پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا حالىقتى دارى-دارمەكپەن قامتاماسىز ەتۋ شارالارى قارالدى.
دەنساۋلىق ساقتاۋ ءمينيسترى اقمارال ءالنازاروۆا، «سق-فارماسيا» ج ش س باسقارما ءتوراعاسى ەركەن جاقاتايەۆ، سونداي-اق بەينەكونفەرەنسيا بايلانىسى ارقىلى ءىرى وتاندىق فارماسيەۆتيكا كومپانيالارىنىڭ باسشىلارى: «نوبەل الماتى فارماسيەۆتيكالىق فابريكاسى» اتقارۋشى ديرەكتورى سۆەتلانا كيل، «حيمفارم» كومپانياسىنىڭ مەملەكەتتىك ورگاندارمەن ءوزارا ءىس-قيمىل جونىندەگى ديرەكتورى ايگۇل يسەنوۆا بايانداما جاسادى، دەپ حابارلايدى aqshamnews.kz پرەمەر-مينيستردىڭ رەسمي اقپاراتتىق رەسۋرسىنا سىلتەمە جاساپ.
دەنساۋلىق ساقتاۋ مينيسترلىگىنىڭ مالىمەتىنشە، 2024 جىلى دارى-دارمەك پەن مەديسينالىق ماقساتتاعى بۇيىمداردىڭ 1 588 ءتۇرى ساتىپ الىنعان. امبۋلاتوريالىق دارى-دارمەكپەن قامتاماسىز ەتۋگە 251 ملرد تەڭگە ءبولىندى، بۇل 120 نوزولوگيا بويىنشا قامتۋدى 3،5 ملن ناۋقاسقا دەيىن ارتتىرۋعا مۇمكىندىك بەردى. اقمارال ءالنازاروۆا بۇگىنگى تاڭدا 241 ملرد تەڭگەگە 1213 ستاسيونار دارى-دارمەكپەن قامتاماسىز ەتىلگەنىن اتاپ ءوتتى.
پرەمەر-مينيستر دارى-دارمەكپەن ۇزدىكسىز قامتاماسىز ەتۋدىڭ، سونداي-اق مەديسينالىق مەكەمەلەر ءۇشىن 2025 جىلعا ارنالعان دارى-دارمەكتەر ساتىپ الۋ جانە جەتكىزۋ راسىمدەرىن ۋاقتىلى اياقتاۋدىڭ ماڭىزدى ەكەنىن اتاپ ءوتتى.
«پرەزيدەنت ۇلت دەنساۋلىعىن نىعايتۋ ءۇشىن كەشەندى شارالاردى ىسكە اسىرۋدى تاپسىردى. بۇل ورايدا حالىقتى دارى-دارمەكپەن قامتاماسىز ەتۋ – اسا ماڭىزدى ماسەلە بولىپ وتىر. مەملەكەت مەديسينالىق كومەك كورسەتۋ كەزىندە جانە ەسەپتە تۇرعاندارعا دارىلىك زاتتاردى تەگىن بەرەدى. بۇل ماقساتقا بيىلدىڭ وزىندە بيۋدجەتتەن شامامەن 500 ملرد تەڭگە ءبولىندى. دارى-دارمەكپەن ۇزدىكسىز قامتاماسىز ەتۋ جانە ولاردى الدىن الا ساتىپ الۋ – ەڭ باستى مىندەتتەردىڭ ءبىرى. اۋرۋحانالار مەن ەمحانالار ءۇشىن 2025 جىلعا ارنالعان دارى-دارمەكتەردى ساتىپ الۋ مەن جەتكىزۋ راسىمدەرىنىڭ بارلىعىن وسى جىلدىڭ سوڭىنا دەيىن اياقتاۋ قاجەت. مەديسينالىق مەكەمەلەردە دارى-دارمەك تاپشىلىعى دەگەن مۇلدەم بولماۋى كەرەك»، — دەپ باسا ايتقان ولجاس بەكتەنوۆ، دەنساۋلىق ساقتاۋ ءمينيسترى مەن «سق-فارماسيا» ج ش س باسقارما ءتوراعاسىنىڭ دەربەس جاۋاپكەرشىلىگىن اتاپ ءوتتى.
