10 تامىزدا الماتىدا وتەتىن الەمدىك پوپ-ديۆا دجەننيفەر لوپەستىڭ كونسەرتى تەك مۋزىكا سۇيەر قاۋىم ءۇشىن عانا ەمەس، قالا مادەنيەتى مەن قوعامدىق ءتارتىپتى ساقتاۋ تۇرعىسىنان دا ماڭىزدى شارا بولماق. ۇيىمداستىرۋشىلار مەن قالا اكىمدىگى كونسەرتكە كەلەتىن ءاربىر كورەرمەندى تازالىق ساقتاۋعا جانە قالامىزعا قۇرمەتپەن قاراۋعا شاقىرىپ وتىر.
كونسەرت وتەتىن ورتالىق ستاديون اۋماعىندا سانيتارلىق جاعدايعا ەرەكشە نازار اۋدارىلعان. ءىس-شارا الدىندا «تازا قازاقستان» اكسياسى اياسىندا اۋماق تولىق تازارتىلىپ، قوقىس جاشىكتەرى مەن ارنايى قالدىق جينالاتىن ورىندار كوبەيتىلدى. شارا بارىسىندا دا ەرىكتىلەر تازالىقتى قاداعالاپ، قوناقتارعا قاجەت بولعان جاعدايدا باعىت-باعدار بەرەدى.
ۇيىمداستىرۋشىلاردىڭ ايتۋىنشا، كورەرمەندەردىڭ مادەنيەتى – الماتىنىڭ حالىقارالىق ءيميدجىنىڭ ءبىر بولىگى.
«الەمدىك جۇلدىزدىڭ كونسەرتىنە كەلگەن ءار ادام ءوزىنىڭ تارتىبىمەن جانە قورشاعان ورتاعا دەگەن جاۋاپكەرشىلىگىمەن ەرەكشەلەنۋى كەرەك»، – دەيدى ولار.
كورەرمەندەرگە قوقىستى ارنايى جاشىكتەرگە تاستاۋ، قوعامدىق مۇلىككە زيان كەلتىرمەۋ، جاسىل جەلەكتەردى قورعاۋ سىندى قاراپايىم، ءبىراق ماڭىزدى ەرەجەلەر ەسكەرتىلدى. بۇل قادامدار ۇلكەن ءىس-شارالار كەزىندە قالانىڭ تازالىعىن ساقتاپ، تۇرعىندار مەن قوناقتار ءۇشىن جايلى ورتا قالىپتاستىرۋعا كومەكتەسەدى.
مادەنيەتتى كورەرمەن – ەستەقالارلىق مەرەكەنىڭ اجىراماس بولىگى. سوندىقتان دجەننيفەر لوپەس شوۋى تەك جارقىن ونەرىمەن عانا ەمەس، قالاعا دەگەن قۇرمەت پەن ەكولوگيالىق جاۋاپكەرشىلىك ۇلگىسىمەن دە ەستە قالۋى ءتيىس.