پرەزيدەنتتىك جاستار كادر رەزەرۆى – ەلىمىزدىڭ وركەندەۋىنە ەلەۋلى ۇلەس قوسام دەگەن جاستارعا باعىتتالعان بىرەگەي جوبا. جوبا اياسىندا كاسىبي دايارلىعى جوعارى، تاجىريبەلى جاستارعا جوعارى اكىمشىلىك جانە ساياسي لاۋازىمدارعا ورنالاسۋ ءۇشىن ەرەكشە مۇمكىندىك بەرىلەدى. ماسەلەن، ءتيىستى لاۋازىمداردا بوس ورىندار پايدا بولعان جاعدايدا پرەزيدەنتتىك جاستار كادر رەزەرۆىندە تۇرعان ازاماتتاردىڭ كانديداتۋرالارىنا باسىمدىق بەرىلەدى.
Aqshamnews.kz ءتىلشىسى پرەزيدەنتتىك جاستار كادر رەزەرۆىنە قاتىستى سوڭعى اقپاراتتى ءبىلۋ ماقساتىندا مەملەكەتتىك قىزمەت ىستەرى اگەنتتىگىنە رەسمي ساۋال جولداعان ەدى. رەداكسيا حاتىنا رەسمي جاۋاپتا بيىلعى ىرىكتەۋ بارىسى، رەزەرۆتىڭ جۇمىس پرينسيپتەرى جانە جوبا ارقىلى ۇسىنىلاتىن مۇمكىندىكتەر تۋرالى كەڭىنەن مالىمەت بەرىلدى.
وسىدان ءبىر اي تۇرىن پرەزيدەنتتىك جاستار كادر رەزەرۆىنىڭ قاتارى جاڭا ۇمىتكەرلەرمەن تولىقتى. بيىلعى ماۋسىم ايىندا باستالعان ىرىكتەۋگە قاتىسۋعا ونلاين-پلاتفورما ارقىلى 97 مىڭنان استام ادام قىزىعۋشىلىق تانىتقان.
اگەنتتىكتىڭ تۇسىندىرۋىنشە، رەزەرۆكە قابىلدانعان تۇلعالار مىندەتتى تۇردە لاۋازىمعا تاعايىندالادى دەگەن تالاپ جوق. رەزەرۆكە ەنگەن ازاماتتار ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسى مەن ونىڭ فيليالدارىندا كاسىبي جانە تۇلعالىق دامۋعا ارنالعان وقىتۋ كۋرستارى مەن ترەنينگتەرگە قاتىسۋ مۇمكىندىگىنە يە بولادى. بۇل ولار ءۇشىن بولاشاقتا جوعارى دەڭگەيلى باسقارۋشىلىق قىزمەتتەرگە دايىندىقتىڭ ماڭىزدى بولىگى بولىپ سانالادى.
پرەزيدەنتتىك جاستار كادر رەزەرۆى – مەملەكەتتىك قىزمەت جۇيەسىندە كاسىبي وسۋگە تەڭ مۇمكىندىكتەر بەرەتىن، تالانتتى ءارى پەرسپەكتيۆالى جاستاردى انىقتاۋدى ماقسات ەتەتىن ستراتەگيالىق جوبا. مەملەكەت باسشىسىنىڭ تاپسىرماسىمەن 2019 جىلى ىسكە قوسىلعان باستاما بۇگىنگە دەيىن ەلىمىزدىڭ كادرلىق الەۋەتىن نىعايتۋعا ەلەۋلى ۇلەس قوسىپ كەلەدى.
بيىلعىمەن قوسقاندا بارلىعى ءتورت كەزەڭ بويىنشا جۇرگىزىلگەن ىرىكتەۋ قورىتىندىسىندا رەزەرۆكە بارلىعى 450 جاس مامان قابىلداندى:
- 2019 جىلى - 300 ادام،
- 2021، 2023 جانە 2025 جىلدارى - 50 ادامنان.
سۋرەت: web.telegram.org/k/#@prokadrykz
قازىرگى تاڭدا العاشقى ءۇش كەزەڭنىڭ 400 رەزەرۆشىسىنىڭ 321ء-ى (80،7%) مەملەكەتتىك ورگاندار مەن ءتۇرلى ۇيىمداردا قىزمەت اتقارۋدا. ولاردىڭ ىشىندە:
- 38 رەزەرۆشى - ساياسي لاۋازىمدارعا،
- 5 ادام - "ا" كورپۋسىنىڭ لاۋازىمدارىنا،
- 3 ادام - ءماجىلىس دەپۋتاتى،
- 1 ادام - ءماسليحات دەپۋتاتى بولىپ تاعايىندالعان.
ولاردىڭ اراسىندا ءبىرقاتارى وسى كۇنى لاۋازىمدى قىزمەتتەردى اتقارىپ ءجۇر:
رىسپەكوۆ د. ا. - ۇلىتاۋ وبلىسىنىڭ اكىمى؛
نۇرپەيىسوۆ ا.ب. - ق ر پرەزيدەنتىنىڭ ءىس باسقارۋشىسى؛
سپوتكاي م.ا. - سەنات اپپاراتىنىڭ جەتەكشىسى؛
بايەل ا.د. - ءازىربايجانداعى توتەنشە جانە وكىلەتتى ەلشى؛
ادامبەكوۆ ت.س.، بايتىلەسوۆ ن.ت.، ءمۇتالى ءا. - پارلامەنت ءماجىلىسىنىڭ دەپۋتاتتارى.
گەندەرلىك قۇرام دا نازاردا: رەزەرۆتەگى 450 ادامنىڭ 15%-ى - ايەلدەر (69 ادام)، 85%-ى - ەرلەر (381 ادام).
