الماتى اكىمى دارحان ساتىبالدى جۇڭگو حالىق رەسپۋبليكاسىنا جۇمىس ساپارى اياسىندا قىتايدىڭ ەڭ ءىرى كوپسالالى كومپانيالارىنىڭ ءبىرى 1988 جىلى شانحايدا قۇرىلعان «Yuexing Group» كورپوراسياسىنىڭ وندىرىستىك جانە ىسكەرلىك كەشەنىمەن تانىستى.
قىتايدىڭ وزىق جەكەمەنشىك كومپانيالارىنىڭ قاتارىنا كىرەتىن «Yuexing Group» ۇلتتىق نارىقتاعى ەڭ ءىرى قاتىسۋشىلاردىڭ ءبىرى. 35 جىلدان استام ۋاقىت ىشىندە كومپانيا جيھاز ءوندىرىسى، بولشەك ساۋدا، ديەۆەلوپمەنت، قوناق ءۇي بيزنەسى جانە باسقا دا باعىتتاردى بىرىكتىرەتىن ءارتاراپتاندىرىلعان بيزنەس قۇرىلىمىن قالىپتاستىرعان.
كەزدەسۋ بارىسىندا دارحان ساتىبالدى ەكى تاراپ اراسىنداعى ءوزارا ءىس-قيمىلدىڭ زور الەۋەتى بار ەكەنىن اتاپ، كورپوراسيانىڭ الماتىدا اۋقىمدى جوبالاردى جۇزەگە اسىرۋ مۇمكىندىگىن جوعارى باعالادى.
«الماتىدا ءبىز ءوندىرىستى ورنالاستىرۋعا قاجەتتى بارلىق ينفراقۇرىلىمى بار يندۋستريالىق ايماق بار. ءبىزدىڭ شاھار سىزدەردىڭ كومپانيالارىڭىز ءۇشىن ەۋرازيالىق ەكونوميكالىق وداق نارىعىنا شىعا الاتىن قاقپا بولا الادى»، — دەدى الماتى اكىمى.
كەلىسسوز قورىتىندىسى بويىنشا الماتى قالاسى اكىمدىگى مەن «Yuexing Group» كورپوراسياسى قۇرىلىس سالاسىنداعى ىنتىماقتاستىق جونىندەگى الدىن الا كەلىسىمگە قول قويدى.