الماتىداعى ا.چەحوۆ اتىنداعى ورتالىق كىتاپحانادا قازاقستان رەسپۋبليكاسى كونستيتۋسياسىنىڭ 30 جىلدىعىنا ارنالعان «ادىلەت پەن پاراسات جولى» تاقىرىبىندا «دوڭگەلەك ۇستەل» ءوتتى، دەپ حابارلايدى اqshamnews.kz.
اتا زاڭعا قۇرمەت رەتىندە كورەرمەن زالىنا اسكەري جاس ساربازدار ەلىمىزدىڭ مەملەكەتتىك تۋىن سالتاناتپەن الىپ كىردى. ءانۇران ورىندالدى.
«دوڭگەلەك ۇستەل» باسىنداعى ديالوگتىڭ بەتاشار ءسوزىن سويلەگەن قازاقستان حالقى اسسامبلەياسى ءتوراعاسىنىڭ ورىنباسارى راسۋل احمەتوۆ كونستيتۋسيامىزدىڭ ماڭىزدىلىعىنا توقتالدى. پروفەسسور، ۇلتتىق زاڭ اكادەمياسىنىڭ اكادەميگى اقىلبەك يسابەكوۆ، اقىن، عالىم ءادىلعازى قايىربەكوۆ، الماتى قالالىق ادۆوكاتتار القاسىنىڭ مۇشەلەرى – باۋىرجان سەرالين، رۋسلان قانسەيتوۆ، تيمۋر راحىمباي، راديوەلەكترونيكا جانە بايلانىس اسكەري ينجەنەرلىك ينستيتۋتىنىڭ قىزمەتكەرى، اعا لەيتەنانت ءمولدىر اقجول قىزى جانە تاعى باسقا دا مەيماندار وي ءوربىتتى.
جينالعان قاۋىمعا ا.چەحوۆ اتىنداعى ورتالىق كىتاپحانانىڭ قىزمەتكەرى سىمبات اسانوۆا وقىرمان زالىندا ۇيىمداستىرىلعان «اتا زاڭ – مەملەكەت تىرەگى» اتتى كىتاپ كورمەسىنە بيبليوگرافيالىق شولۋ جاسادى.
اتا زاڭ – مەملەكەتتىلىگىمىزدىڭ مىزعىماس تىرەگى ءارى ەلىمىزدىڭ ساياسي جانە قوعامدىق قۇرىلىسىن، اينىماس قۇندىلىقتارى مەن دامۋ جولىنداعى ستراتەگيالىق باعىت-باعدارىن ايقىندايتىن باستى قۇجاتىمىز. ول بۇگىنگى وتىز جىلدىق بەلەسىندە ۇلتتى ۇيىستىرۋدىڭ ناعىز سيمۆولىنا اينالدى. سونداي-اق، ەلدىڭ ساياسي جۇيەسىن دەموكراتيالاندىرۋدى، زاڭ ۇستەمدىگىن قامتاماسىز ەتۋدى جانە حالىقتىڭ ءال-اۋقاتىن ارتتىرۋدى كوزدەيتىن اۋقىمدى وزگەرىستەردىڭ بەرىك تۇعىرى سانالادى.
ءادىلعازى قايىربەكوۆ، حالىقارالىق «الاش» ادەبي سىيلىعىنىڭ لاۋرەاتى:
"اتا زاڭ – ءبىزدىڭ باعدارشام. ءاربىر ادام ونىڭ بيىك مۇراتتارىن قولداي ءبىلۋى كەرەك. ال زاڭ، ءتارتىپ بار جەردە ءومىر دە ءماندى بولادى. وسى كونستيتۋسيانى وقىپ وتىرعان كەزدە كوڭىلىمە اركەز جىلى ۇشىرايتىنى – توعىزىنشى بابى. وندا قازاقستان رەسپۋبليكاسىنىڭ تۋى، ەلتاڭباسى جانە گيمنى تۋرالى سيپاتتاما بەرىلەدى جانە ولاردى رەسمي پايدالانۋ ءتارتىبى كونستيتۋسيالىق زاڭمەن بەلگىلەنگەنى كورسەتىلگەن. شىنى كەرەك، ماعان ءارتۇرلى جيىنداردا كىشكەنتاي بالدىرعانداردىڭ قولىندا جەلبىرەپ تۇراتىن كىشكەنتاي عانا كوك جالاۋشانىڭ ءوزى دە شابىت بەرەدى، كوڭىلىمدى اسقاقتاتادى. گيمن ورىندالعاندا ۇلكەن-كىشى الاقانىن جۇرەك تۇسىنا قوياتىن ءسات تە ەرەكشە. ءارقايسىمىزدىڭ جۇرەگىمىزدە وسىنداي پاتريوتتىق سەزىم ۇيالعان بولسا، ءبىز المايتىن قامال بولماسى انىق. جاس ۇرپاق قاسيەتتى رامىزدەرىمىزدى اركەز قادىرلەپ جۇرسە ەكەن دەگەن تىلەگىم بار" دەدى ول.
ايدوس بەكتۇرسىن، جاس مامان، قازاقستان جازۋشىلار كىتاپحاناسىنىڭ قىزمەتكەرى:
"اتا زاڭىمىزدىڭ ون توعىزىنشى بابى ازاماتتاردىڭ مادەنيەتى مەن ءبىلىم الۋ قۇقىنا كەپىلدىك بەرەدى. ال بۇل جولدا ءبىز سەكىلدى كىتاپحانا قىزمەتكەرلەرى دە ۇلكەن ۇلەس قوسىپ ءجۇر. كىتاپحانا – سورەسىندە كىتاپتار جينالىپ تۇرعان ورىن عانا ەمەس، سونىمەن قاتار ول – اقپاراتتىق، مادەني جانە الەۋمەتتىك كەڭىستىك. ءبىز وقىرماندارعا كىتاپپەن بىرگە، ءبىلىم، يدەيالار جانە جاڭا مۇمكىندىكتەر ۇسىنامىز. مۇمكىندىگى شەكتەۋلى تۇرعىندارعا دا ەرەكشە جاعداي جاسالعان. ياعني اتا زاڭ مىندەتتەگەندەي، سيفرلاندىرۋ باعدارلاماسى ارقىلى بارلىق وقىرمانعا ەلەكتروندىق رەسۋرستارعا قول جەتكىزۋ مۇمكىندىگىن قامتاماسىز ەتتىك. جاس ۇرپاقتى پاتريوتتىق تاربيەلەۋگە باعىتتالعان تىڭ جوبالاردى جۇزەگە اسىرۋ جولعا قويىلعان. ءبىز ازاماتتاردىڭ اقپاراتتىق ساۋاتىن ارتتىرۋعا كومەكتەسەمىز. ءبىلىم ىزدەگەن ستۋدەنتتەر ءۇشىن – وقۋ زالى، زەينەتكەرلەر ءۇشىن – الەۋمەتتەنۋ ورتالىعى، ال مەكتەپ وقۋشىلارى ءۇشىن – ينتەللەكتۋالدىق ءوي-ورىسىن دامىتۋعا جول اشاتىن الاڭ ۇيىمداستىرىلعان. دەمەك، كونستيتۋسيا – بۇل تەك قۇقىقتىق قۇجات ەمەس، ءبىزدىڭ جارقىن بولاشاعىمىزدىڭ كەپىلى" دەپ پىكىر ءبىلدىردى.