بوستاندىق اۋدانىندا «حالىق قاتىساتىن بيۋدجەت» اياسىندا قوعامدىق كەڭىستىكتەر مەن اۋلا اۋماقتارى اباتتانىپ جاتىر
بوستاندىق اۋدانىندا قوعامدىق كەڭىستىكتەردى اباتتاندىرىپ، جايلى قالالىق ورتانى قالىپتاستىرۋ باعىتىندا جۇيەلى جۇمىس ىستەلىپ جاتىر. وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا اۋدان اكىمى سانجار ءالين وسى جۇمىستىڭ بارىسىن بايانداپ بەردى.
تۇرعىت وزال كوشەسىنەن بايزاقوۆ كوشەسىنە دەيىنگى جاياۋ جۇرگىنشىلەر ايماعى، اباي داڭعىلى مەن ساتبايەۆ كوشەسىنىڭ ارالىعىنداعى جەلتوقسان كوشەسى بويى، اباي مەن گاگارين داڭعىلىنىڭ قيىلىسىنداعى الاڭ مەن گاگارين داڭعىلى بويىنداعى بۋلۆار دا اباتتانعان. وندا بالالار مەن سپورت الاڭى، جاڭا ورىندىق ورناتىلىپ، جارىق قويىلىپ، كوگالداندىرۋ جۇمىسى جۇرگىزىلدى.
بيىل اقپان ايىندا نازاربايەۆ داڭعىلى بويىنداعى بۇرىنعى رەزيدەنسيانىڭ ورنىندا جاڭا الاڭ سالىنا باستادى. اۋدان اكىمدىگىنىڭ مالىمەتىنشە، بۇل الاڭ قالا تۇرعىندارىنىڭ سەرۋەندەپ، تازا اۋادا دەمالۋىنا ارنالماق. جۇمىس 2025 جىلدىڭ قازان ايىندا اياقتالادى.
2026 جىلدىڭ ءساۋىر ايىندا ۇزىندىعى 5،7 شاقىرىم بولاتىن ۇلكەن الماتى وزەنىنىڭ جاعالاۋىن (پلوتينادان باستاپ اباي داڭعىلىنا دەيىن) قايتا جاڭالاۋ جۇمىستارى دا اياقتالىپ قالماق. جوبا اياسىندا بەتون تىرەۋىش قۇرىلىمدار جاڭارتىلىپ، جاياۋ جۇرگىنشى كوپىرى، بالالار مەن سپورت الاڭدارى، كوشە جيھازدارى ورناتىلىپ، ۆەلوسيپەد جولى سالىنادى.
«جىل سوڭىنا دەيىن ءبىز «اتاكەنت» كورمە ورتالىعىنىڭ اينالاسىن اباتتاندىرىپ، جاڭا «وڭتۇستىك» ساياباعىن سالۋ سياقتى ەكى ۇلكەن جوبانى ىسكە اسىرامىز. بۇل اۋداننىڭ جاسىل ينفراقۇرىلىمىن كەڭەيتىپ، تۇرعىندارعا ساپالى قوعامدىق كەڭىستىك ۇسىنۋعا مۇمكىندىك بەرمەك»، – دەدى سانجار ءالين.
سۋ بۇرقاعىن جاڭارتۋعا دا نازار اۋدارعان. مامىر ايىندا رەسپۋبليكا الاڭى مەن قالالىق اكىمدىكتىڭ الدىنداعى الاڭنىڭ جانىنداعى فونتاندار كۇردەلى جوندەۋدەن وتەدى. بۇل جۇمىستار 2025 جىلدىڭ قازان ايىندا اياقتالادى.
«قالالىق اكىمدىكتىڭ قولداۋىنىڭ ارقاسىندا ەرمەنساي شاعىن اۋدانىنداعى كەرەنقۇلاق وزەنىنىڭ ارناسىن اباتتاندىرۋعا ارنالعان جوبالىق-سمەتالىق قۇجاتتاما ازىرلەنىپ جاتىر. بۇل جەردە تەرەڭقۇرعا ۇقساس دەمالىس ايماعى جاسالادى. جوبانى جۇزەگە اسىرۋ 2026 جىلعا جوسپارلانعان»، – دەپ تولىقتىردى اۋدان اكىمى.
بوستاندىق اۋدانىندا «حالىق قاتىساتىن بيۋدجەت» (حقب) باعدارلاماسى اياسىندا دا جوبالار تابىستى جۇزەگە اسىرىلىپ جاتىر. 2024 جىلى جالپى سوماسى 2،8 ملرد تەڭگەگە 50 جوبا ىسكە اسىرىلدى (ونىڭ ىشىندە 14 جوبا – بالالار مەن سپورت الاڭدارىن جوندەۋ، 15 – قوعامدىق كەڭىستىكتەردى اباتتاندىرۋ، 13 – اۆتوسۋارۋ جۇيەسىن ورناتۋ، 6 – جارىقتاندىرۋ، 2 – ارىق جۇيەسىن سالۋ مەن اباتتاندىرۋ). 2025 جىلعا 2 ملرد تەڭگە ءبولىنىپ، تۇرعىندار داۋىس بەرگەن 26 جوبانى ىسكە اسىرۋ باستالدى.
«حقب اياسىندا جۇزەگە اسىرىلىپ جاتقان ماڭىزدى جوبانىڭ ءبىرى – تورايعىروۆ كوشەسىن سايىن كوشەسىنەن باستاپ ءابىش كەكىلباي ۇلى كوشەسىنە دەيىن اباتتاندىرىپ شىعۋ. مۇندا بالالار مەن سپورت الاڭدارى، ۆەلوجولدار، كوشە جيھازدارى مەن كامەرالارى بار جاڭا ۇلگىدەگى جاياۋ جۇرگىنشىلەر ايماعى جاسالادى. سونداي-اق بۇل اۋماققا 1 500-دەن استام بۇتا پەن 500 ءتۇپ اعاش ەگۋدى دە جوسپارلاپ وتىرمىز»، – دەدى سانجار ءالين.
ءسوز سوڭىندا اۋدان اكىمى 2025 جىلى بوستاندىق اۋدانىندا 70 اۋلا اباتتانعانىن اتاپ ءوتتى.