ءاز ناۋرىز – جاڭارۋ مەن جاڭعىرۋدىڭ سيمۆولى

ارداقتى اعايىن!

ۇلىستىڭ ۇلى كۇنى – ناۋرىز مەيرامى قۇتتى بولسىن! بۇل – ءبىزدىڭ اتا ءداستۇرىمىز. بۇگىن بارشامىز ءبىر ەل، ءبىر حالىق بولىپ ءتول جاڭا جىلىمىزدى قارسى الىپ جاتىرمىز.

ءاز ناۋرىز – جاڭارۋ مەن جاڭعىرۋدىڭ سيمۆولى. بابالارىمىز ەجەلگى زاماننان بەرى ۇلىس كۇنىن جىل باسى رەتىندە اتاپ وتكەن. ءقازىر ءاز ناۋرىز كۇللى حالىققا ورتاق جالپىۇلتتىق مەرەكەگە اينالدى. ونى ۇلتىنا، دىنىنە قاراماستان بارشا جۇرتىمىز ەرەكشە كۇتەدى، بىرگە اتاپ وتەدى.

دانا حالقىمىز «جاقسى ءسوز – جارىم ىرىس» دەپ بەكەر ايتپاعان. جاڭا جىلدى جاقسى نيەتپەن، پايدالى ىسپەن باستاۋ – تالايدان قالىپتاسقان ءداستۇر. بۇل كۇنى قوناقجاي جۇرتىمىز اق داستارقان جايىپ، بىر-بىرىنە اقجارما تىلەكتەرىن ايتادى. بۇلاقتىڭ كوزىن اشىپ، تال ەگەدى، تازالىققا باسا ءمان بەرەدى.

ناۋرىز مەرەكەسىندە حالقىمىزدىڭ اسىل قاسيەتتەرى مەن قۇندىلىقتارى تۇگەل كورىنىس تاپقان. بيىل ۇلىستىڭ ۇلى كۇنى رامازان ايىمەن تۇسپا-تۇس كەلىپ وتىر. قازاق جەرىندەگى ءدىن مەن ءداستۇردىڭ ۇيلەسىمى ءدال وسى كەزدە ايقىن كورىنەدى.

بيىلدان باستاپ ناۋرىز مەيرامى، ياعني ناۋرىزناما 10 كۇنگە جالعاسادى. بۇگىن ەلىمىز «ىنتىماق» كۇنىن اتاپ ءوتىپ جاتىر.

بىرلىك پەن ىنتىماق – ەلىمىزدىڭ باستى قۇندىلىقتارىنىڭ ءبىرى. ءبىز جاناشىرلىق، تىلەۋلەستىك سياقتى اسىل قاسيەتتەردى دارىپتەۋىمىز كەرەك. ەلىمىزدىڭ بىرلىگى مەن تاتۋلىعى ءاردايىم بەكەم بولسا، ەلدىگىمىزدىڭ تۇعىرى ماڭگى بولادى. مەن بۇعان كامىل سەنەمىن.

ءقادىرلى قاۋىم!

ەلىمىزدىڭ الدىندا بيىك ماقسات تۇر. بۇل – ادىلەتتى قازاقستاندى قۇرۋ. ءبىز ادال ەڭبەك ەتىپ، ادال تابىسقا جەتە الاتىن ءادىل قوعام ورناتۋىمىز كەرەك. مۇنداي قوعامدى ادال ازاماتتار قالىپتاستىرادى. ءبىر سوزبەن ايتساق، ادىلدىك پەن ادالدىق – ءاردايىم قاتار جۇرەتىن ەگىز ۇعىم. سوندىقتان ءبىز قۇرىپ جاتقان قوعامدا بارشاعا بىردەي مۇمكىندىك بەرىلەدى. ادىلەتتى مەملەكەت – بۇل زاڭ مەن ءتارتىپ ۇستەمدىگى. وزىق مەملەكەت بولۋ ءۇشىن ءبارىمىز تەك جارقىن بولاشاققا سەنىممەن قاراۋىمىز كەرەك. ءبىزدىڭ ءۇمىتىمىز – جاستار. قازاقستاننىڭ كەلەشەگى سىزدەردىڭ قولدارىڭىزدا. بەلسەندى، ساناسى سەرگەك، ويى ۇشقىر، ادال، كوزى اشىق جاستارعا ءبىز ءاردايىم قولداۋ كورسەتەمىز.

قىمباتتى الماتىلىق اعايىن!

الماتى – ەگەمەندىگىمىزدىڭ التىن بەسىگى. سونىمەن بىرگە ەلىمىزدىڭ رۋحاني، عىلىمي جانە ەكونوميكالىق ورتالىعى. الماتى بۇكىل قازاقستاننىڭ وركەندەۋىنە زور ىقپال ەتەدى. سوندىقتان مەن الماتىنىڭ دامۋىن، قالا تۇرعىندارىنىڭ تىنىس-تىرشىلىگىن ايرىقشا نازاردا ۇستايمىن. اسەم الماتىمىز بولاشاقتا بۇدان دا كوركەيە بەرەتىنىنە سەنەمىن.

بيىل ەلىمىزدە ءتورت اۋقىمدى جوبا قولعا الىناتىن بولدى. مەن بۇل تۋرالى قۇرىلتاي كەزىندە ايتتىم. كوپتەگەن جىلۋ ورتالىعى جانە ينجەنەرلىك جەلىلەر جاڭعىرتىلادى. 12 مىڭ شاقىرىم جول سالىنىپ، جوندەلەدى. 300 مىڭ ادام تابيعي گازدىڭ يگىلىگىن كورە باستايدى.

اۋىل جانە اۋدان تۇرعىندارى ءۇشىن جاڭا تۇرعىن ءۇي باعدارلاماسى ىسكە قوسىلادى. الەۋمەتتىك جاعىنان وسال توپتاعى ازاماتتار ءۇشىن نەسيە ءوسىمى 7 پايىزدان اسپايتىن بولادى. جالعا بەرىلەتىن باسپانا سانى بىرنەشە ەسە كوبەيەدى. مۇنىڭ ءبارى حالىقتىڭ تۇرمىس ساپاسىن جاقسارتۋعا ىقپال ەتەرى ءسوزسىز. ەلگە، حالىققا ارنالعان وسىنداي يگى شارالار مىندەتتى تۇردە جالعاسىن تابادى.

بارشاڭىزدى بۇگىنگى كوكتەم مەرەكەسىمەن تاعى دا شىن جۇرەكتەن قۇتتىقتايمىن!

ۇلىس وڭ بولسىن!

اق مول بولسىن!

ەلىمىز امان، جۇرتىمىز تىنىش بولسىن!