دەپۋتات ەرمۇرات ءباپي ءماجىلىس وتىرىسىندا ۇلتتىق قارۋ-جاراق مۋزەيىن اشۋدى ۇسىندى، - دەپ حابارلايدى aqshamnews.kz.
دەپۋتاتتىق ساۋالىن ول قورعانىس ءمينيسترى رۋسلان جاقسىلىقوۆقا جولدادى.
"ەلدىڭ تاۋەلسىزدىگىن تانىتاتىن رەسمي رامىزدەر – تۋ، ەلتاڭبا، ەلۇراننان باسقا دا ماڭىزدى قوسىمشا اتريبۋتتار بار. ماسەلەن، ۇلتتىق مۋزەي، ۇلتتىق اكادەميا، ۇلتتىق كىتاپحانا، ۇلتتىق تەاتر، ت.ت. ەلدىڭ بىرەگەيلىگىن جانە جاس ۇرپاقتى پاتريوتتىق پەن اتا-بابالار ەرلىگى رۋحىندا تاربيەلەۋ ماقساتىندا تەڭدەسسىز تانىم ورتالىعى – بۇل ۇلتتىق قارۋ-جاراق مۋزەيى نەمەسە ۇلتتىق قارۋ-جاراق پالاتاسى بولار ەدى"، - دەدى ول.
ول قاي ەلدەردە مۇنداي مۋزەي بارىن ايتتى.
"فرانسيادا ورتا عاسىردان بەرگى اسكەري تاريحتىڭ كۋاسى – پاريج اسكەري مۋزەيى بار. لوندونداعى كورولدىك قارۋ-جاراق پالاتاسى مەن يمپەريالىق اسكەري مۋزەيى بريتاندىق ەلدىك پەن ەرلىكتىڭ ەرەن ۇلگىسىن پاش ەتەدى. سول سياقتى، رەسەيدە كرەملدىڭ قارۋ-جاراق پالاتاسى الەمگە ايگىلى. كورشىلەس وزبەكستاندا ءامىر تەمىر مۇراجايىنىڭ ءبىر بولىگى قارۋ-جاراققا ارنالعان. باكۋدەگى ءازىربايجان كوشپەندىلەر مۋزەيى تۇركى مادەنيەتىنىڭ قارۋ-جاراعىن دارىپتەۋ ورتالىعى سانالادى"، - دەيدى ءباپي.
ونىڭ ايتۋىنشا، تاۋەلسىز قازاقستاندا مۇنداي ۇلتتىق ناقىشتاعى قارۋ-جاراق مۋزەيى اتىمەن جوق.
"وسىنداي سۇراقتاردىڭ نەگىزىندە، سىزدەردەن قازاستاندا ۇلتتىق قارۋ-جاراق مۋزەيىن اشۋ قاجەتتىگى جونىندەگى مۇمكىندىكتەردى باعامداپ، پارلامەنت دەپۋتاتتارىنا تۇجىرىمدى جاۋاپ بەرۋدى سۇرايمىن. بۇل جاۋاپ رەسەيلىك مۋزەيدىڭ فيليالىنا بايلانىستى تۋىنداعان قوعامداعى قاجەتسىز قوزعالىستىڭ بۋىن باسۋعا ىقپال ەتۋى ءتيىس دەپ ەسەپتەيمىن!" - دەيدى ول.