الماتىلىق دارىگەرلەر ءومىر بويى ءتۋابىتتى جامباس كەمىستىگىنىڭ زاردابىن تارتىپ كەلگەن جاس كەلىنشەككە بىرەگەي وتا جاسادى.
الماتىداعى №7 قالالىق كلينيكالىق اۋرۋحانانىڭ دارىگەرلەرى جامباستىڭ ءتۋابىتتى اقاۋىنىڭ سالدارىنان مۇگەدەك اتانعان 28 جاستاعى كەلىنشەككە كۇردەلى وتا جاساپ، ونىڭ كوپ جىلدار بويى جانىن اۋىرتقان اۋرۋدان ارىلۋىنا مۇمكىندىك بەردى، دەپ حابارلايدى اۋرۋحانانىڭ باسپا ءسوز قىزمەتى.
ناۋقاس ءتۋابىتتى ديسپلازيا، جامباس بۋىنىنىڭ دامىماۋى جانە جامباستىڭ جوعارعى جاعىنىڭ شىعىپ كەتۋى سياقتى دياگنوزدارمەن ءومىر سۇرگەن. وسى كەمىستىكتەردىڭ ناتيجەسىندە ونىڭ ءبىر اياعى ەكىنشىسىنەن 10 سم قىسقا بولىپ، ءومىر بويى اياعىن سىلتىپ باسقان. سوڭعى جىلدارى ناۋقاستىڭ تىزە بۋىندارى، جىلىنشىگى اۋىرىپ، اياقتارى قوزعالۋ قابىلەتىن جوعالتا باستاعان. سونىمەن قاتار، جامباسى قيسايىپ، بەلىندە اۋىرسىنۋ پايدا بولعان.
جەتىنشى اۋرۋحانانىڭ تراۆماتولوگ-ورتوپەد دارىگەرلەرى كونسيليۋم وتكىزىپ، وتا جاساۋ تۋرالى شەشىم قابىلدادى.
«ءبىز سۇيەك ءوسىن رەتتەۋ ءۇشىن وستەوتوميا ءادىسىن قولداندىق. پاسيەنتتىڭ اياعىن سوزىپ، زاماناۋي شەتەلدىك ەندوپروتەز ورناتىلدى. 28 جىل بويى وسى كەمىستىكپەن ءومىر سۇرگەن ناۋقاس وپەراسيادان كەيىنگى ەكىنشى كۇنى-اق اياعىنا تۇرىپ، ارنايى قۇرىلعىنىڭ كومەگىمەن جۇرە باستادى. پاسيەنتتەردىڭ ومىرگە قۇلشىنىسى ارتىپ، كوڭىل-كۇيى جاقسارعانىن كورۋ ءبىز ءۇشىن ۇلكەن قۋانىش»، - دەدى پوليجاراقات بولىمشەسىنىڭ مەڭگەرۋشىسى رامازان اسكەروۆ.
دارىگەردىڭ ايتۋىنشا، بۇل وتە كۇردەلى وپەراسيا بولدى. وپەراسيا بارىسىندا بۋىن مەن جۇيكە جۇيەسىنىڭ زاقىمدانۋ ءقاۋپى بولعان، سونداي-اق اياقتى سوزۋ كەزىندە قۇيىمشاق نەرۆتەرىنىڭ قىسىلۋ جانە بۋىنداردىڭ ءۇزىلۋ ءقاۋپى دە تۋىنداعان. مۇنداي جوعارى دالدىكتى تالاپ ەتەتىن كۇردەلى حيرۋرگيالىق وپەراسيالار سيرەك جاسالادى، دەيدى مامان.
بارلىعى 5 ساعاتقا سوزىلعان بىرەگەي وتا مىندەتتى الەۋمەتتىك مەديسينالىق ساقتاندىرۋ (ءمامس) جۇيەسى ارقىلى جاسالدى.