بوكستان قازاقستان ەرلەر قۇراماسىنىڭ جاڭا باس باپكەرى بولىپ نۇرجان ناسانوۆ تاعايىندالدى، - دەپ حابارلايدى Massaget.kz ءتىلشىسى قازاقستان بوكس فەدەراسياسىنىڭ باسپا ءسوز قىزمەتىنە سىلتەمە جاساپ.
نۇرجان ناسانوۆ تۋرالى نە بەلگىلى؟
نۇرجان ناسانوۆ 1975 جىلعى 23 قازاندا دۇنيەگە كەلگەن.
جاتتىقتىرۋشىلىق قىزمەتىن 2016 جىلى باستاعان. ال 2024 جىلعى تامىزدان بەرى ۇلتتىق قۇرامانىڭ باپكەرلەر شتابىنا كىرىپ، كوماندانىڭ بۇرىنعى جەتەكشىسى قايرات ساتجانوۆپەن بىرگە جۇمىس ىستەدى. ونىڭ شاكىرتتەرى قاتارىندا ەكى دۇركىن الەم چەمپيونى سانجار تاشكەنباي جانە باسقا دا ءبىرقاتار بوكسشى بار.
ناسانوۆ بۇل قىزمەتتە دەنساۋلىعىنا بايلانىستى ۇلتتىق قۇرامامەن جۇمىسىن توقتاتۋعا ءماجبۇر بولعان قايرات ءساتجانوۆتىڭ ورنىن باستى.
"ءساتجانوۆ قايرات تۇرسىنحان ۇلى 2024 جىلعى تامىزدان باستاپ ۇلتتىق قۇرامانىڭ باس جاتتىقتىرۋشىسى قىزمەتىن اتقاردى. ق ر ەڭبەك سىڭىرگەن جاتتىقتىرۋشىسىنىڭ جەتەكشىلىگىمەن ەرلەر كومانداسى كوپتەگەن حالىقارالىق تۋرنيردە توپ جارىپ، الەم چەمپيوناتىنىڭ جۇلدەلەرىن يەلەندى. 35 جىلدان اسا تاجىريبەسى بار مامان دەنساۋلىعىنا بايلانىستى بۇل قىزمەتتەن باس تارتۋىنا تۋرا كەلدى. قايرات تۇرسىنحانۇلىنا وتاندىق بوكس قاۋىمداستىعىنىڭ اتىنان العىس بىلدىرەمىز"، - دەلىنگەن رەسمي حابارلامادا.
بۇعان دەيىن 2019 جىلعى الەم چەمپيونى بەكزاد نۇرداۋلەتوۆ ماڭعىستاۋ وبلىسىنداعى بوكستان وليمپيادالىق رەزەرۆتىڭ رەسپۋبليكالىق مامانداندىرىلعان مەكتەپ-ينتەرناتىنىڭ ديرەكتورى بولىپ تاعايىندالعانى بەلگىلى بولعان.