بوستاندىق اۋدانى قالا ەكونوميكاسىنىڭ باستى قوزعاۋشى كۇشى بولىپ قالا بەرەدى. بيىلعى العاشقى التى ايدىڭ قورىتىندىسى بويىنشا اۋدان ينۆەستيسيا، كاسىپكەرلىك، ساۋدا مەن سالىق ءتۇسىمى جاعىنان تۇراقتى ءوسىم كورسەتتى. اۋدان ينۆەستيسيا تارتۋمەن عانا شەكتەلمەي، شاعىن جانە ورتا بيزنەستىڭ ورتالىعى دا بولىپ قالدى، دەپ اتاپ ءوتتى وڭىرلىك كوممۋنيكاسيالار قىزمەتىندە بوستاندىق اۋدانىنىڭ اكىمى سانجار ءالين.
2025 جىلدىڭ 5 ايىندا نەگىزگى كاپيتالعا سالىنعان ينۆەستيسيانىڭ كولەمى 175،5 ملرد تەڭگەگە جەتكەن، بۇل بىلتىرعى وسى ۋاقىتپەن سالىستىرعاندا 37،4%-عا ارتىق (127،7 ملرد تەڭگە). ينۆەستيسيالىق ساياسات پەن بيزنەس احۋالدىڭ جاقسارۋىنىڭ ناتيجەسىندە وسىلاي بولدى. ءقازىر قالاداعى ءاربىر بەسىنشى شاعىن جانە ورتا بيزنەس نىسانى بوستاندىق اۋدانىندا تىركەلگەن. جىل باسىنان بەرى مۇنداي كاسىپورىننىڭ سانى 5،3%-عا ءوسىپ، 2024 جىلعى 64 324-تەن بيىل 67 720-عا جەتتى.
بولشەك ساۋدادا دا ەداۋىر ءوسىم بار: ساتىلىم كولەمى 27،7%-عا ارتىپ، 528 ملرد تەڭگەگە جەتتى، وتكەن جىلى ول 413،4 ملرد تەڭگە بولعان. بولشەك ساۋدا كولەمى 6%-عا ارتىپ، 911،9 ملرد تەڭگەگە ءوستى (2024 جىلى - 860،5 ملرد تەڭگە). بۇل ءوسىم سالىقتىڭ ارتۋىنا اسەر ەتىپ، بيۋدجەتكە تۇسەتىن سالىق 250 ملرد تەڭگەدەن 302،8 ملرد تەڭگەگە دەيىن - 21،1%-عا ارتقان.
اۋداننىڭ 2025 جىلعا ارنالعان بيۋدجەتى 30،1 ملرد تەڭگەنى قۇرادى، بۇل بىلتىرعى بيۋدجەتتەن 1 ملرد تەڭگەگە كوپ (29،1 ملرد تەڭگە). بارلىق نەگىزگى ەكونوميكالىق كورسەتكىشتىڭ ءوسۋى بوستاندىق اۋدانىنىڭ جاقسى دامىپ كەلە جاتقانىنا دالەل بولا الادى.