بۋىنداردى قابىندىراتىن ريەۆماتويدتى ارتريت – ەتيولوگياسى بەلگىسىز سوزىلمالى اۋتويممۋندى اۋرۋ.
وتكەن عاسىردىڭ 80-90 جىلدارىندا بۇل نەگىزىنەن جاستار (20-40 جاس) دەرتى بولىپ سانالعان. بۇگىندە ادام 50، 70 جانە 80 جاسىندا دا اۋىرىپ قالۋى مۇمكىن. ريەۆماتويدتى ارتريتپەن كىشكەنتاي بالالار دا (نەگىزىنەن 1 جاستان 3 جاسقا دەيىن) اۋىرادى، ءبىراق ەرەسەكتەرگە قاراعاندا جەڭىل وتەدى.
ءبارى قاراپايىم سۋىقتانۋدان باستالادى. ادەتتە الدىمەن جالپى السىزدىك، شارشاۋ پايدا بولادى. بىرتىندەپ ولارعا بۇلشىقەتتەردىڭ اۋىرۋى، تەرشەڭدىك، تەمپەراتۋرانىڭ جوعارىلاۋى قوسىلادى. سودان كەيىن بۋىندار اۋىرسىنا باستايدى. اۋرۋ كەز-كەلگەن بۋىنعا اسەر ەتۋى مۇمكىن. تىرناقتىڭ سىنعىشتىعى، قاڭقا بۇلشىقەتتەرىنىڭ السىرەۋى، پليەۆريتتىڭ دامۋى، وكپە تىندەرىنىڭ زاقىمدالۋى دا ىقتيمال. ولار ريەۆماتويدتى تۇيىندەردىڭ پايدا بولۋىمەن بىرگە جۇرەدى جانە تەرىنىڭ استىندا تىعىز شار تۇرىندە سەزىلەدى.ءپوليارتريتتىڭ نەگىزگى بەلگىسى – ساۋساق بۋىندارىنىڭ سيممەتريالى زاقىمدانۋى. تەك وسى سيمپتومعا سۇيەنە وتىرىپ، دياگنوز قويۋعا بولادى. ەگەر تىزە بۋىنى اۋىرسا، بۇل باسقا اۋرۋلاردىڭ بەلگىسى بولۋى مۇمكىن. ەكىنشى بەلگىسى – تاڭەرتەڭ ويانعان ادام الاقانىن قىسا الماي قالادى.
ريەۆماتويدتى ءارتريتتىڭ ناقتى سەبەپتەرى الەم بويىنشا ءالى انىقتالماعان. سىرتقى اسەردىڭ ناتيجەسىندە (ۆيرۋستىق ينفەكسيا، كۇيزەلىس، سۋىق تيۋ نەمەسە كەرىسىنشە ىستىق ءوتۋ) يممۋنيتەت دۇرىس جۇمىس ىستەمەيدى.
الماتىداعى كارديولوگيا جانە ىشكى اۋرۋلار عزي №2 تەراپيا بولىمشەسىنىڭ ريەۆماتولوگ-دارىگەرى مارجان ابدۋللايەۆانىڭ ايتۋىنشا، ءپوليارتريتتى ەمدەۋ ءۇشىن قازىرگى زامانعى مەديسينادا بازيستىك تەراپيانى (يممۋندىق جۇيە جاسۋشالارىنىڭ انتيدەنەلەر ءوندىرىسىنىڭ بەلسەندىلىگىن تومەندەتەتىن ەم) پايدالانادى. بۇل تەراپيانىڭ ەرەكشەلىگى – ەم العاشقى كۇننەن باستاپ جانە ءومىر بويى جۇرگىزىلەدى. ناۋقاس دارى-دارمەكتى ۇنەمى قابىلداۋى كەرەك. مۇنداي جاعدايلاردا اۋرۋ ۋاقىت وتە كەلە باسىلادى جانە ادامنىڭ ءومىر ءسۇرۋ ساپاسى جاقسى جاققا وزگەرە باستايدى. ەمدەۋ اۋرۋدىڭ بەلسەندىلىگى مەن ۇزاقتىعىنا بايلانىستى. ءار ناۋقاس ءۇشىن جەكە ەمدەۋ سحەماسى تاڭدالادى.
– بازيستىك پرەپاراتتارمەن ستاندارتتى تەراپيانىڭ تيىمدىلىگى جەتكىلىكسىز بولعان جاعدايدا گەندىك-ينجەنەرلىك بيولوگيالىق تەراپيا قولدانىلادى. سوندىقتان نەگىزگى تەراپيامەن بىرگە اۋىرسىنۋدى جەڭىلدەتۋ ءۇشىن تەز اسەر ەتەتىن ستەرويدتى ەمەس قابىنۋعا قارسى پرەپاراتتار، كەيدە گليۋكوكورتيكوستەريودتار قولدانىلادى. رەميسسياعا جەتۋ ءۇشىن نەگىزگى تەراپيانى ۇزدىكسىز جۇرگىزۋ ماڭىزدى. بۇل قىزدىرعىش گەلدەر، جاقپا مايلار بولۋى مۇمكىن، ولار وتە تەرەڭ ەنىپ، بۋىننىڭ وزىنە اسەر ەتەدى، ءبىراق اسەر ەتۋ ءۇشىن جاقپا كۇنىنە ەكى رەت قولدانىلۋى كەرەك. ستەرويدتى ەمەس پرەپاراتتار قابىنۋدى، اۋىرسىنۋدى تومەندەتۋى مۇمكىن، – دەيدى دارىگەر.
مينەرالدى سۋلار، ەمدىك ۆاننالار اۋرۋدىڭ تومەن بەلسەندىلىگىمەن نەمەسە رەميسسيامەن ادام دەنساۋلىعىنا پايدالى اسەر ەتەدى. سوندىقتان الدىمەن ستاسيوناردا ەمدەلىپ، سودان كەيىن فيزيوتەراپيالىق ەمدەۋدەن وتكەن ءجون (جارتى جىلدا 1 رەت)، كۇن سايىن ارنايى ەمدىك گيمناستيكا جاساپ، جىلىنا ءبىر رەت تىرەك-قيمىل اپپاراتىنىڭ اۋرۋلارى ەمدەلەتىن شيپاجايعا بارعان ءتيىمدى دەيدى دارىگەر.