الماتى اكىمى دارحان ساتىبالدى اۋدان اكىمدىگى، ءتيىستى باسقارمالار، كوممۋنالدىق قىزمەت پەن باعىنىستى ۇيىمدار وكىلدەرىنىڭ قاتىسۋىمەن اۋەزوۆ اۋدانىندا كەڭەس وتكىزدى، دەپ حابارلايدى Aqshamnews.kz.
نەگىزگى ماسەلەلەردىڭ ءبىرى «سايران» اۆتوۆوكزالى مەن «Car City» ساۋدا ورتالىعى ماڭىنداعى جاعداي. مۇندا جەكەمەنشىك تاكسيلەردىڭ تۇراقتى جينالۋى تۇرعىنداردىڭ نارازىلىعىن تۋعىزىپ، شۋ، سانيتارلىق تالاپتاردىڭ ساقتالماۋى جانە كەشكى مەزگىلدە قاۋىپسىزدىكتىڭ تومەندەۋى سىندى ماسەلەلەرگە سەبەپ بولىپ وتىر.
دارحان ساتىبالدى اۋداندىق پوليسيا باسقارماسىنا پاترۋلدەۋ جۇمىسىن كۇشەيتىپ، اتالعان نىسانداردىڭ ماڭىنداعى ءتارتىپتى رەتتەۋدى تاپسىردى.
اۋەزوۆ – الماتىداعى حالىق ەڭ تىعىز قونىستانعان اۋدانداردىڭ ءبىرى، مۇنداعى تۇرعىن ۇيلەردىڭ كوپشىلىگى كەڭەس داۋىرىندە سالىنعان. 2025 جىلى مۇندا 37 كوپقاباتتى ءۇيدىڭ قاسبەتى كۇردەلى جوندەۋدەن وتپەك.
الماتى اكىمىنىڭ ايتۋىنشا، جۇمىستاردى جۇرگىزۋ كەزىندە ءبىرىڭعاي ساۋلەتتىك ستاندارتتى ساقتاۋ ماڭىزدى، بۇل قالانىڭ ۇيلەسىمدى كەلبەتىن قالىپتاستىرۋعا ىقپال ەتەدى.
«بۇكىل قالاعا قولدانۋعا بولاتىن شەشىم قابىلداۋىمىز قاجەت. ءقازىر الماتىنىڭ سەگىز اۋدانىندا اكىمدەر جوبالاردى ءوز بەتىنشە جۇزەگە اسىرىپ جاتىر. بىزگە ءبىرىڭعاي ءتاسىل كەرەك»، – دەدى دارحان ساتىبالدى.
سونداي-اق، اۋەزوۆ اۋدانىندا قوعامدىق كەڭىستىكتەردى دامىتۋ مىندەتى تۇر. باستاپقىدا بۇل اۋدان «تۇرعىن» رەتىندە جوبالانعاندىقتان، ۋاقىت وتە كەلە مۇندا ساياباق پەن سكۆەرلەر تاپشىلىعى تۋىندادى. بۇگىندە ءبىر عانا جەكەمەنشىك ساياباق جۇمىس ىستەيدى. ءتيىستى باسقارمالارمەن بىرلەسىپ، ساياباقتار مەن جاسىل جەلەكتەردى كوبەيتۋ جوبالارى قاراستىرىلۋدا.
ينجەنەرلىك ينفراقۇرىلىم قۇرىلىسى، تاراتۋ جىلۋ جەلىلەرىن قايتا جاڭعىرتۋ، سىرتقى جارىقتاندىرۋ جەلىلەرىن جاڭارتۋ جالعاسىپ، كوپتەپ اعاش وتىرعىزۋ مەن اۋلالار كەشەندى اباتتاندىرۋ جۇمىستارى قولعا الىنعان.
«اۋداندى دامىتۋ كەرەك. جۇزەگە اسقان جوبانى تۇرعىندار ونى كورىپ، باعالاۋعا ءتيىس. جۇرگىزىلگەن جۇمىستاردىڭ ناتيجەسى كەمىندە 15 جىل ساقتالىپ، بۇل مەرزىم ىشىندە قايتا جوندەۋ قاجەتتىلىگى تۋماۋى كەرەك»، – دەدى دارحان ساتىبالدى.
كەڭەس اياسىندا الماتى اكىمى اۋەزوۆ اۋدانى تۇرعىندارىن جەكە قابىلدادى. مەملەكەتتىك باعدارلاما اياسىندا شاتىرلاردى كۇردەلى جوندەۋ، مەملەكەتتىك جالدامالى تۇرعىن ءۇي بەرۋ، سونداي-اق، ينكليۋزيا، جۇمىسپەن قامتۋ، حالىقتىڭ الەۋمەتتىك وسال توپتارىن قولداۋ جانە اتاۋلى الەۋمەتتىك كومەك الۋ ماسەلەلەرى تالقىلاندى. تۇرعىندارعا تۇسىنىكتەمە بەرىلىپ، ءاربىر ءوتىنىش بويىنشا ناقتى ءىس-شارالار مەن ورىنداۋ مەرزىمى بەلگىلەندى.