الماتى ءماسليحاتىنىڭ دەپۋتاتتارى اراسىندا كىم قانشالىق بەلسەندى؟ بۇل سۇراقتىڭ جاۋابىن ءبىلۋ ءۇشىن الماتى قالاسى ءماسليحاتىنا رەسمي سۇراۋ جولدادىق، - دەپ حابارلايدى aqshamnews.kz ءتىلشىسى.
ساۋالدا جەرگىلىكتى وكىلدى ورگان دەپۋتاتتارىنىڭ جەرگىلىكتى اتقارۋشى ورگاندارعا جولداعان ساۋالدارى بويىنشا 4 سۇراق قويىلدى. ماقساتىمىز ساۋالداردىڭ سانى ارقىلى ءبىرمانداتتى وكرۋگتەر جانە پارتيالار فراكسيالارى بويىنشا سالىستىرىپ، بەلسەندىلىگىن انىقتاۋ بولدى.
ماجوريتارلى سايلاۋ جۇيەسى ءوز جەمىسىن بەرىپ جاتىر
بەرىلگەن جاۋاپتاردى تالداي كەلە، پارتيا فراكسيالارىنا قاراعاندا ءبىرمانداتتى وكرۋگتەر بويىنشا سايلانعان دەپۋتاتتاردىڭ بەلسەندىرەك ەكەنىن بايقادىق. دەمەك، 2023 جىلى سايلاۋعا ەنگىزىلگەن ماجوريتارلى سايلاۋ جۇيەسى ءوز جەمىسىن بەرىپ جاتىر. بۇل پىكىرىمىزگە سىن ايتۋشىلار دا بولۋى مۇمكىن. الايدا دەرەك وسى ويىمىزدى دالەلدەپ تۇر.
بيىل 3 قاڭتار–16 مامىر ارالىعىندا ءماسليحات دەپۋتاتتارى 533 ساۋال جولداعان. ونىڭ 312ء-سى ءبىرمانداتتى وكرۋگتەر بويىنشا سايلانعان دەپۋتاتتارعا تيەسىلى. دەمەك، ساۋالدىڭ جارتىسىنان كوبىن (58،5%) ءوزىن-وزى ۇسىنعاندار جولداعان.
ساۋالدى كوپ جولداعان كىمدەر؟
ءبىرمانداتتى دەپۋتاتتاردىڭ ىشىنەن تيمۋر ەلەۋسىزوۆ (42)، التىناي كوبەيەۆا (39) جانە قاراشاش دجۋزەيەۆا (28) ەڭ كوپ ساۋال جولداعان. ال ز.ومىربايەۆا، م.وتەمىسوۆ، ءا.نابييەۆ، ءا.تۇرسىن، ە.ساۋرانبايەۆ، ە.راقىشيەۆ، ب.يبراگيم ۇلى، د.تاستەكەيەۆ، س.كوزلوۆ جانە ق.بەگالين سەكىلدى دەپۋتاتتاردىڭ ءارقايسىسى 4 اي ىشىندە 10-نان از ساۋال جولداعان ەكەن.
تومەندىگى كەستەنى ءماسليحاتتىڭ رەسمي جاۋابىنا سۇيەنە وتىرىپ دايىندادىق. وندا ءبىرمانداتتى وكرۋگتەر بويىنشا سايلانعان دەپۋتاتتاردىڭ وكرۋگتەرى مەن جولداعان ساۋال ساندارى تولىق كورسەتىلگەن.
"AMANAT" كوش باستاپ تۇر، الايدا...
2023 جىلعى سايلاۋ قورىتىندىسى بويىنشا الماتى قالاسى ءماسليحاتىنا 5 ساياسي پارتيا وتكەن. ولار "AMANAT"، "رەسپۋبليكا"، "اق جول"، "بايتاق" جانە قازاقستاننىڭ حالىق پارتياسى (قحپ). دەپۋتاتتىق ساۋالدار سانى بويىنشا "AMANAT" پارتياسى سەنىمدى تۇردە كوش باستاپ تۇر. بيلەۋشى پارتيا دەپۋتاتتارى 422 ساۋال جولداعان.
الايدا بۇل ساننىڭ ىشىندە ءبىرمانداتتى وكرۋگتەر بويىنشا سايلانعان دەپۋتاتتار دا بار. ءوزىن-وزى ۇسىنعان 21 دەپۋتاتتىڭ 14ء-ى "AMANAT" پارتياسىنىڭ مۇشەسى. ولارعا ا.كوبەيەۆا، ج.داستان، ە.باكاراسوۆا، د.رامازانوۆ، گ.بەكەنوۆا، م.زۋلەيەۆ، ب.جۇمابايەۆ، ا.شين، ز.تالعاتوۆ، ز.ومىربايەۆا، ءا.نابييەۆ، ە.ساۋرانبايەۆ، ب.يبراگيم ۇلى جانە س.كوزلوۆ كىرەدى. وسى اتالعان دەپۋتاتتاردىڭ ساۋالدارىن قوساتىن بولساق 217 بولادى. دەمەك، "AMANAT" پارتياسى ءتىزىمى بويىنشا سايلانعاندار 205 دەپۋتاتتىق ساۋال جولداعان. بۇدان 422 ساۋالدىڭ جارتىسىنان كوبىن ءبىرمانداتتى وكرۋگتەن سايلانعان دەپۋتاتتار جولداعانىن كورەمىز.
وسى ورايدا، مىنا ءجايتتى ەسكەرتە كەتكەن ءجون. دۋلات رامازانوۆ 2023 جىلى سايلاۋ الدىندا ءوزىن پارتياسىز ەكەنى تۋرالى اقپارات بەرگەن. ءبىراق ءماسليحات سايتىندا "AMANAT" پارتياسىنىڭ مۇشەسى ەكەنى جازىلعان. سول سياقتى، اندرەي شين سايلاۋ الدىندا وسى پارتيا مۇشەسى ەكەنى تۋرالى اقپارات بەرگەن، الايدا ءقازىر سايتتا قاي پارتيا مۇشەسى ەكەنى جازىلماعان. ال تيمۋر ەلەۋسىزوۆ وسىدان ەكى جىل بۇرىن "بايتاق" پارتياسى مۇشەسى ەكەنى تۋرالى اقپارات بەرگەن. ءبىراق ءقازىر سايتتا پارتياسىز دەپ جازىلعان.
قورىتىندىلاي كەلە، الماتى قالاسى ءماسليحاتى دەپۋتاتتارى ساۋال جولداۋدان بەلسەندى ەكەنىن بايقادىق. قالا بەردى، بارلىق ساۋالعا جەرگىلىكتى اتقارۋشى ورگاندار جاۋاپ بەردى دەلىنگەن رەسمي ءماسليحاتتىڭ جاۋابىندا. سونداي-اق، ءبىرمانداتتى وكرۋگتەن سايلانعان دەپۋتاتتار فراكسيالارعا قاراعاندا بەلسەندى جۇمىس ىستەپ جاتىر.