الماتى وبلىسىنىڭ ءدىني ماسەلەلەردى زەرتتەۋ ورتالىعى تەرروريزمگە قارسى ءىس-قيمىل تاسىلدەرى تۋرالى اسكەري قىزمەتشىلەردىڭ حاباردارلىعىن ارتتىرۋ ماقساتىندا پروفيلاكتيكالىق ءىس-شارا ۇيىمداستىردى، - دەپ حابارلايدى malim.kz ءتىلشىسى.
شارا بارىسىندا اسكەري قىزمەتشىلەردىڭ قۇقىقتىق ساۋاتتىلىعىن ارتتىرۋ مەن ەكسترەميستىك ۇيىمدارعا تارتىلۋدىڭ الدىن الۋعا باعىتتالعان سىني ويلاۋ قابىلەتىن دامىتۋ ماسەلەلەرىنە باسا نازار اۋدارىلدى.
كەزدەسۋگە «ق ر ۇۇ 3660» اسكەري ءبولىمىنىڭ مەرزىمدى قىزمەتتەگى ساربازدارى قاتىستى. نەگىزگى سپيكەر – ءدىنتانۋشى، ءاقپاراتتىق-تۇسىندىرۋ توبىنىڭ مۇشەسى ءۋالي قايسار ەرجان ۇلى بولدى. ول راديكالدى يدەولوگيانىڭ بەلگىلەرى تۋرالى جان-جاقتى ءتۇسىندىرىپ، ەكسترەميستىك ۇيىمدار قولداناتىن مانيپۋلياسيالىق تاسىلدەردى انىقتاۋ جولدارىمەن ءبولىستى.
اڭگىمە بارىسىندا قاۋىپ-قاتەرلەر تۋرالى عانا ەمەس، ولاردان قالاي ساقتانۋعا بولاتىنى جونىندە ناقتى تاسىلدەر دە ايتىلدى. مىسالى، ءدىني اعارتۋشىلىق پەن يدەولوگيالىق ىقپالدىڭ ايىرماشىلىعىن اجىراتۋ جولدارى تالقىلاندى.
ءىس-شارا سوڭىندا قاتىسۋشىلار مۇنداي باستامالار اسكەري قىزمەتشىلەردىڭ راديكالدى يدەولوگيا مەن دەسترۋكتيۆ اسەرلەرگە قارسى تۇرۋ قابىلەتىن ارتتىرۋعا كومەكتەسەتىنىنە سەنىم ءبىلدىردى.