پرەزيدەنتتىك جاستار كادر رەزەرۆىنە ىرىكتەۋدەن ءوتۋ كەزەڭدەرى قانداي؟
قازاقستان رەسپۋبليكاسى پرەزيدەنتىنىڭ 2019 جىلعى 27 تامىزداعى №141 جارلىعىمەن بەكىتىلگەن قاعيدالارعا سايكەس، ىرىكتەۋ بىرنەشە كەزەڭنەن تۇرادى:
1. قۇجاتتاردى قابىلداۋ
ۇمىتكەرلەر وتىنىمدەرىن "www.pkrezerv.gov.kz" پلاتفورماسى ارقىلى تاپسىرادى. قاتىسۋ تالاپتارى:
- 35 جاسقا دەيىن؛
- جوعارى ءبىلىم؛
- قازاق ءتىلىن ۆ1 دەڭگەيىنەن تومەن ەمەس مەڭگەرۋ؛
- كەمىندە 5 جىل ەڭبەك ءوتىلى؛
- ق ر ازاماتى بولۋى.
2. ماتىندىك جانە ساندىق اقپاراتپەن جۇمىس ىستەۋ قابىلەتىن باعالاۋ
كانديداتتار ماتىندىك جانە ساندىق اقپاراتتى تالداۋ تەستىلەرىنەن وتەدى.
3. سيتۋاسيالىق تاپسىرمالاردى شەشۋ
مەملەكەتتىك قىزمەتكە ءتان ناقتى جاعدايلاردى مودەلدەۋ ارقىلى باسقارۋشىلىق شەشىم قابىلداۋ قابىلەتى تەكسەرىلەدى.
4. قۇزىرەتتەردى باعالاۋ
ەكى بلوكتان تۇرادى:
"اسسەسسمەنت-ورتالىق" - مىنەز-قۇلىق ينديكاتورلارى ارقىلى كاسىبي قۇزىرەتتەردى انىقتاۋ؛
5. ساراپشىلىق كوميسسيادا اڭگىمەلەسۋ
كانديدات ءوز سالاسىن دامىتۋعا قاتىستى كوزقاراسىن ۇسىنادى.
6. ۇلتتىق كوميسسيادا قاراۋ
ساراپشىلىق كوميسسيا ۇسىنعان كانديداتتاردىڭ فينالدىق شەشىمى قابىلدانادى.
رەزەرۆكە ەنگەندەر ءۇشىن جانداي مۇمكىندىكتەر بار؟
قاعيدالارعا سايكەس، رەزەرۆكە قابىلدانعان كۇننەن باستاپ ءۇش جىل ىشىندە:
- ساياسي لاۋازىمدارعا،
- "ا" كورپۋسىنىڭ،
- "ب" كورپۋسىنىڭ باسشىلىق قىزمەتتەرىنە تاعايىندالۋ مۇمكىندىگى بەرىلەدى.
سونىمەن قاتار، رەزەرۆشىلەر زاماناۋي وقىتۋ باعدارلامالارىنا، باسقارۋشىلىق قۇزىرەتتەردى دامىتۋعا ارنالعان ترەنينگتەرگە قاتىسا الادى.
ولارعا قويىلاتىن نەگىزگى تالاپتار:
-
ستراتەگيالىق ويلاۋ؛
-
باستاماشىلدىق؛
-
جاۋاپكەرشىلىك؛
-
ءتيىمدى شەشىم قابىلداۋ؛
-
ادالدىق، اشىقتىق، ادىلدىك جانە مەملەكەتتىك قىزمەت ەتيكاسىن ساقتاۋ.
ىرىكتەۋ بارلىق وڭىرلەر ءۇشىن بىردەي تالاپتارمەن جۇرگىزىلەدى. ارنايى وڭىرلىك كۆوتا قاراستىرىلماعانىمەن، ۇمىتكەرلەردىڭ ايماقتىق الۋان تۇرلىلىگىن قامتاماسىز ەتۋگە ەرەكشە ءمان بەرىلەدى. اشىق ءارى ءادىل باسەكە ناتيجەسىندە ەلدىڭ بارلىق ايماعىنان جاستار رەزەرۆكە ەنىپ كەلەدى.
پرەزيدەنتتىك جاستار كادر رەزەرۆى ەلىمىزدىڭ باسقارۋ جۇيەسى ءۇشىن جاڭا بۋىن كوشباسشىلارىن قالىپتاستىرۋدىڭ ءتيىمدى مەحانيزمىنە اينالدى. رەزەرۆشىلەردىڭ رەفورمالاردى ىسكە اسىرۋعا بەلسەندى ارالاسۋى، ولاردىڭ جاۋاپتى قىزمەتتەرگە تاعايىندالۋى جوبانىڭ وزەكتىلىگى مەن ناتيجەلىلىگىن كورسەتەدى.
بۇل باستاما:
- مەملەكەتتىك قىزمەتتىڭ تارتىمدىلىعىن ارتتىرادى؛
- جاس مامانداردىڭ الەۋەتىن اشادى؛
- ۇلتتىق كادرلىق ساياساتتى جاڭعىرتادى؛
- ەلىمىزدىڭ دامۋىنا ۇلەس قوساتىن جاڭا كوشباسشىلار بۋىنىن قالىپتاستىرادى.
ءقازىر 2025 جىلعى ىرىكتەۋدىڭ قورىتىندىلارى بويىنشا جۇمىس جۇرگىزىلىپ جاتىر. ناتيجەلەرگە سۇيەنىپ، رەزەرۆ ينستيتۋتىن ودان ءارى جەتىلدىرۋ بويىنشا ءتيىستى شارالار قابىلدانادى.