قالامگەر 1912 جىلى ترويسكىدەگى احۋن راحمانقۇلي مەدرەسەسىنە تۇسەدى. وسى كەزدەن اقىڭدىققا دەن قويىپ، «وقىپ جۇرگەن جاستارعا»، «تالىپتەرگە»، «ەندىگى بەتالىس»، «وقۋداعى ماقسات نە؟»، «شىعامىن ءتىرى بولسام ادام بولىپ»، ت.ب. ولەڭدەرىن، «زارلاندىم» اتتى ۇزاق وچەركىن جازعان، دەپ حابارلايدى aqshamnews.kz.
وسى تۇستا «قامار سۇلۋ» رومانىن جازۋدى باستادى. ول ءومىر شىندىعىن كوركەم بەينەلەي كەلە، قازاق ولەڭىنىڭ مازمۇنىن كەڭەيتتى، سىرعا تولى ليريكالىق جىرلار قالدىردى. كوپتەگەن اڭگىمە، وچەركتەر، ادەبي-سىن ماقالالار جازدى، ەكى رومان («قامار سۇلۋ»، «كىم جازىقتى؟»)، ءتورت پوەماسىن («تانىستىرۋ»، «اداسقان ءومىر»، «كەدەي»، «ايتىس») جاريالادى. قالامگەر «قامار سۇلۋدا» ايەل تەڭسىزدىگى ماسەلەسىن كوتەرە وتىرىپ، ءداۋىر شىندىعىن الەۋمەتتىك تۇرعىدا تالدادى. تورايعىروۆ شىعارمالارى – 20 عاسىردىڭ باسىنداعى قازاق قوعامى شىندىعىن، ونداعى جاڭاشىل وي-پىكىردىڭ دامۋىن تانىتاتىن ۇلكەن مۇرا.