جاڭا ءبىلىم وشاقتارى 88 مىڭ وقۋشىنى قامتيدى.
ق ر وقۋ-اعارتۋ مينيسترلىگى ءۇش اۋىسىمدى، اپاتتى مەكتەپتەردىڭ ماسەلەلەرىن جۇيەلى شەشۋ ءۇشىن جاڭا وقۋشى ورىندارىن ەنگىزۋ بويىنشا جۇمىستاردى جوسپارلى تۇردە جۇرگىزۋدە، دەپ حابارلايدى Almaty-akshamy.kz.
بۇگىندە وڭىرلەردە 88 مىڭ وقۋشىعا ارنالعان 96 جاڭا مەكتەپ اشىلدى. بۇل تۋرالى ق ر وقۋ-اعارتۋ مينيسترلىگىنىڭ باسپا ءسوز قىزمەتى حابارلايدى.
جالپى، وسى جىلدىڭ اياعىنا دەيىن ءتۇرلى قارجى كوزدەرى ەسەبىنەن 132 مىڭ وقۋشى ورىنعا ارنالعان 154 مەكتەپتى، ونىڭ ىشىندە ءبىلىم بەرۋ ينفراقۇرىلىمىن قولداۋ قورى ەسەبىنەن 76 738 ورىندىق 62 مەكتەپتى پايدالانۋعا بەرۋ جوسپارلانۋدا. بۇل 12 اپاتتى جانە 29 ءۇش اۋىسىمدى مەكتەپتىڭ ماسەلەسىن، 113 ەلدى مەكەندەگى وقۋشى ورىندارىنىڭ تاپشىلىعىن شەشەدى.
سونداي-اق، «جايلى مەكتەپ» ۇلتتىق جوباسى ىسكە اسۋدا. بيىل 217 مەكتەپتىڭ قۇرىلىسى باستالدى، ولار 2024 جىلدىڭ سوڭىنا دەيىن پايدالانۋعا بەرىلەدى. ۇلتتىق جوبا ەڭ الدىمەن قالالار مەن كەلەشەگى بار ەلدى مەكەندەردە جاڭا ۇلگىدەگى مەكتەپتەردى سالۋعا، وقۋشىلار مەن پەداگوگتەرگە جايلى ءارى ءقاۋىپسىز ورتا قالىپتاستىرۋعا، ءبىلىم بەرۋ قىزمەتىنىڭ ساپاسىن ارتتىرۋعا باعىتتالعان.
جالپى، مەملەكەت باسشىسىنىڭ تاپسىرماسى بويىنشا ەلىمىزدە 740 مىڭ وقۋشىعا ارنالعان 369 جايلى مەكتەپ سالۋ جوسپارلانۋدا.