الماتىدا ءار كەزەڭدە سالىنعان ينجەنەرلىك جەلىلەردىڭ كۇردەلى جۇيەسى قالىپتاسقان. بۇل جۇيە تۇراقتى تۇردە دامىتۋدى جانە جاڭارتۋدى تالاپ ەتەدى. بۇل تۋرالى ورتالىق كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى مالىمدەدى.
اكىمنىڭ ايتۋىنشا، 2026 جىلدىڭ سوڭىنا دەيىن "اقساي"، "نۇرلى تاۋ" جانە "بارلىق" سۋ الۋ قۇرىلىستارىنىڭ، سونداي-اق 460 شاقىرىم سۋ قۇبىرى جەلىلەرىنىڭ قۇرىلىسى اياقتالادى. بۇل شارالار قالاداعى 232 مىڭ تۇرعىندى تۇراقتى اۋىزسۋمەن قامتاماسىز ەتۋگە مۇمكىندىك بەرەدى. كەلەسى جىلى ۇزىندىعى 19 شاقىرىم بولاتىن ۇلكەن ديامەترلى كوللەكتور، سونداي-اق قالانىڭ وڭتۇستىك، ورتالىق جانە شىعىس بولىكتەرىنەن سارقىندى سۋلاردى اعىزۋعا ارنالعان جالپى ۇزىندىعى 33 شاقىرىم بولاتىن 3 كارىز كوللەكتورى سالىنادى. ۇزىندىعى 30 شاقىرىمنان اساتىن جاڭا باتىس كوللەكتورى الماتىنىڭ باتىس بولىگىن جانە وبلىسقا ىرگەلەس اۋماقتاردى قامتيدى.
"ەنەرگەتيكا سالاسىندا ناۋرىزباي، الاتاۋ جانە مەدەۋ اۋداندارىندا يەسىز قالعان 147 شاقىرىم جەلىنى قايتا جاڭعىرتۋ جوسپارلانىپ وتىر. باتىس جىلۋ كەشەنىن كەڭەيتۋ جانە قۋاتى 100 مۆت بولاتىن ەكى قازاندىق اگرەگاتتى ورناتۋ قالاداعى 250 مىڭ تۇرعىننىڭ جىلۋمەن قامتىلۋىن جاقسارتۋعا مۇمكىندىك بەرەدى. سونداي-اق "شىعىس قاقپاسى" جانە "كىرپىش" 110 كۆ قوسالقى ستانسيالارىن سالۋ قالانىڭ شىعىس بولىگىندەگى كەلەشەگى بار اۋدانداردى سەنىمدى ەلەكتر قۋاتىمەن قامتاماسىز ەتەدى. جالپى جىل سايىن كەمىندە 130 شاقىرىم ينجەنەرلىك جەلىنى جاڭارتۋ كوزدەلگەن. ونىڭ ىشىندە: سۋ قۇبىرى جەلىلەرى – 35 شاقىرىم، كارىز جۇيەسى – 10 شاقىرىم، جىلۋ جەلىلەرى – 39 شاقىرىم، ەلەكتر جەلىلەرى – 45 شاقىرىم"، – دەدى دارحان ساتىبالدى.