جالپى، دارى-دارمەك نارىعىن جەكەمەنشىك وندىرۋشىلەر، جەتكىزۋشىلەر جانە ءدارىحانا جەلىلەرى قالىپتاستىرادى. پرەمەر-مينيستر بۇل بيزنەستى مەملەكەت تاراپىنان پرەپاراتتاردىڭ قاۋىپسىزدىگى، ساپاسى جانە ولاردى تىركەۋ تۇرعىسىنان عانا رەتتەلەتىنىنە نازار اۋداردى. ماسەلەن، بيىل دارى-دارمەكتىڭ وندىرۋشىدەن ەمدەلۋشىگە دەيىنگى قوزعالىسىن قاداعالاپ وتىرۋعا مۇمكىندىك بەرەتىن دارىلىك زاتتاردى تاڭبالاۋ مەن قاداعالاۋ ەنگىزىلدى. سونىمەن قاتار تەگىن پرەپاراتتاردىڭ زاڭسىز اينالىمىنا جول بەرمەۋ ءۇشىن اۋرۋحانالار مەن ەمحانالاردا باقىلاۋ تەتىگى قاراستىرىلعان.
وتاندىق فارماسيەۆتيكا ونەركاسىبىن دامىتۋ ماسەلەسىنە ەرەكشە نازار اۋدارىلدى. ۇكىمەت جەرگىلىكتى دارى-دارمەك وندىرۋشىلەردى قولداۋ شارالارىن ىسكە اسىرۋدا، بۇل دارىلىك زاتتار يمپورتىن ازايتۋعا جانە نارىقتاعى باعاسىن تۇراقتاندىرۋعا مۇمكىندىك بەرىپ وتىر. پرەمەر-مينيستر قازاقستاندىق زاۋىتتاردىڭ وندىرىستىك قۋاتىن ەسكەرە وتىرىپ، ولاردا ءونىم شىعارۋ كولەمىن ۇلعايتۋ، ءىرى حالىقارالىق فارماسيەۆتيكالىق كومپانيالار مەن عىلىمي ۇيىمدار اراسىندا ىنتىماقتاستىق قاجەت ەكەنىن باسا ايتتى. دەنساۋلىق ساقتاۋ، عىلىم جانە جوعارى ءبىلىم مينيسترلىكتەرىنىڭ الدىنا فارماسيەۆتيكالىق جاڭا وندىرىستەر اشۋعا جانە جوعارى تەحنولوگيالىق شەشىمدەردى ەنگىزۋ ءۇشىن قولايلى جاعداي جاساۋ مىندەتى قويىلدى.
مەملەكەت باسشىسىنىڭ سيرەك كەزدەسەتىن اۋرۋلارى بار ناۋقاستاردى قىمبات پرەپاراتتارمەن قامتاماسىز ەتۋ جونىندەگى تاپسىرماسىن ورىنداۋ شەڭبەرىندە دەنساۋلىق ساقتاۋ مينيسترلىگىنە «قازاقستان حالقىنا» قورىمەن بىرلەسىپ، ورفاندىق پرەپاراتتاردى ساتىپ الۋدى قارجىلاندىرۋ تىزبەسى مەن كوزدەرىن ايقىنداپ الۋدى تاپسىرىلدى. پرەمەر-مينيستر ەشكىم دە كومەكسىز قالماۋى ءتيىس ەكەنىن باسا ايتتى. بۇل باعىتتاعى جۇمىستى ۇيلەستىرۋدى جاقسارتۋ ماقساتىندا رەسپۋبليكالىق ورفاندىق اۋرۋلار ورتالىعى قۇرىلدى.
پاسيەنتتەرگە دارى-دارمەك بەرۋ پروسەسىن جەڭىلدەتۋ ءۇشىن «الەۋمەتتىك ءاميان» جۇيەسى ارقىلى دارىلىك زاتتارعا ەلەكتروندى ۆاۋچەرلەر الۋ تەتىگىن ىسكە اسىرۋدى جەدەلدەتۋ قاجەتتىگى جەكە اتاپ ءوتىلدى. اتالعان مىندەت دەنساۋلىق ساقتاۋ مينيسترلىگىنىڭ الدىنا قويىلدى. بۇدان باسقا، دارى-دارمەكپەن قامتاماسىز ەتۋ ماسەلەلەرى بويىنشا اقپاراتتىق جۇمىستى كۇشەيتۋ تاپسىرىلدى.
«جۇرتشىلىق كىمگە جانە قانداي دارى-دارمەكتەر تەگىن بەرىلەتىنىن ناقتى ءبىلۋى ءتيىس. مەملەكەت ءوز مىندەتتەمەلەرىن ورىنداپ وتىر»، — دەپ اتاپ ءوتتى ولجاس بەكتەنوۆ.