بۇگىن، 9 قاڭتاردا الماتىدا قازاقستاندىق اكتەر مۇرات بيسەنبيندى اقتىق ساپارعا شىعارىپ سالۋ ءراسىمى ءوتتى. ءراسىم بارىسىندا ونەر يەسىنىڭ اكەسى بولات ۇلىنىڭ سوڭعى كۇندەرى تۋرالى كوزىنە جاس الىپ ايتىپ بەردى، - دەپ حابارلايدى aqshamnews.kz ءتىلشىسى.
"اۋىرعانىنا ءبىر جارىم جىل بولدى. باشقۇرتستانعا دا بارىپ ەمدەلدى. بۇعان دەيىن "جامان اۋرۋعا" قارسى تۇرۋ كەرەك، كۇرەسۋ كەرەك دەپ جۇرەتىن. ءبىراق كەيىنگى كەزدە قاتتى قينالىپ كەتتى. جارتى اي بۇرىن ينسۋلت الدى. ورتالىقتا 11 كۇن جاتتى. كەيىنگى كەزدەرى تاماق تا ىشە الماي قالدى. 8 قاڭتاردا تاڭعى ساعات 8-دە حابارلاستىم. سول كەزدە "مۇراتتى كەتىپ قالدى" دەگەن قارالى حابار كەلدى"، - دەدى ول.
بولات بيسەنبين بالاسىنىڭ قازاسى اتا-انا ءۇشىن ورنى تولماس اۋىر قايعى ەكەنىن ايتىپ، مۇراتتىڭ ءومىر سالتىن دا ەسكە الدى.
"بالاڭنىڭ ءولىمىن كورۋ - ەڭ اۋىر. ول مەنى جەرلەۋى كەرەك ەدى، ءبىراق ءبارى كەرىسىنشە بولدى… ىشپەيتىن، شەكپەيتىن، سپورتپەن شۇعىلداناتىن. قانداي اكتەر بولعانىن حالىق بىلەدى عوي"، - دەدى اكەسى كوزىنە جاس الىپ.
مۇرات بيسەنبينمەن قوشتاسۋعا كەلگەندەردىڭ اراسىندا قازاقستاندىق كينونىڭ بەلگىلى تۇلعالارى - اسان ءماجيت، ەردەن تەلەمىسوۆ، بەرىك ايتجانوۆ، جان بايجانبايەۆ، ەدىل انارباي، سانۇرجان سۇلەيمەنوۆ، ولجاس توعىمبەت جانە باسقا دا تانىمال اكتەرلەر بولدى.
جينالعان جۇرت مارقۇمنىڭ وتباسى مەن جاقىندارىنا قايعىرىپ كوڭىل ايتىپ، مۇرات بيسەنبيننىڭ ونەردەگى ەڭبەگى مەن ادامدىق بولمىسىن ەسكە الدى.
مۇرات بيسەمبين 1972 جىلى 11 قازاندا قىزىلوردادا تۋعان. الدىمەن پوليتەحنيكالىق ينستيتۋتتى اۋىل شارۋاشىلىعىنىڭ ينجەنەر-مەحانيگى ماماندىعى بويىنشا تامامداعانىمەن، كەيىن اكتەرلىك جولدى تاڭداعان. ونەر يەسى وتباسىلى، ءۇش بالانىڭ اكەسى بولعان.
رەداكسيا ونەر يەسىنىڭ وتباسى مەن جاقىندارىنا قايعىرا كوڭىل ايتادى.