2025 جىلدىڭ قورىتىندىسى بويىنشا شامامەن 3 مىڭ جەتىم بالا وتباسىلارعا ورنالاستىرىلدى. وسى شارا اياسىندا بالالاردىڭ قاۋىپسىزدىگىن قامتاماسىز ەتۋ ماقساتىندا مەملەكەت قامقورشىلاردىڭ سەنىمدىلىگىن باعالاۋ مەن باقىلاۋدىڭ جاڭا مودەلىن ەنگىزدى. ينستيتۋسيونالدىق ەمەس كومەككە كوشۋ قارقىنى سوڭعى 10 جىلدىڭ ستاتيستيكاسىنان انىق بايقالادى. ماسەلەن، وسى كەزەڭدە ەلىمىزدەگى ينتەرناتتىق ۇيىمدار جەلىسى 24%-عا قىسقارىپ، ونداعى تاربيەلەنۋشىلەر سانى 54%-عا ازايدى.
وتباسىلىق تاربيەلەۋ فورمالارىنا كوشۋ قورعانشىلىق جانە قامقورشىلىق ورگاندارى جۇمىسىنىڭ ساپاسىن ارتتىرۋدى تالاپ ەتتى. وسىعان بايلانىستى اتالعان ورگاندارداعى ماماندار سانى 3،3 ەسەگە ۇلعايىپ، 303 قىزمەتكەردەن 1028 مامانعا دەيىن ارتتى. بۇل ءاربىر وتباسىنا جەكە سۇيەمەلدەۋ كورسەتىپ، بالالاردىڭ ءومىر ءسۇرۋ جانە تاربيەلەنۋ جاعدايلارىن جان-جاقتى زەردەلەۋگە مۇمكىندىك بەردى.
سونىمەن قاتار 2025 جىلدان باستاپ زاڭدى وكىلدەردى ىرىكتەۋ تالاپتارى كۇشەيدى. ەندى قامقورشىلار مىندەتتى تۇردە جىل سايىن كەشەندى تەكسەرۋدەن وتەدى. تەكسەرۋ تابىس كوزدەرىنىڭ راستالۋىن، دەنساۋلىق جاعدايىن، تۇرعىن ءۇي جاعدايىنىڭ سايكەستىگىن جانە سوتتىلىعىنىڭ بولماۋىن قامتيدى. كەز كەلگەن تاۋەكەل فاكتورلارى، ونىڭ ىشىندە زاڭدى وكىلدىڭ سوتقا تارتىلۋى نەمەسە پسيحونيەۆرولوگيالىق نەمەسە ناركولوگيالىق ديسپانسەرگە ەسەپكە الىنۋى قامقورشىلىق مىندەتىنەن دەرەۋ شەتتەتۋگە نەگىز بولادى.
بالالاردى قولداۋدىڭ بالامالى تەتىگى رەتىندە تالىمگەرلىك ينستيتۋتى دا جۇيەلى تۇردە دامىپ كەلەدى. بۇگىندە ەلىمىزدىڭ 20 وڭىرىندە 360-تان استام تالىمگەر بار. 2025 جىلدان باستاپ تالىمگەرلەر ءۇشىن مىندەتتى كاسىبي سەرتيفيكاتتاۋ ەنگىزىلدى. بۇل رەتتە بالانىڭ تۋىستىق بايلانىستارىن ساقتاۋ نەگىزگى باسىمدىق بولىپ قالا بەرەدى، سوندىقتان ەڭ الدىمەن ونى جاقىن تۋىستارىنا ورنالاستىرۋ مۇمكىندىگى قاراستىرىلادى.
قازىرگى تاڭدا ەلىمىزدە جەتىم جانە اتا-اناسىنىڭ قامقورلىعىنسىز قالعان 20 798 بالا بار، ولاردىڭ 82%-ى وتباسىلاردا تاربيەلەنۋدە.