وكسفورد ۋنيۆەرسيتەتىنىڭ عالىمدارى جۇرگىزگەن زەرتتەۋ باسقالارمەن بىرگە ءجيى تاماقتاناتىن ادامدار ءوزىن اناعۇرلىم باقىتتى سەزىنەتىنىن جانە ومىرگە ريزا بولاتىنىن كورسەتتى.
زەرتتەۋ بيىلعى باقىت تۋرالى بۇكىلالەمدىك بايانداما ءۇشىن جاسالدى. عالىمدار 142 ەلدەن 150 مىڭ ادامنىڭ مالىمەتىن تالدادى. سونىمەن، داستارقان باسىندا كوپپەن بىرگە اس ءىشۋ ادامعا كەرەمەت يگى اسەر ەتەدى ەكەن. بۇل جاسىنا، جىنىسىنا، ەلىنە قاراماستان بارلىق ادامعا ءتان جاقسى سەزىم. جاقىندارىمەن بىرگە تۇسكى-كەشكى استى بىرگە ىشەتىن ادامدار جالعىز ءوزى تاماقتاناتىن ادامدارعا قاراعاندا ءوز ءومىرىن بىرنەشە باللعا جوعارى باعالاعان. (ساۋالناما بويىنشا 0 – ناشار ءومىر، 10 – كەرەمەت ءومىر).
ءتىپتى ادام جۇمىسسىز بولسا دا، دوستارىمەن كەزدەسىپ، ءبىر شىنىاياق شاي ءىشىپ جۇرسە، ءوزىن جالعىز سەزىنبەيدى دەيدى زەرتتەۋشىلەر. زەرتتەۋگە قاراعاندا، ۇلكەن قالالارداعى جاستاردىڭ كوبى جالعىز تاماقتانادى ەكەن، بۇل ۋربانيزاسياعا، قالاداعى قاربالاس تىرشىلىككە بايلانىستى بولسا كەرەك.
سەگىز جىلدان بەرى باقىتتى ءومىر رەيتينگى بويىنشا فينليانديا ءبىرىنشى ورىندا. حالقىمىز داستارقاندى كيەلى سانايتىنى تەگىن ەمەس.