الماتى اكىمى دارحان ساتىبالدى جۇمىس ساپارىمەن "راحات-مادەنيەت" شاعىناۋدانىنا بارىپ، ينجەنەرلىك جەلىلەردى دامىتۋ جوباسىنىڭ جۇزەگە اسىرىلۋىمەن تانىستى. جۇمىستاردىڭ جالپى كولەمى 131،72 شاقىرىس سۋ جانە كارىز جەلىلەرىنىڭ قۇرىلىسىنا باعىتتالعان.
بۇگىنگى تاڭدا 65،5 شاقىرىم سۋ جەلىسى مەن 55،4 شاقىرىم كارىز جەلىسى اياقتالدى. جوبانىڭ جۇزەگە اسىرىلۋى شاعىناۋداندى ورتالىقتاندىرىلعان سۋمەن جابدىقتاۋ جانە كارىز جۇيەسىمەن 100 پايىز قامتاماسىز ەتۋگە، 2 882 ابونەنتتى قوسۋعا جانە 14 528 تۇرعىندى ينجەنەرلىك قىزمەتتەرمەن قامتۋعا مۇمكىندىك بەرەدى. جۇمىس تولىق اياقتالعان اۋماقتاردا جولداردى اسفالتتاۋ باستالدى. جول قۇرىلىسى جۇمىستارىنىڭ نەگىزگى بولىگى كەلەسى جىلعا جوسپارلانعان.
كەزدەسۋ بارىسىندا تۇرعىندار ەمحانانىڭ الىستىعى، ۇلكەن الماتى كانالىنىڭ (باك) ارناسىن كورىكتەندىرۋ، سونداي-اق جاڭا قوعامدىق كەڭىستىكتەردى قۇرۋ قاجەتتىلىگى جونىندەگى ماسەلەلەردى كوتەردى. قالا اكىمى ءتيىستى باسقارمالارعا ءاربىر ماسەلەنى جان-جاقتى پىسىقتاپ، شەشۋ بويىنشا ۇسىنىستار ەنگىزۋدى تاپسىردى. دارحان ساتىبالدى قالانىڭ بارلىق اۋداندارىندا تەڭ ءارى جايلى جاعداي جاساۋ — باستى مىندەتتەردىڭ ءبىرى ەكەنىن اتاپ ءوتتى.