بۇل كاسىبي مەرەكەنى 2007 جىلى قاراشادا كۆەبەك قالاسىندا وتكەن باس اسسامبلەيادا حالىقارالىق ارحيۆ كەڭەسى (International Council on Archives، ICA) رەسمي تۇردە بەكىتتى.
مەرەكەنىڭ داتاسى كەزدەيسوق تاڭدالماعان. ءدال وسى كۇنى 1948 جىلى يۋنەسكو-نىڭ قولداۋىمەن حالىقارالىق ارحيۆ كەڭەسى قۇرىلدى. بۇل ۇيىمنىڭ قۇرىلعان كۇنىنە وراي حالىقارالىق ارحيۆ كۇنى بەكىتىلدى. ال 2008 جىلى العاش رەت مەرەكە تويلانعان كەزدە حاك-تىڭ قۇرىلعانىنا 60 جىل تولدى، دەپ حابارلايدى aqshamnews.kz.
ەلىمىزدە قۇجاتتاردى ساقتايتىن 236 مەملەكەتتىك ارحيۆ بار. سونىڭ ىشىندە 5 رەسپۋبليكالىق، 5 ارناۋلى، 1 پرەزيدەنت ءارحيۆى جانە 225ء-ى وبلىستىق، قالالىق، اۋداندىق ارحيۆتەر جۇمىس ىستەيدى.
رەسپۋبليكا بويىنشا ارحيۆ قىزمەتكەرلەرىنىڭ سانى – 3 مىڭنان استام. ەلىمىزدەگى بارلىق ارحيۆتەر قازاقستان رەسپۋبليكاسىنىڭ 1998 جىلعى 22 جەلتوقسانداعى «ۇلتتىق ارحيۆ قورى جانە ارحيۆتەر تۋرالى» زاڭىنا ساي قىزمەت اتقارادى. ارحيۆ قورى جىل سايىن ورتا ەسەپپەن 16 مىڭنان استام ۇيىمنان 300-400 مىڭ ىسپەن تولىقتىرىلادى.
قازىرگى تاڭدا ق ر ۇلتتىق ارحيۆ قورىندا 27.5 ملن-نان استام قۇجات ساقتالادى. ارحيۆ حالىقتىڭ دەرەكتى جادىنىڭ ساقتاۋشىسى رەتىندە ەلدىڭ زياتكەرلىك مەنشىگى مەن مادەني يگىلىگىنىڭ تۇتاستىعىمەن ساقتالۋىن قامتاماسىز ەتەدى.