الماتىنىڭ تاۋ كلاستەرىن دامىتۋ اياسىندا تاۋلى ايماقتاردىڭ ادام قابىلداۋ مۇمكىندىگى بەس ەسەگە ارتتىرىپ، تاۋلىگىنە 30 مىڭ ادامعا دەيىن جەتكىزۋ جوسپارلانىپ وتىر. بۇل تۋرالى الماتى قالاسىنىڭ تۋريزم باسقارماسىنىڭ وكىلدەرى ايتتى.
جوبا تۋريستەر سانىن بىركەلكى رەتتەۋگە، تابيعي ەكوجۇيەگە تۇسەتىن سالماقتى ازايتۋعا جانە تاۋ باعىتتارىنداعى قاۋىپسىزدىك دەڭگەيىن ارتتىرۋعا مۇمكىندىك بەرەتىن زاماناۋي، باسقارىلاتىن ينفراقۇرىلىم قۇرۋدى ماقسات ەتەدى.
الماتى قالاسى تۋريزم باسقارماسىنىڭ باسشىسى عاليا توقسەيىتوۆانىڭ ايتۋىنشا، تاۋدىڭ جاقىندىعى قالانىڭ باستى باسەكەلەستىك ارتىقشىلىعى.
"الماتى تاۋلى اۋماق قالا ورتالىعىنان نەبارى 20-30 مينۋتتىق جەردە ورنالاسقان الەمدەگى ساناۋلى مەگاپوليستەردىڭ ءبىرى. بۇل جەتەكشى تاۋ تۋريستىك باعىتتارىن قالىپتاستىرۋعا، ءتۋريزمدى تۇراقتىلىق پەن تابيعاتقا جاناشىرلىقپەن قاراۋ قاعيداتتارىنا سۇيەنە وتىرىپ دامىتۋعا زور مۇمكىندىك بەرەدى"، – دەدى عاليا توقسەيىتوۆا.
تۋريزم باسقارماسىندا بۇگىندە تۋريستىك سالا جاھاندىق جالپى ىشكى ءونىمنىڭ 10 پايىزىنا دەيىن ۇلەس قوساتىنى، ال ينفراقۇرىلىمعا سالىنعان ءاربىر دوللار 15 دوللارعا دەيىنگى جيىنتىق ەكونوميكالىق تيىمدىلىك اكەلەتىنى ايتىلدى. تاۋ شاڭعىسى تۋريزمىمەن اينالىساتىن ءبىر ءتۋريستىڭ ورتاشا تاۋلىكتىك شىعىنى شامامەن 350 دوللار. بۇل تاۋ ءتۋريزمىن دامىتۋ الماتى ءۇشىن ەكونوميكالىق تۇرعىدان اسا ماڭىزدى باعىت ەكەنىن كورسەتەدى.
سونىمەن قاتار، تۋريستەر سانىنىڭ ءوسۋى تاۋلى اۋماقتارعا ايتارلىقتاي جۇكتەمە ءتۇسىرىپ وتىرعانى دا ايتىلدى. 2018 جىلدان بەرى ىلە-الاتاۋ ۇلتتىق ساياباعىنا كەلۋشىلەر سانى 4،5 ەسەگە ارتسا، "شىمبۇلاق" تاۋ كۋرورتىنا كەلۋشىلەر سانى 2،5 ەسەگە ءوسىپ، جىلىنا 1،5 ميلليون ادامعا جەتكەن.
الماتى تاۋ كلاستەرىن دامىتۋ مەن "شىمبۇلاق" كۋرورتىن جاڭعىرتۋ بۇعان دەيىن مەملەكەت باسشىسى قاسىم-جومارت توقايەۆ تاراپىنان ەلىمىزدىڭ تۋريستىك سالاسىن دامىتۋدىڭ باسىم باعىتتارىنىڭ ءبىرى رەتىندە ايقىندالعان بولاتىن.
الماتى تاۋ كلاستەرى جىل بويى جۇمىس ىستەيتىن كوپ ماۋسىمدى تۋريستىك ءونىم رەتىندە دامىپ وتىر: قىستا – تاۋ-شاڭعى ءتۋريزمى، جازدا – حايكينگ، ەكولوگيالىق سوقپاقتار مەن ۆەلوسيپەد باعىتتارى. اۋماقتىڭ ەداۋىر بولىگى كەز كەلگەن جان ءۇشىن قولجەتىمدى كۇيىندە قالادى. بارلىق جوبالىق شەشىم ەكولوگيالىق تالاپتاردى ساقتاي وتىرىپ جانە قوعامدىق تالقىلاۋ ارقىلى جۇزەگە اسىرىلادى.