ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە وتاندىق سۋرەتشى ساكەن بەكتياردىڭ «كەلتە التىن عاسىر» اتتى كورمەسى اشىلدى، دەپ حابارلايدى اqshamnews.kz. بۇل كورمە بىرنەشە ونجىلدىققا سوزىلعان شىعارماشىلىق ىزدەنىستىڭ، ىشكى تولعانىس پەن كوركەمدىك تاجىريبەنىڭ ناتيجەسى دەپ وتىر ارىپتەستەرى.
كورمەدە سۋرەتشىنىڭ ويلاۋ ءتاسىلى مەن كوركەمدىك ءتىلىن جاقىنىراق تانۋعا بولادى. بۇل جاي عانا رەتروسپەكتيۆا ەمەس، بۇل – ۋاقىت، تاعدىر، ءتان مەن سىزىق تۋرالى فيلوسوفيالىق تولعانىس. ساكەن بەكتيار ءۇشىن سىزىق – دالانىڭ تىنىسى مەن ءۇنى ىسپەتتى، سوندىقتان بولار ول ءوز قولتاڭباسىن «گرافيكانىڭ مۋزىكاسى» دەپ اتايدى.
سۋرەتشى گرافيكا، كەسكىندەمە جانە يلليۋستراسيا سالاسىندا ەڭبەك ەتەدى، ۆيزۋالدى مەديانى پوەتيكالىق جانە مۋزىكالىق ويلاۋ تاسىلدەرىمەن ۇشتاستىرادى. ونىڭ كوركەمدىك ءتىلى ءداستۇرلى اكادەميالىق مەكتەپتەن تىس دامىعانىمەن، سۋرەتشى پلاستيكا مەن كومپوزيسيانى نازىك سەزىنۋ ارقىلى پىشىنگە ىشكى سەرپىن مەن ىرعاق دارىتا الادى.
"ەكسپوزيسياعا ءىرى فورماتتى كەسكىندەمەلەرمەن قاتار، تۋشپەن جانە قارىنداشپەن ورىندالعان نازىك گرافيكالىق پاراقتار دا ەنگەن. «قىز قۋۋ نەمەسە جەرگىلىكتى ماحاببات مەرەكەسى»، «قارا اققۋ»، «كۇمىس سىرعالى قازاق قىزى» سەكىلدى سەريالارىندا دالا مادەنيەتىنە تەرەڭ تامىر جايعان حالىقتىق ارحەتيپتەر مەن موتيۆتەر كورىنىس تاۋىپ، بۇگىنگى زامان تۇرعىسىنان جاڭاشا پايىمدالادى. كەيىنگى جىلدارى سالىنعان «شەڭبەر نەمەسە ۇيلەسىمگە ۇمتىلىس»، «اتقامىنەر جانە ونىڭ ولجاسى» اتتى كارتينالاردا سۋرەتشى ۇجىمدىق بەيسانالىق پەن دالالىق ۆيزۋالدى جادىعا جۇگىنەدى"، – دەيدى كورمە جەتەكشىسى، مۋزەيدىڭ «قازاقستان بەينەلەۋ ونەرى» ءبولىمىنىڭ عىلىمي قىزمەتكەرى س.سىرعابايەۆ.
تۇستىك پاليتراسى قانىق قارا جانە وحرا تۇستەرىنەن باستاپ، اشىق سۇر مەن بوزعىلت قىزعىلت رەڭكتەرگە دەيىن الماسىپ وتىرادى. بۇل تۇستەر – سۋرەتشىنىڭ سەزىمدى جەتكىزۋ امالى، سيپاتتاۋدان گورى ىقپال ەتۋ قۇرالىنا اينالعان.
ونەرتانۋشى نادەجدا پولونسكايا سۋرەتشى جايلى: «ونىڭ سۋرەت سالعانى – ءان ايتقانداي، ال ءان سالعانى – تىنىس العانداي... مۇنى كورۋ كەرەك، سوزبەن جەتكىزۋ قيىن»، – دەيدى.
ساكەن بەكتيار Kenbee لاقاپ اتىمەن دە تانىمال. ول الماتىداعى «Tengry Umai» گالەرەياسىنداعى جەكە كورمەسىنەن باستاپ، گەرمانيا، يسپانيا، چەرنوگوريا جانە ۇلىبريتانياداعى (سونىڭ ىشىندە لوندونداعى Victoria and Albert مۋزەيىندە) كوپتەگەن حالىقارالىق جوبالار مەن ارت-رەزيدەنسيالاردىڭ قاتىسۋشىسى. بۇگىندە سۋرەتشىنىڭ تۋىندىلارى الەمنىڭ ءتۇرلى ەلدەرىندەگى جەكە كوللەكسيالاردا ساقتاۋلى.
ەكسپوزيسيا تامىزدىڭ 1-نە دەيىن جالعاسادى.