اعىلشىن پرەمەر ليگاسىنىڭ چەمپيونى، "چەلسيدىڭ" بۇرىنعى ويىنشىسى نيگەريالىق ۆيكتور موزەس وسى اپتانىڭ سوڭىندا "قايسار" كلۋبىمەن رەسمي تۇردە كەلىسىمشارتقا وتىرادى، - دەپ حابارلايدى Aqshamnews.kz.
35 جاستاعى ۆيكتور “قاسقىرلار” ساپىندا 2026 جىلدىڭ سوڭىنا دەيىن ونەر كورسەتپەك.
دەرەككوزدەردىڭ مالىمەتىنشە ۆيكتور موزەستى جانكۇيەرلەرگە رەسمي تانىستىرۋ شاراسى 24 قاڭتار كۇنى قىزىلوردا قالاسىندا وتەدى دەپ جوسپارلانۋدا.
موزەستىڭ فۋتبولداعى جولى وتە باي ءارى تابىستى. ول مانسابىن انگلياداعى "كريستال پەلاس” ساپىندا باستاپ، كەيىننەن "ۋيگان اتلەتيكتە” ءوزىن جاقسى قىرلارىنان تانىتتى. ونىڭ ويىنىنا ەۋروپالىق الپاۋىتتاردىڭ ءبىرى — “چەلسي" قىزىعۋشىلىق تانىتىپ، 2012 جىلى ءوز ساپىنا قوستى.
ونىڭ باستى جەتىستىكتەرى مەن كلۋبتارى:
- "چەلسي” ساپىندا: 2016-17 جىلعى ماۋسىمدا انگليا پرەمەر ليگاسىنىڭ چەمپيونى اتاندى. كلۋب ساپىندا جالپى 10-نان استام گول سوققان.
- جالعا بەرىلگەن كلۋبتارى: مانسابىنىڭ ءار جىلدارىندا "ليۆەرپۋل"، "ستوك سيتي"، "ۆەست حەم"، "فەنەرباحچە"، "ينتەر" جانە "سپارتاك" سياقتى اتاقتى ۇجىمداردا ونەر كورسەتتى.
ۆيكتور موزەس ءجاسوسپىرىم شاعىندا انگليانىڭ ءتۇرلى دەڭگەيدەگى قۇرامالارىندا ويناعانىمەن، كەيىننەن تاريحي وتانى نيگەريانى تاڭدادى.
• نيگەريا قۇراماسىمەن بىرگە 2013 جىلى افريكا ۇلتتارى كۋبوگىندا جەڭىمپاز اتاندى.
• 2014 جانە 2018 جىلعى الەم چەمپيوناتتارىنا قاتىستى.
• ۇلتتىق قۇراما ساپىندا 38 ويىن وتكىزىپ، 12 گولدىڭ اۆتورى اتاندى.
بۇل ترانسفەر "قايسار” كلۋبىنىڭ عانا ەمەس، بۇكىل قازاقستان چەمپيوناتىنىڭ دەڭگەيىن كوتەرىپ، جانكۇيەرلەردىڭ قىزىعۋشىلىعىن ارتتىراتىنى ءسوزسىز.