بوستاندىق اۋدانىندا جۇيەنى جاڭارتۋ مەن ينجەنەرلىك ينفراقۇرىلىمدى دامىتۋ باستى مىندەتتىڭ ءبىرى بولىپ قالا بەرمەك. بيىل سۋ قۇبىرى، كارىز، جىلۋ مەن جارىق جەلىلەرىن سالىپ، قايتا جاڭارتۋ بويىنشا اۋقىمدى جۇمىس قولعا الىنعان. بۇلار ونداعان كوشەنى، تۇرعىن الاڭدارى مەن شاعىن اۋدانداردى قامتىپ وتىر. جوبالانعان، ىسكە اسىرىلىپ جاتقان جەلىنىڭ جالپى ۇزىندىعى 150 شاقىرىمنان اسادى، ينۆەستيسيا كولەمى – 35 ملرد تەڭگەدەن جوعارى. بوستاندىق اۋدانىنىڭ اكىمى سانجار ءالين وڭىرلىك كوممۋنيكاسيالار قىزمەتىندە وسى جۇمىستىڭ بارىسىن باياندادى.
سۋ قۇبىرى مەن سۋ بۇرۋ جۇيەسى ۇزدىكسىز جۇمىس ىستەۋى ءۇشىن 2025 جىلدىڭ سوڭىنا دەيىن اۋداننىڭ ءتورت كوشەسىندە 8 شاقىرىم ينجەنەرلىك جەلى قايتا جاڭارتىلادى. ماۋسىم ايىندا ەڭ ۇلكەن جوبانىڭ ءبىرى – تاۋلىگىنە 9 مىڭ م³ سۋ وندىرەتىن سۋ الۋ قۇرىلعىسىنىڭ قۇرىلىسى باستالدى. بۇل جوبا اۋداننىڭ وڭتۇستىك بولىگىندەگى 25 مىڭنان استام تۇرعىندى سۋمەن قامتاماسىز ەتپەك. نىساننىڭ قۇنى – 10،4 ملرد تەڭگە، ول 2026 جىلدىڭ سوڭىندا اياقتالادى.
2025 جىلدىڭ مامىر ايىنان باستاپ توتەنشە جاعدايدىڭ سالدارىن جويۋ جۇمىسى جالعاسىپ جاتىر: ۇشكەمپىروۆ، ارايلى، تالدى جانە ورتالىق كوشەلەرىندە شامامەن 7 شاقىرىم ماگيسترالدى سۋ مەن كارىز جەلىسى سالىنا باستادى. بۇل جوبا اسقارتاۋ، ەرمەنساي، اقتوبە شاعىن اۋداندارىن، «رەميزوۆكا»، «ساكۋرا»، «ديناستيا» تۇرعىن ءۇي كەشەندەرىن، سونداي-اق «رەميزوۆكا»، «درۋجبا»، «كۋرورتنوە» باۋ-باقشا سەرىكتەستىگىن قالا ينفراقۇرىلىمىنا قوسۋدى كوزدەيدى. جۇمىس جىلدىڭ سوڭىنا تامان بىتپەك.
2025 جىلدىڭ قىركۇيەگىندە نۇرلىتاۋ شاعىن اۋدانىندا 63،5 شاقىرىم سۋ قۇبىرىمەن 33،6 شاقىرىم كارىز جەلىسىن سالۋ ءۇشىن مەملەكەتتىك ساراپتامانىڭ وڭ قورىتىندىسىن كۇتىپ وتىر. قۇرىلىس قازان ايىندا باستالىپ، 2026 جىلدىڭ سوڭىندا اياقتالادى. جوبانىڭ قۇنى – 18 ملرد تەڭگە.
مامىر ايىنان باستاپ، جىلىتۋ ماۋسىمى اياقتالعاننان كەيىن، 7،1 شاقىرىم جىلۋ جەلىسىن قايتا جاڭعىرتۋ مەن ەكى سورعى ستانسياسىن جاڭارتۋ بويىنشا 15 جوبا ىسكە اسىرىلا باستادى. بۇل جىلۋ جەلىلەرى 60،6%-عا توزعاندىقتان قولعا الىنعان. 5،9 ملرد تەڭگەلىك جۇمىس 2025 جىلدىڭ قازانىندا اياقتالماق.
جىل باسىنان بەرى اۋدان اۋماعىندا كوشە جارىعىن جاڭارتۋ جۇمىستارى باستالدى. 19،6 شاقىرىم ەسكى كابەل اۋىستىرىلىپ، 70 جاڭا باعانا مەن 2600 شام ورناتىلدى. بۇل جۇمىس 80 كوشە مەن 100 اۋلانى قامتىدى. جىل سوڭىنا دەيىن تاعى 40 شاقىرىم كابەل جەلىسى اۋىستىرىلىپ، 230 باعانا مەن 3 مىڭ شام ورناتىلماق. تامىز ايىندا 65 كوشەدە جاڭا سىرتقى جارىقتاندىرۋ جەلىلەرىنىڭ قۇرىلىسى باستالادى: 28 كم اۋە جەلىسى تارتىلىپ، 778 باعانا مەن سونشا شام ورناتىلادى. 510 ملن تەڭگەلىك جوبانىڭ اياقتالۋى 2025 جىلدىڭ جەلتوقسانىنا جوسپارلانعان.
«ينجەنەرلىك ينفراقۇرىلىمدى كەشەندى دامىتۋ اۋدان تۇرعىندارىنىڭ ءومىر ساپاسىن ايتارلىقتاي جاقسارتىپ، قالالىق ورتانىڭ تۇراقتى دامۋىن قامتاماسىز ەتەدى»، – دەپ اتاپ ءوتتى سانجار ءالين.