ادىلەت دەپارتامەنتى 2025 جىلدىڭ ءبىرىنشى جارتىجىلدىعىنىڭ قورىتىندىسىن جاريالادى.
ازاماتتىق اكتىلەردىڭ جالپى سانى ازايعانىنا قاراماستان، ستاتيستيكا قىزىقتى وزگەرىستەردى كورسەتىپ، ادىلەت مينيسترلىگىنىڭ چات-بوتى سياقتى سيفرلىق شەشىمدەردىڭ ەنگىزىلۋى حالىققا قۇقىقتىق كومەكتىڭ قولجەتىمدىلىگىن ارتتىرىپ وتىر.
الماتى قالاسى ادىلەت دەپارتامەنتىنىڭ باسشىسى بالايىم كەسەبايەۆا وڭىرلىك كوممۋنيكاسيالار قىزمەتىنىڭ الاڭىندا دەموگرافيالىق ستاتيستيكا تۋرالى جان-جاقتى باياندادى.
الماتىدا ءقازىر 101 057 ازاماتتىق اكت تىركەلگەن، بۇل 2024 جىلعى وسى ۋاقىتپەن سالىستىرعاندا 39،46%-عا از (2024 جىلى 140 939 اكت تىركەلگەن). سوعان قاراماستان، كەيبىر كاتەگوريادا وڭ وزگەرىس بار. مىسالى، تۋۋ دەڭگەيى 4،08%-عا ءوسىپ، 25 718 تۋۋ اكتىسى تىركەلگەن (2024 جىلى 24 667 اكت بولعان). ءولىم كورسەتكىشى كەرىسىنشە 10،2%-عا تومەندەدى. نەكەگە تۇرۋ دا 3،8%-عا ءسال ازايعان (2025 جىلى 9 274 نەكە، 2024 جىلى 9 627 نەكە)، ال اجىراسقانداردىڭ سانى ايتارلىقتاي ءوسىپ، 41،6%-عا كوبەيگەن. 2 384 اجىراسۋ اكتىسى تىركەلىپتى.
اكىمشىلىك تاجىريبە بويىنشا، 2025 جىلى 269 بورىشكەر جاۋاپقا تارتىلدى، 2024 جىلى ولاردىڭ سانى 168 بولعان. جالپى ءىس سانىنان 14 ءىس مەملەكەتتىك سوت ورىنداۋشىلارىنىڭ ماتەريالى بويىنشا (2024 جىلى – 23)، 158 ءىس جەكە سوت ورىنداۋشىلارىنىڭ ماتەريالى بويىنشا (2024 جىلى – 100) تۇسكەن. 8 اكىمشىلىك قاماۋ شاراسى قولدانىلىپ (2024 جىلى – 26)، 255 اكىمشىلىك ايىپپۇل سالىندى. سونىمەن قاتار 7 قىلمىستىق ءىس تىركەلدى.
اليمەنت تولەۋدەن قاشقانداردىڭ سانى دا ەداۋىر وسكەن: 209 بورىشكەر جاۋاپقا تارتىلدى، وتكەن جىلى ولاردىڭ سانى بار-جوعى 61 بولعان.
2025 جىلى الماتى قالاسىنىڭ جەكە سوت ورىنداۋشىلارى اليمەنت ءوندىرۋ بويىنشا 21 346 اتقارۋشىلىق ءىس جۇرگىزگەن (2024 جىلى - 20 441). ونىڭ ىشىندە 2 168 ءىس اياقتالعان، ال ماۋسىم ايىنىڭ سوڭىنا قاراي اتقارۋشىلىق قۇجاتتاردىڭ قالدىعى 19 338 بولعان.
اليمەنت بويىنشا بەرەشەگى بار بورىشكەرلەرگە قاتىستى قازاقستان رەسپۋبليكاسىنان تىس جەرلەرگە ۋاقىتشا شىعۋعا شەكتەۋ قويۋ تۋرالى 4 910 قاۋلى شىعارىلعان. التى اي ىشىندە جەكە سوت ورىنداۋشىلارى اليمەنت الۋشىلاردىڭ پايداسىنا 600 ميلليون تەڭگەدەن استام قاراجات ءوندىرىپ الدى (ناقتى سوما - 651 513 754 تەڭگە).
سونداي-اق بورىشكەرلەردىڭ مۇلكى انىقتالىپ، قارىزدى وتەۋ ءۇشىن 6 اۆتوكولىك پەن 11 جىلجىمايتىن مۇلىك نىسانى ساتىلدى. بورىشكەرلەردى ىزدەستىرگەن 427 ءىس توقتاتىلىپ، 198 ادام اكىمشىلىك جاۋاپكەرشىلىككە تارتىلدى.
سيفرلاندىرۋ سالاسىندا، 2024 جىلدىڭ مامىر ايىنان باستاپ قازاقستان رەسپۋبليكاسىنىڭ ادىلەت مينيسترلىگىنىڭ رەسمي سايتىندا چات-بوت – ۆيرتۋالدى كەڭەسشى جۇمىس ىستەي باستادى. ول ازاماتتارعا تاۋلىك بويى قۇقىقتىق اقپارات بەرىپ وتىرادى. چات-بوت اليمەنت، سەنىمحات الۋ، سوتتىلىقسىزدىق تۋرالى انىقتاما الۋ، نەكە بۇزۋ، مۇراگەرلىك راسىمدەر مەن باسقا دا وزەكتى ماسەلەلەر بويىنشا كومەك كورسەتەدى. سونىمەن قاتار، بوت ولاردى ءتيىستى مەملەكەتتىك ورگاندارعا، ەلەكتروندى قىزمەتتەرگە باعىتتايدى.
چات-بوت ىسكە قوسىلعالى بەرى قالا تۇرعىندارىمەن التى اقپاراتتىق كەزدەسۋ ءوتىپ، 4 751 ادام قۇقىقتىق كومەك الۋ ءۇشىن سيفرلىق كومەكشىنى پايدالانۋعا باعىتتالدى. سايتقا 4 829 حابارلاما كەلىپ ءتۇسىپ، ونىڭ 1 146-سى كەرى بايلانىس بولدى.
سيفرلىق تەحنولوگيالار مەن حالىقپەن بەلسەندى جۇمىس ىستەۋدىڭ ارقاسىندا ادىلەت سالاسى حالىققا جاقىنداپ كەلەدى.