ەلىمىزدە ءبىرىڭعاي بانكتىك QR-دى ەنگىزۋ 2025 جىلدىڭ ەكىنشى جارتىسىنا جوسپارلانىپ وتىر، دەپ حابارلايدى aqshamnews.kz.
ۇلتتىق تولەم كورپوراسياسىنىڭ حابارلاۋىنشا، بۇل جاڭا سەرۆيستى ەنگىزۋ ءۇشىن بانكتەرگە وزدەرىنىڭ اقپاراتتىق جۇيەلەرىن قايتا ىڭعايلاپ، جەتىلدىرە تۇسۋگە تۋرا كەلەدى. بۇل ۇدەرىس ءبىرشاما ۋاقىت پەن كۇش-جىگەردى قاجەت ەتپەك.
ءبىرىڭعاي QR-دىڭ ەرەكشەلىگى – ونى كەز كەلگەن بانكتىڭ ءموبيلدى قوسىمشاسىمەن وقي بەرۋگە بولادى. ناتيجەسىندە ساتۋشى «قاي بانكتىڭ POS-تەرمينالىن ورناتسام ەكەن» دەپ باس قاتىرمايدى.
بىلتىر قاراشادا ۇلتتىق بانك پەن ۇلتتىق تولەم كورپوراسياسى بانك ارالىق QR-تولەمدەردى ەنگىزۋ بويىنشا قاناتقاقتى جوبانى ىسكە قوسقان بولاتىن.
ءبىرىنشى كەزەڭدە وعان Freedom Bank پەن Bank RBK قوسىلدى. جاقىن ارادا ءبىرىڭعاي QR-عا 7 بانك قوسىلۋعا دايىن دەپ حابارلايدى LS. ولار ءقازىردىڭ وزىندە ءتيىستى كەلىسىمشارت جاساسىپ، ىشكى جۇيەلەرىن تەستىلەۋدەن وتكىزىپ جاتىر.