باتىس قازاقستان وبلىسىنىڭ بايتەرەك اۋدانىنداعى قۇشىم اۋىلىندا تۇرعىن ءۇي ورتەنىپ، سالدارىنان ەكى ادام قازا تاپتى، دەپ حابارلايدى Aqshamnews.kz ءتىلشىسى.
بقو تجد مالىمەتىنشە، ءورت تۋرالى حابار 2026 جىلعى 7 قاڭتاردا ساعات 20:11-دە جەدەل قىزمەتتەرگە تۇسكەن. وقيعا ورنىنا قۇتقارۋشىلار جەتكەن كەزدە ءتىلسىز جاۋ ءۇيدىڭ شاتىرى مەن ىشىندەگى تۇرمىستىق زاتتاردى شارپىعان. ءورتتىڭ جالپى اۋماعى شامامەن 50 شارشى مەتردى قۇرادى.
قايعىلى جاعداي بويىنشا، ءورت سوندىرۋشىلەر كەلمەي تۇرىپ پوليسيا قىزمەتكەرلەرى ۇيدەن ەكى ادامنىڭ ءمايىتىن تاۋىپ، ولاردى جانىپ جاتقان عيماراتتان سىرتقا شىعارعان.
ءقازىر ءورتتىڭ شىعۋ سەبەپتەرى انىقتالىپ جاتىر. وقيعاعا بايلانىستى ورت-تەحنيكالىق ساراپتاما تاعايىندالىپ، ماماندار بارلىق ءمان-جايدى تەكسەرىپ جاتىر.