COVID-19 پاندەمياسى ارتىق سالماق پەن سەمىزدىككە شالدىققان مەكتەپ جاسىنداعى بالالار سانىنىڭ ارتۋىنا اكەلدى.
بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) ەۋروپالىق ايماقتىق بيۋروسىنىڭ جاڭا بايانداماسىندا ايتىلعان، دەپ حابارلايدى Almaty-akshamuy.kz.
مەكتەپ جاسىنداعى بالالاردىڭ مىنەز-قۇلقى مەن كۇندەلىكتى ءتارتىبىن زەرتتەۋ 2021 جانە 2023 جىلدار ارالىعىندا ددسۇ ەۋروپالىق ايماعىنا مۇشە 53 مەملەكەتتىڭ 17-دە جۇرگىزىلدى. وعان 50 مىڭنان استام بالا قاتىستى.
بايانداما 7-9 جاس ارالىعىنداعى ارتىق سالماعى بار بالالار سانىنىڭ ارتقانىن راستايدى. بۇل پاندەميا كەزىندە بالالاردىڭ كومپيۋتەر ەكراندارى مەن باسقا قۇرىلعىلاردىڭ الدىندا كوپ ۋاقىت وتكىزىپ، فيزيكالىق بەلسەندىلىكتىڭ از بولۋىمەن بايلانىستى، دەپ حابارلايدى ۇيىم ساراپشىلارى.
سونىمەن قاتار، زەرتتەۋگە سايكەس، ساۋالناماعا قاتىسقان بالالاردىڭ 42%-ى ءوزىن بۇرىنعىعا قاراعاندا باقىتسىز سەزىنگەن. ءاربىر بەسىنشى بالا مۇڭايىپ جۇرەتىنىن ايتقان، ال ءاربىر ءتورتىنشىسى جالعىزسىراپ جۇرگەنىن جۇرگەنىن ايتقان.
ددسۇ پاندەميا بالالارداعى سەمىزدىكپەن كۇرەسۋدىڭ شۇعىل قاجەتتىلىگىن اتاپ ءوتتى: ايماقتاعى ەلدەر دامۋدىڭ بارلىق كەزەڭدەرىندە بالالاردىڭ دۇرىس تاماقتانۋى مەن فيزيكالىق بەلسەندىلىگىنە باسىمدىق بەرۋى ءتيىس. بۇعان قول جەتكىزۋ ءۇشىن ۇيىم دەنساۋلىققا زياندى ونىمدەردى جارنامالاۋعا جانە ولارعا سالىناتىن سالىقتارعا شەكتەۋ قويۋ، تاعامدى ناقتى تاڭبالاۋ جانە ديەتانى جاقسارتۋ، مەكتەپتەردە دەنە بەلسەندىلىگىن ىنتالاندىرۋ شارالارىن ۇسىندى.