147 مىڭ ادام شىعىپ كەتتى.
ق ر ىشكى ىستەر ءمينيسترى مارات احمەتجانوۆ ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا قازاقستاندى پانالاپ جاتقان رەسەيلىكتەر تۋرالى سوڭعى ستاتيستيكانى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«21 قىركۇيەكتەن باستاپ قازاقستانعا نەشە رەسەيلىك كەلىپ، نەشە رەسەيلىك شىعىپ كەتتى؟»، - دەپ سۇرادى ب ا ق وكىلى.
ءمينيستردىڭ ايتۋىنشا، كەشەدەن بەرى رەسەيدەن قازاقستانعا قاراي اعىلعان ءنوپىر باسەڭسىپ، قالىپتى دەڭگەيگە تۇسكەن.
«بۇل ماسەلە باقىلاۋدا. رەسەيدىڭ 200 مىڭنان استام ازاماتى كىردى. ءبىراق بۇگىنگى تاڭدا 147 مىڭى شىعىپ كەتتى. ارينە، ءىشىنارا موبيليزاسيا جاريالانعان كەزدەردە ۇلكەن كەپتەلىستەر بولدى. كەشەدەن باستاپ بۇرىنعى قالپىنا كەلىپ وتىر. مىسالى، كەشەگى كۇندى الاتىن بولساق، رەسەيدىڭ 7 مىڭنان استام ازاماتى مەملەكەتىمىزگە كىردى، 11 مىڭعا جۋىعى شىعىپ كەتتى. سوندىقتان ءقازىر كەلگەندەر شىعىپ جاتىر. ميگراسيالىق احۋال باقىلاۋدا. جان-جاقتى قاراپ جاتىرمىز»، - دەدى مارات احمەتجانوۆ.
سونداي-اق ول ەكى اراداعى شەكارالىق قاتىناستار ەكونوميكالىق وداق اياسىندا رەتتەلەتىنىن ەسكە سالدى.
«ەكى تاراپتان دا شەكارادان ءوتۋشى ازاماتتارعا شەكتەۋ جوق، بولمايدى دا. ويتكەنى ەۋرازيالىق ەكونوميكالىق وداق اياسىندا قۇقىقتىق شارتىمىز بار. قۇقىقتىق مەملەكەت بولعاندىقتان، بۇكىل ءىس-قيمىلدى وسى زاڭ شەڭبەرىندە جاسايمىز»، - دەدى ءىىم باسشىسى.