الماتى اكىمى دارحان ساتىبالدى جۇمىس ساپارى بارىسىندا قالاداعى مەديسينالىق ۇيىمداردى جاڭعىرتۋ جۇمىستارىنىڭ بارىسىمەن تانىستى.
اتاپ ايتقاندا، قالا باسشىسى قايتا جاڭعىرتۋ جۇمىستارى اياقتالعان №4 قالالىق كلينيكالىق اۋرۋحانانىڭ قابىلداۋ ءبولىمىن ارالاپ كوردى. جاڭعىرتۋ ناتيجەسىندە قابىلداۋ ءبولىمى تاۋلىگىنە 250 ادامنان 450 ادامعا دەيىن قابىلداي الاتىن بولدى.
حالىقارالىق triage پاسيەنتتەردى سۇرىپتاۋ جۇيەسى ەنگىزىلدى. بۇل جۇيە پاسيەنتتەر لەگىن قىزىل، سارى جانە جاسىل ايماقتارعا بولۋگە نەگىزدەلگەن. مۇنداي ءتاسىل اۋىر حالدەگى ناۋقاستارعا جەدەل كومەك كورسەتۋگە، اسقىنۋلار مەن ءولىم-جىتىم ءقاۋپىن ازايتۋعا، ورىن سانىن ءتيىمدى پايدالانۋعا جانە اۋرۋحاناعا جاتقىزۋ مەرزىمىن قىسقارتۋعا مۇمكىندىك بەرەدى.
اۋرۋحانادا زاماناۋي وتا بولمەلەرى، 12 ورىنعا ارنالعان انەستەزيولوگيا، رەانيماسيا جانە قارقىندى تەراپيانىڭ شۇعىل بولىمشەسى اشىلدى. سونىمەن قاتار، تەرى ارقىلى جۇرەك تامىرلارىن ەمدەۋ ورتالىعى جۇمىسىن باستادى. بۇل جۇرەك-قان تامىرلارى اۋرۋلارى بار ناۋقاستارعا جوعارى تەحنولوگيالىق مەديسينالىق كومەك كورسەتۋ مۇمكىندىگىن كەڭەيتەدى.
«مەملەكەت باسشىسىنىڭ تاپسىرماسىمەن الماتىدا قازىرگى زامانعى تالاپتار مەن حالىقارالىق دەنساۋلىق ساقتاۋ ستاندارتتارىن ەسكەرە وتىرىپ، مەديسينالىق ينفراقۇرىلىمدى جۇيەلى تۇردە جاڭارتۋ جۇمىستارى جۇرگىزىلىپ جاتىر. 2025 جىلى 4 مەديسينالىق-سانيتارلىق العاشقى كومەك ورتالىعى جانە 1 ەمحانا سالىندى، سونداي-اق تاعى 32 نىساندى سالۋ جانە جاڭعىرتۋ بويىنشا جوبالار ازىرلەنىپ جاتىر»، – دەدى دارحان ساتىبالدى.
№4 قالالىق كلينيكالىق اۋرۋحانا – تاۋلىك بويى جۇمىس ىستەيتىن كوپسالالى ستاسيونار. مۇندا جىل سايىن 12 500-گە دەيىن وتا جاسالادى.
سونداي-اق، الماتى اكىمى تۇركسىب اۋدانىنداعى التاي شاعىناۋدانىندا ءبىر اۋىسىمدا 500 ادامدى قابىلداي الاتىن جاڭا ەمحانانىڭ قۇرىلىس الاڭىنا باردى.
جاڭا ەمحانا بۇرىن جۇمىس ىستەمەي تۇرعان دەنساۋلىق ساقتاۋ نىسانىنىڭ ورنىنا سالىنىپ جاتىر. مەكەمەنى ۋلترادىبىستىق زەرتتەۋ اپپاراتتارى، سيفرلىق فليۋوروگرافيا جانە مامموگرافيا، رەنتگەن، مرت جانە كت جابدىقتارىن قوسقاندا، زاماناۋي دياگنوستيكالىق جۇيەلەرمەن جابدىقتاۋ جوسپارلانعان. بۇل تەكسەرۋلەردىڭ جىلدامدىعى مەن دالدىگىن ەداۋىر ارتتىرىپ، مەديسينالىق-سانيتارلىق العاشقى كومەكتىڭ ءبىرىڭعاي ستاندارتى اياسىندا مەديسينالىق قىزمەت ساپاسىن قامتاماسىز ەتۋگە مۇمكىندىك بەرەدى. قۇرىلىس جۇمىستارىن وسى جىلدىڭ ءىV توقسانىندا اياقتاۋ جوسپارلانىپ وتىر.