الماتى كوشەلەرىمەن وتكەن «كوش. ناۋرىز –دۋمان» مەرەكەلىك كەرۋەنى «استان» الاڭىنا جەتىپ، مەرەكەلىك شارا ودان ارمەن جالعاسۋدا. «استانا» الاڭىندا وتكەن ناۋرىز مەرەكەسىنە كەلۋشىلەردىڭ الدىمەن قاۋىپسىزدىگى ساقتالعان. ءتارتىپ ساقشىلارى تاراپىنان قاۋىپسىزدىك شارالارى ويداعىداي ويلاستىرىپتى.
مەرەكەلىك شاراعا جيىلعان قالا تۇرعىندارى مەن قوناقتارىن مەملەكەت باسشىسى قاسىم-جومارت توقايەۆ ءاز ناۋرىز مەيرامىمەن قۇتتىقتادى.
ناۋرىزناما ءىس-شارالارى اياسىندا نەگىزگى كونسەرتتىك باعدارلامادا وتاندىق ءداستۇرلى، سونداي-اق ەسترادا انشىلەرى كوكتەمدى بەينەلەپ، ناۋرىزدى ناقىشتاعان ءان-جىردان شاشۋ شاشتى. ءان شىرقاعاندار اراسىندا الەمگە ايگىلى ءانشى ديماش قۇدايبەرگەن دە بولدى.
جيىلعان جۇرتشىلىق تەاترلاندىرىلعان كەرۋەنمەن ءجۇرىپ وتكەن بي، باتىر، اڭشى، بۇرەىتشى، ءانشى، سال-سەرىلەردى سومداعان قىز-جىگىتتەرمەن سۋرەتكە ءتۇسىپ، مارە-سارە بولىپ جاتىر. قىزىققان جۇرت بۇركىتشى، اڭشىلاردىڭ قىراندارىمەن، تازى يتتەرىمەن سۋرەتكە تۇسۋدە.
مەيماندار اقشاڭقان كيىز ۇيلەرگە باس سۇعىپ، قازاقتىڭ ۇلتتىق تاعامدارى -- قازى-قارتا، جال-جايادان اۋىز ءتيىپ، قىمىز-شۇباتتان ءدام تاتۋدا، ءشاي ءىشىپ تاڭداي جىبىتۋدە.
كەرۋەنگە 1000-نان اسا قىز-بوزبالا، جىگىت-جەلەڭ باتىردىڭ، بۇركىتشى مەن اقىن رەتىندە قاتىسقانىن اتاپ وتكەن ءجون. وبرازداردى بەينەلەگەن ونەرپازدار ىشىندە اق جاۋلىقتى انالارىمىز دا، ەلۋدى ەڭسەرىپ، الپىستى القىمداعان جىگىت اعالارى دا ءجۇردى.
قالا تۇرعىندارى مەن قوناقتارى دوڭگەلەكتى كيىز ۇيلەر، قالىڭدىق كۇيمەسى، جىبەك، كىلەم، قامقا سىندى ماتالار ارتقان تۇيەلەردى، قازاق حالقىنىڭ جەتى قازىناسىنىڭ نىشاندارىن كورىپ، تاڭعالعانى راس. دۋمانداتىپ قول سوققانى دا سودان بولار.
«كوش. ناۋرىز – دۋمان» مەرەكەلىك كەرۋەنى كوڭىلدى دۋمانعا ۇلاسۋدا. كونسەرت جۇرگىزۋشىلەر دە جيىلعان جۇرتتىڭ ىشىنەن جاستاردى اڭگىمەگە تارتىپ، قازاقتىڭ سالت-داستۇرىنەن تارتاتىن ىرىم-جورالعىلاردى سۇراپ، مەرەكەلىك كوڭىل-كۇيدى كوتەرۋگە تىرىسۋدا. ناۋرىز-دۋمان كوتەرىڭكى كۇيدە جالعاسۋدا. كوڭىلدى كونسەرت كەزىندە كوكتەن نۇر جاۋىپ تۇردى. مۇنى دا جاقسى ىرىمعا بالادىق.