بۇگىن – «ناۋرىزناما ونكۇندىگى» اياسىنداعى «تازارۋ كۇنى». سونداي-اق، ءار ايدىڭ وسى كۇنىندە ەل كولەمىندە «تازا قازاقستان» ەكولوگيالىق اكسياسىنا باسىمدىق بەرىلىپ كەلەدى. «الماتى – ءبىزدىڭ ورتاق ءۇيىمىز»، «Almaty Clean&Green» – مىنە، بۇنىڭ ءبارى قالامىزدىڭ بەلسەندى جۇزەگە اسىرىپ جاتقان ەكولوگيالىق ناۋقانى.
بۇگىن «Alatau-Aqparat» ۇجىمى ءوز اۋماعىندا سەنبىلىك وتكىزىپ، رەسپۋبليكالىق جانە قالالىق اۋقىمدى ەكو-اكسياعا ءۇن قوستى.
كوپتەن بەرى جالعاسىپ جاتقان ەكولوگيالىق باستامالاردان ۇجىم وكىلدەرى تەرەڭ تانىس. قوس باسىلىم تىلشىلەرى كوپتەگەن ءىس-شارالاردىڭ باسى-قاسىندا بولىپ اقپارات تاراتىپ، يگى باستامالاردىڭ كەڭىرەك ءناسيحاتتالۋىنا كۇش سالىپ كەلەدى. ال بۇگىن تىلشىلەر مەن وزگە دە قىزمەتكەرلەر ۇجىم اۋماعىندا تازالىق جۇمىستارىن جاساپ، «تازارۋ كۇنىنە» ءوز ۇلەستەرىن قوستى.
«قالامىزداعى «الماتى – ءبىزدىڭ ورتاق ءۇيىمىز» ەكولوگيالىق اكسياسى كوپتەن بەرى قىزۋ جالعاسىپ كەلەدى. قالا تۇرعىندارى دا بۇل اكسيادان تولىق حابار تاۋىپ، ءار جەردە قالا تازالىعى ءۇشىن اتسالىسىپ جاتىر. بۇگىن ءبىز ءوز اۋماعىمىزدى قوقىستاردان ارىلتىپ، ءوزىمىز ءناسيحاتتايتىن باستاماعا شىنايى قولداۋ كورسەتىپ جاتىرمىز»، – دەيدى «الماتى اقشام» گازەتىنىڭ ءبولىم رەداكتورى رايا ەسەندىر.
«قالا تازالىعى شاعىن اۋماقتاردىڭ تازالىعىنان باستالادى. ءار مەكەمە، ءار ۇجىم ءوز اۋماعىنىڭ تازالىعىنا، رەتتىلىگىنە، كوگالى مەن كوركىنە جاۋاپكەرشىلىكپەن قاراسا، بۇل تۇتاس قالامىزدىڭ تازا دا جانعا جايلى بولۋىنا اسەر ەتەر ەدى. مۇنداي سەنبىلىكتەر تەك اتاۋلى كۇندە ەمەس، ءاردايىم جەكەلەگەن ۇجىمداردىڭ بەلسەندىلىگىمەن ءوتىپ تۇرسا، وسىنداي تاماشا داعدى قالىپتاستىرساق ءبىزدىڭ ورتاق ءۇيىمىز بولعان الماتى بۇدان دا كوركەيە تۇسەر ەدى»، – دەيدى مەدياحولدينگ قىزمەتكەرى ساعيت قايىرجان ۇلى.
ايتا كەتەيىك، «الماتى – ءبىزدىڭ ورتاق ءۇيىمىز» ەكولوگيالىق ناۋقانى قالامىزدىڭ تازالىعىن، تۇرعىنداردىڭ ورتا قورعاۋ تانىمىن ارتتىرۋ باعىتىندا جۇزەگە اسىپ جاتقان باستاما. بۇل ءار قالا تۇرعىنى اتسالىسا الاتىن ءارى اينالاسىنا ءناسيحاتتاۋعا تۇرارلىق ورتاق ءىس. ۇجىم قىزمەتكەرلەرى بارشا قالا تۇرعىندارىن ەكو-شاراعا اتسالىسىپ، قالامىزدى بىرگە كوركەيتۋگە شاقىرادى.