى، سونداي-اق قاپشاعاي قالاسىنىڭ اۋماقتىق بولىگى مەن بولاشاقتىڭ قالاسى Gate City (G4 city) قۇرايتىنىن ەسكە سالادى. بۇل توڭىرەك – 1،5 ساعاتتىق كولىكپەن جەتۋگە بولاتىن جەر، ءارى 110 شاقىرىمنان اسپايتىن ماگيسترالدىق جول قاتىناسىنىڭ ماڭى نەمەسە الماتىدان 75 شاقىرىمعا دەيىنگى وزگە اۋماقتار.
وسى كەزگى اتالعان مەملەكەتتىك ءتىزىلىم (رەەستر) مالىمەتىنە سۇيەنسەك، ەلىمىزدە جۇمىس ىستەۋگە رۇقساتى بار 380 تۋروپەراتور بار. ولاردىڭ ىشىندەگى 34 تۋروپەراتور عانا ەلىمىزدەن سىرتقا شىعىپ جۇمىس ىستەيدى، قالعانى ىشكى جانە سىرتتان كەلگەن تۋريستەرگە قىزمەت كورسەتۋدى جۇزەگە اسىرادى. بۇرىنىراقتا مەملەكەتتىك تىزىلىمدە قاعاز بەن ەلەكتروندىق فورماتتاعى 1240 تۋروپەراتور ساناتتا تۇردى. سولاردىڭ كوبى قىزمەتىن توقتاتسا دا، تىزىلىمدە قالا بەرگەن. بۇگىنگى زاڭدىلىققا سايكەس كەلمەيتىن قۇجاتتىق ارەكەت ليسەنزيا يەلەرىنىڭ، سونداي-اق جەرگىلىكتى اتقارۋ ورگانداردىڭ ارالاسۋىمەن توقتاتىلدى.
پالاتا ءتوراعالارىنىڭ مالىمدەۋىنشە، بىلتىر الماتىعا 1 800 000 تۋريست كەلگەن. بۇل الدىڭعى جىلمەن سالىستىرعاندا، 48%-عا ارتقاندىقتى بىلدىرەدى. سونىڭ ىشىندە، شەتەلدىكتەر – 417 353 كىسى (بۇل 2،5% ارتقان). كورسەتىلگەن قىزمەت كولەمى ورنالاستىرىلۋىنا وراي، 56،1 ملرد تەڭگە قۇراعان.
قازاقستان تۋريستىك قاۋىمداستىعىنىڭ ءتورايىمى راشيدا شايكەنوۆا تۋريزم باعىتى ءار الۋان، سولاردىڭ ءاربىرىن بولەك قاراستىرۋ قاجەت دەپ مالىمدەدى. «تۋريزم سەگمەنتى وتە كوپ. بۇل سالاداعى ماسەلە مەن پروبلەما بىر-بىرىنەن وزگەشەلەۋ. ماسەلەن، قوعامدىق تاماقتاندىرۋ، ەكولوگيالىق تۋريزم، ۇلتتىق پاركپەن جۇمىس دەگەندەي... سوندىقتان كەڭەس كەزىندە كوميتەتتەرمەن دۇرىس شەشىم قابىلداپ، جۇمىستى ءبولىسىپ اتقارۋعا بولادى. مۇنىڭ ءوزى ىشكى ماسەلەلەردى شەشۋگە، وزەكتى ماسەلەلەردى انىقتاۋعا مۇمكىندىك بەرەدى»، – دەيدى ر.شايكەنوۆا.
جيىنعا قاتىسۋشىلار سوزىنە سۇيەنسەك، سالاداعى بەلسەندىلەردىڭ باسىم بولىگى الماتى قالاسىندا ەكەن. ال ولاردىڭ قىزمەتى جاڭا وڭىرلەرمەن تىعىز ءوزارا قارىم-قاتىناستا ىسكە اسادى. Kaz Aipine Ciub قاۋىمداستىعىنىڭ ءتوراعاسى تالعات دۇيسەنعالييەۆ قاتىسۋشىلارعا قاۋىمداستىق مۇشەلەرىنىڭ جوباسىن جۇزەگە اسىرۋ ءۇشىن ءبىرقاتار ناقتى ۇسىنىستار بارىن جايىپ سالدى. كلۋب اتىنان سويلەگەن ول كەڭەس قۇرامىنا كاسىبي الپينيستەر، جوو تۋريزم كافەدراسى عالىمدارى، تۋريزم سالاسى ارداگەرلەرى مەن ەكوتۋريزم وكىلدەرى كانديداتۋرالارىن قوسۋدى ۇسىندى.
تاقىرىپقا وراي
قاراكوز سۇلەيمەنوۆا، ءانشى، تەلەجۇرگىزۋشى: تۋريزمنەن تۇسكەن تابىس – 16 ميلليون دوللار
وسى كۇنى قازاق-قىتاي اراسىنداعى ءبىر ايلىق ۆيزاسىز قارىم-قاتىناستىڭ تۋريزمگە ەلەۋلى ىقپال ەتىپ وتىرعانىن ايتپاي كەتۋگە بولماس. بازبىرەۋلەر مۇنى تۇسىنگىسى كەلمەي، بايبالامعا باسىپ ءجۇر. مۇنداي بارىس-كەلىستىڭ ەلىمىزگە پايداسى بولماسا، زالالى تيمەيدى. ۆيزاسىز ءتارتىپ باستالعالى بەرى ەلگە اعىلعان جۇڭگو تۋريستەرى مەملەكەت بيۋدجەتىنە ايتارلىقتاي قاراجات ءتۇسىرىپتى. ماسەلەن، بيىلعى تەك قانا ءۇش ايدىڭ وزىندە، ياعني قاڭتار-ناۋرىز ايلارى ارالىعىندا قازاقستاندا قىتايدان كەلگەن 8 مىڭنان استام تۋريست تىركەلىپتى. ال بىلتىر ەلىمىزگە كەلگەن قىتايلىق تۋريستەردەن تۇسكەن تابىس 16 ملن دوللارعا جەتكەن.
اسىعات الەۋمەت، قالا تۇرعىنى: ەكوتۋريزمنىڭ ۇلەسى مول
الەمنىڭ تالاي جەرىن ارالاسام دا، الماتىداي تاۋ باۋرايىندا سامالمەن جەلپىنگەن، كوركەم قالانى كورگەم جوق. تاۋ ەتەگىندەگى قالالار كوپ بولدى. ءبىراق الاتاۋى اسقاقتاعان، مەدەۋىمەن، شىمبۇلاعىمەن مارتەبەلى ەلدىمەكەندى تورتكىل دۇنيەدەن تاپپادىم.
بۇل مەنىڭ ءبىر كەزدەرى اڭقىعان الماسى بال شىرىندى قالاعا دەگەن ماحابباتىم بولار، بالكىم. زامانىندا سالماعى 1 كەلىگە جۋىقتاعان، برەند سانالعان اپورتىمەن ءمالىم بولعان الماتىنى تۋريزممەن تانىمال ەتۋ – ءبىزدىڭ بورىشىمىز. ال بۇل شاھاردى تانىمال ەتۋدە ەكوتۋريزمنىڭ سۇبەلى ۇلەس قوسارى ءسوزسىز.