الماتىدا جىلۋ ماۋسىمىنا دايىندىق اياقتالدى. قالا اكىمدىگىندە وتكەن كەڭەستە ەنەرگەتيكا جانە كوممۋنالدىق كاسىپورىنداردىڭ باسشىلارى اكىم دارحان ساتىبالدىعا بارلىق جىلۋ ماۋسىمىنا قاتىستى تولىق دايىن ەكەنىن باياندادى.
قالانىڭ دايىندىق جۇمىستارى كەزەڭ-كەزەڭىمەن جۇرگىزىلىپ، جىلۋ جەلىلەرى مەن ەلەكترمەن جابدىقتاۋدان باستاپ، سۋمەن قامتاماسىز ەتۋ، گاز جۇيەلەرى جانە الەۋمەتتىك نىسانداردى قامتىدى.
جىلۋ جەلىلەرىنىڭ جاعدايىنا ەرەكشە نازار اۋدارىلدى. «الماتى جىلۋ جەلىلەرى» ج ش س جوندەۋ ناۋقاندارىن جانە ۇزىندىعى 23 كم-دەن استام 51 نىسانداعى قايتا جاڭعىرتۋىن اياقتادى. گيدراۆليكالىق سىناقتار جۇرگىزىلدى، بارلىق وپرەسسوۆكالار ورىندالدى. ناتيجەسىندە كاسىپورىننىڭ دايىندىعى 99%.
سونىمەن قاتار ەلەكتر جۇيەلەرىەن جاڭعىرتۋ جۇمىستارى جاسالدى. «الاتاۋ جارىق كومپانياسى» اق جوسپارلى جوندەۋدىڭ تولىق كولەمىن ورىندادى: 1100 كم-دەن استام ەلەكتر جەلىلەرى، ونداعان قوسالقى ستانسيا مەن ترانسفورماتور دايىندالدى. بۇگىندە قالاداعى ەلەكتر جەلىلەرىنىڭ دايىندىعى 100%.
اۋقىمدى جۇمىس جىلۋ كوزدەرىندە دە جۇرگىزىلدى. «الەس» اق ءوز ستانسيالارىنىڭ دايىندىعىن 84%-عا جەتكىزدى. سونىمەن قاتار، نورمادان ارتىق وتىن قورى جاساقتالدى – كومىر بويىنشا 119%، مازۋت بويىنشا 136%. بۇل قىستى كىدىرىسسىز وتكىزۋگە مۇمكىندىك بەرەدى.
«الماتىجىلۋكوممۋنەنەرگو» ج ش س 68 قازاندىقتاعى جوندەۋدى اياقتاپ، تاعى 17 نىساندا قايتا جاڭعىرتۋ جۇرگىزۋدە. كاسىپورىننىڭ جالپى دايىندىعى 98% جەتتى، وتىن قورى تولىق كولەمدە جينالدى.
ماڭىزدى باعىتتاردىڭ ءبىرى سۋمەن جابدىقتاۋ جانە كارىز جۇيەلەرىن دايىنداۋ بولدى. «الماتى سۋ» شجق مكك نىسانداردىڭ تولىق دايىن ەكەنىن ايتتى: ۇزىندىعى 42 كم-دەن استام سۋ جانە كارىز جەلىلەرى قايتا جاڭعىرتىلدى.
گازبەن جابدىقتاۋدىڭ تۇراقتىلىعى دا راستالدى. «QazaqGaz Aimaq» اق الماتى فيليالى بارلىق جوسپارلى جوندەۋ جانە رەكونسترۋكسيا جۇمىستارىن اياقتادى. گاز جەلىلەرىنىڭ دايىندىعى 99%.
ەرەكشە نازار مەكتەپ، بالاباقشا، اۋرۋحانا مەن تۇرعىن ۇيلەرگە اۋدارىلدى. جىلۋ ماۋسىمىنا 412 ءبىلىم بەرۋ نىسانى، تۇرعىن ءۇي قورى بويىنشا 9117 عيمارات تولىق ازىرلەندى. دەنساۋلىق ساقتاۋ نىساندارىنىڭ دايىندىعى 92%-دان جوعارى دەڭگەيدە قامتاماسىز ەتىلدى.
سونىمەن بىرگە اكىم قول جەتكىزگەن ناتيجەمەن شەكتەلمەي، دايىندىقتى تۇراقتى باقىلاۋدا ۇستاۋدى تاپسىردى. ول بارلىق جۇيەلەردىڭ تاۋلىك بويى مونيتورينگىن جۇرگىزۋدىڭ، اپاتتى جاعدايلارعا جەدەل ارەكەت ەتۋدىڭ، دەنساۋلىق ساقتاۋ نىساندارى مەن تۇرعىن ۇيلەرگە ەرەكشە نازار اۋدارۋدىڭ ماڭىزىن اتاپ ءوتتى.
بۇدان بولەك، دارحان ساتىبالدى كوممۋنالدىق قىزمەتتەر مەن اۋدان اكىمدىكتەرىنە تىعىز بايلانىستا جۇمىس ىستەپ تۇرعىندارعا بارىنشا قولايلى جاعداي جاساۋدى مىندەتتەدى.