ورتالىق مەملەكەتتىك مۋزەيدە «ناۋرىز ناقىشتارى» اتتى كورمە ءوتتى.
اتالعان شاراعا ەلىمىزدىڭ ءار وڭىرىنەن كەلگەن قولونەرشىلەر قاتىسىپ، وزدەرىنىڭ ەڭبەكتەرىن كورسەتتى، دەپ حابارلايدى Almaty-akshamy.kz.
ولاردىڭ اراسىنان، اشەكەي-بۇيىمدار، ۇيگە ارنالعان تۋىندالار، كەراميكا، مۋزىكالىق اسپاپ جانە ت.ب زاتتاردى كەزدەستىرۋگە بولادى.
قازاق ونەرىنىڭ ءون بويىنداعى ەرەكشەلىكتىڭ ءبارى، ورنەكتەلگەن ويۋدىڭ ءارقايسىسى قازاق دەگەن ۇلى ۇلتتىڭ بار ەكەندىگىن جاھانعا جاريالاپ، الەمگە پاش ەتىپ تانىلاتىنداي تانىمدى ونەر دەسەك ارتىق ايتقاندىق ەمەس. العاشىندا تۇرمىستىق زاتتاردى، كۇندەلىكتى تىرشىلىككە قاجەتتى بۇيىمداردى جاساۋدان باستالعان بەرەكەلى ءىس ۇلتتىق ونەرگە جالعاستى.
ەجەلدەن قالىپتاسىپ، عاسىرلار توعىسىندا جاڭعىرا تۇسكەن كاسىپشىلىكتىڭ كورسەتكىشى جوعارى، تاريحى تىم تەرەڭدە.
سونىمەن قاتار بابادان ميراس بوپ قالعان رۋحاني قۇندىلىقتى سانامەن ءسىڭىرىپ، ونەردى ءوڭ بويىنا دارىتىپ، دارىندىلىعىمەن دارالانعان، ەرەكشە ەپتىلىگىمەن كوزگە تۇسكەن شەبەرلەردىڭ ەل ىشىندە قۇرمەتى ارتىپ، ابىرويى اسقاقتاي تۇسۋدە.
«بيىلعى جىلى ءاز-ناۋرىز مەيرامى پرەزيدەنتىمىزدىڭ تاپسىرماسىمەن ەرەكشە تويلانۋدا. ۇلتتىق مەرەكەمىزدى 10 كۇن بويى تويلاۋ جوسپارلانعان بولاتىن. وسى ورايدا، ءبىزدىڭ ورتالىق مۋزەيدە شەبەرلەر مەر قولونەرلەر كورمەسىن ۇيىمداستىرىپ وتىرمىز. كەز-كەلگەن كەلۋشى قازاقي ناقىشتا جاسالعان زاتتاردى كورىپ، ساتىپ الاتىن مۇمكىندىگى بار. بۇنداي بۇيىمدار، مادەنيەتىمىزدىڭ تاريحىن، بايلىعىن جانە سۇلۋلىعىن كورسەتەدى. باستى ماقسات – حالىق اراسىندا قولونەردى ساقتاپ، كەڭىنەن ناسيحاتتاپ، قولونەرشىلەردى جانە ولاردىڭ بۇيىمدارىن كوپشىلىككە كورسەتۋ. مۇنداي ءىس-شارالار مادەني مۇرانى ساقتاۋعا جانە ءداستۇرلى ونەر مەن قولونەرگە قۇرمەتپەن قاراۋعا ىقپال ەتەدى دەپ ويلايمىن. قولونەردىڭ جان-جاقتى دامىپ كەلە جاتقانىن دا ايتا كەتكەن ءجون. بۇل جەكە تۇلعا ءۇشىن پراكتيكالىق داعدى عانا ەمەس، سونىمەن قاتار رۋحاني بايىتۋ»، - دەدى ق ر ورتالىق مەملەكەتتىك مۋزەيى ىشكى بايلانىس ءبولىمىنىڭ باسشىسى دينارا بولتىرىكوۆا.