قالامگەردىڭ «وتكەن كۇندەر» اتتى تۇڭعىش ولەڭدەر جيناعى 1914 جىلى جارىققا شىقتى.
بۇدان بولەك «اساۋ تۇلپار» ولەڭدەر جيناعى، «باقىت جولىنا»، «قىزىل سۇڭقارلار» اتتى پەسالارى، «دومبىرا»، «ەكسپرەسس»، «تۇرمىس تولقىنىندا» اتتى پوەتيكالىق جيناقتارى جارىق كورگەن. جاڭاشىل اقىن پوەزيا مەن دراماتۋرگياعا كوپ جاڭالىقتار ەنگىزدى. ولەڭنىڭ ءتۇرى مەن مازمۇنىندا تۇبەگەيلى وزگەرىس جاساپ، قازاق حالقىنىڭ پوەتيكالىق ءداستۇرىن دامىتتى.
جازۋشى «اقساق كيىك»، «اققۋدىڭ ايرىلۋى» شىعارمالارىندا تۋعان دالانىڭ تابيعاتىن، ادامنىڭ ىشكى سەزىم-كۇيلەرىن سۋرەتتەيدى. قالامگەردىڭ پۋبليسيستيكا سالاسىنىڭ دامۋىنا قوسقان ەڭبەگى زور. قازاقتىڭ ەسكى ادەبيەت نۇسقاۋلارىن جيناۋ، زەرتتەۋ، باستىرۋ ىسىمەن دە شۇعىلداندى. ونىڭ قاتىسۋىمەن «قازاقتىڭ ەسكى ادەبيەت نۇسقاۋلارى»، «باتىرلار»، «اقان سەرى - اقتوقتى»، «ءلايلى - ءماجنۇننىڭ» قازاقشا اۋدارماسى جارىق كوردى.