الماتىدا شومىلۋ ماۋسىمى مەن جازعى دەمالىس باستالماي جاتىپ بالالاردىڭ قاۋىپسىزدىگىن قامتاماسىز ەتۋدى كۇشەيتتى، دەپ حابارلايدى aqshamnews.kz.
قالالىق توتەنشە جاعدايلار دەپارتامەنتى ازاماتتىق قورعانىس باسقارماسىنىڭ اعا وفيسەرى ەسبول سۇلتانوۆ الماتى قالاسى وڭىرلىك كوممۋنيكاسيالار قىزمەتىندە وسىلاي دەدى.
توتەنشە جاعدايلار دەپارتامەنتىنىڭ وكىلى اتاپ وتكەندەي، الماتى قالاسى مەن تاۋعا جاقىن اۋدانداردا 44 سۋ ايدىنى بار، ولاردىڭ 9-ى سۋعا تۇسۋگە ءقاۋىپتى.
«وقىس وقيعانىڭ الدىن الاتىن 25 جانە ۇيىمداستىرۋ جاعىن قامتيتىن «مامىر ءقاۋپى» ءىس-شارالار جوسپارى ازىرلەنىپ، ىسكە اسىرىلىپ جاتىر»، – دەدى ەسبول سۇلتانوۆ.
2024 جىلدان باستاپ ءقاۋىپتى سانالاتىن جەتى ۋچاسكەگە ينتەللەكتۋالدى بەينەباقىلاۋ كامەرالارى ورناتىلعان. ولاردىڭ بەينەسى ناقتى ۋاقىتتا قۇتقارۋ قىزمەتتەرىنىڭ كومپيۋتەرى مەن قىزمەتكەرلەردىڭ ءموبيلدى قۇرىلعىلارىنا جىبەرىلەدى. بۇلار سۋداعى ءتارتىپتى بۇزعان جاعدايدا جەدەل ارەكەت ەتۋگە مۇمكىندىك بەرمەك.
سونىمەن قاتار، حالىقارالىق بالالاردى قورعاۋ كۇنى اياسىندا 28 پانفيلوۆشىلار ساياباعىندا «بالا قاۋىپسىزدىگى – باستى ماقساتىمىز» ۇرانىمەن الدىن الۋعا باعىتتالعان اۋقىمدى ءىس-شارا ءوتىپ جاتىر. ونىڭ ماقساتى – بالالارعا كۇندەلىكتى ومىرگە كەرەك ادەپتى نەگىزدەرىن ۇيرەتۋ، ءبىلىم بەرىپ، داعدىسىن قالىپتاستىرۋ، سونداي-اق قۇتقارۋشىلاردىڭ جۇمىسىن، ارناۋلى تەحنيكا مەن جابدىقتاردىڭ مۇمكىندىگىن كورسەتۋ.
جاز باستالعالى بەرى الماتىدا پوليسيا، قۇتقارۋشىلار مەن ەرىكتىلەر رەيد جۇرگىزە باستادى. سۋ ايدىندارىندا ءتارتىپتى بۇزعان 6 ادام جاۋاپقا تارتىلعان. سونىمەن قاتار، بۇقارالىق اقپارات قۇرالدارى، ساۋدا ورتالىقتارى، حقكو، كينوتەاترلار، مەترو مەن ادام كوپ جينالاتىن باسقا جەرلەردە دە اقپاراتتىق-تۇسىندىرمە جۇمىستارى جۇرگىزىلىپ جاتىر.
الماتى تجد قالا تۇرعىندارى مەن قوناقتارىن تىيىم سالىنعان جەردە شومىلماۋعا، ساقتىق شاراسىن ساقتاپ، مىنا ەرەجەنى ەسكەرىپ جۇرۋگە شاقىردى:
بالالاردى سۋدىڭ جانىندا قاراۋسىز قالدىرماۋ؛
جۇزە الماساڭىز بەلدەن جوعارى سۋعا تۇسپەۋ؛
جاعادان الىس كەتپەۋ؛
قايىقتان، كوپىردەن، ايلاقتان سۋعا سەكىرمەۋ؛
تۇندە شومىلماۋ؛
سۋبۇرقاقتاردا دا شومىلۋعا بولمايدى.